ບໍລິສັດ ບົວລະພາກະສິກຳ – ກໍາປ່າໄມ້ ຈໍາກັດ ພ້ອມລົງມືກໍ່ສ້າງໂຮງງານໄມ້ອັດຂອງຕົນຂຶ້ນເພື່ອຮອງຮັບຈໍານວນວັດຖຸດິບທີ່ປູກໄດ້ແລ້ວ 5.000 ກວ່າເຮັກຕາ.
ພິທີວາງສີລາລືກສ້າງໂຮງງານໄມ້ອັດໄດ້ມີຂຶ້ນໃນວັນທີ 10 ກໍລະກົດ 2019 ທີ່ບ້ານໂພນສູງ – ບ້ານຄອນພຸກ ເມືອງຫີນເຫີບ ແຂວງວຽງຈັນ ໂດຍການເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີທ່ານເຈົ້າແຂວງວຽງຈັນ, ລັດຖະມົນຕີ, ຮອງລັດຖະມົນຕີ, ຜູ້ອໍານວຍການ ບໍລິສັດ ບົວລະພາ ແລະ ແຂກຖືກເຊີນເຂົ້າຮ່ວມ.
ທ່ານ ມາຕິນ ຟໍແຊນ ຜູ້ອຳນວຍການໃຫຍ່ ບໍລິສັດ ບົວລະພາກະສິກຳ – ປ່າໄມ້ ຈຳກັດ ກ່າວວ່າ: ມື້ນີ້ເປັນໂອກາດດີເຊິ່ງເປັນເວລາຫຼາຍກວ່າ 10 ປີທີ່ທີມງານບໍລິສັດບົວລະພາ ທຸ່ມເທເຮັດວຽກໜັກມານໍາກັນ ພວກເຮົາໄດ້ຄົ້ນຄວ້າຊອກຫາສະຖານທີ່ໆດີທີ່ສຸດໃນໂລກເພື່ອຜະລິດອຸດສາຫະກຳປ່າໄມ້ ແລະ ມື້ນີ້ພວກເຮົາພົບແລ້ວຢູ່ເມືອງຫີນເຫີບ ແຂວງວຽງຈັນ ສປປ ລາວ.
ປັດຈຸບັນພວກເຮົາໄດ້ເລີ່ມກໍ່ສ້າງໂຮງງານຜະລິດໄມ້ອັດທີ່ໃຫຍ່ ແລະ ທັນສະໄໝໃນປະເທດລາວ ພວກເຮົາໄດ້ຮັບໜ້າທີ່ອັນຍິ່ງໃຫຍ່ ເພື່ອພັດທະນາໃຫ້ກາຍເປັນປະເທດທີ່ມີປ່າໄມ້ອຸດົມສົມບູນ ເຊິ່ງ ບໍລິສັດ ບົວລະພາ ໄດ້ລົງທຶນປູກໄມ້ເພື່ອປ້ອນໂຮງງານໄມ້ອັດໃນໄລຍະ 7 ປີທີ່ຜ່ານມາ ໂດຍທີ່ປະຊາຊົນມີສ່ວນຮ່ວມ. ການສ້າງຕັ້ງໂຮງງານກໍເປັນໜຶ່ງໃນແຜນຍຸດທະສາດຂອງ ບໍລິສັດ ບົວລະພາ ເຊິ່ງໃນຕໍ່ໜ້າພວກເຮົາຍັງຈະສືບຕໍ່ປູກໄມ້ອຸດສາຫະກຳໃນລາວເພີ່ມຂຶ້ນ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ກ່າວສະແດງຄວາມຊົມເຊີຍຕໍ່ຄວາມພະຍາຍາມຂອງ ບໍລິສັດ ບົວລະພາ ກະສິກໍາ – ປ່າໄມ້ ຈໍາກັດ ແລະ ນັກລົງທຶນ ຈາກປະເທດຊູແອັດ ທີ່ພັດທະນາອຸດສາຫະກຳໄມ້ໃນ ສປປ ລາວ ເຊິ່ງລັດຖະບານລາວ ໄດ້ເຊື່ອມສານເອົານະໂຍບາຍການພັດທະນາແບບຍືນຍົງຂອງສະຫະປະຊາຊາດ ເຂົ້າໃນແຜນພັດທະນາເສດຖະກິດ – ສັງຄົມ 5 ປີ ຄັ້ງທີ 8 ຂອງຕົນ. ການພັດທະນາຂະແໜງອຸດສາຫະກຳໃນປະເທດເຮົາໃຫ້ມີຄວາມຍືນຍົງ ສີຂຽວ ກໍແມ່ນຄວາມຕ້ອງການຂອງ ສປປ ລາວ ເພື່ອບັນລຸເປົ້າໝາຍທີ່ສະຫະປະຊາຊາດວາງໄວ້ ເຊິ່ງໃນນັ້ນຍຸດທະສາດການນໍາໃຊ້ທີ່ດິນແຫ່ງຊາດກໍໄດ້ກໍານົດເອົາເນື້ອທີ່ດິນ 70% ແມ່ນເນື້ອທີ່ປົກຫຸ້ມຂອງປ່າໄມ້ ເຊິ່ງມາຮອດປັດຈຸບັນ ຖ້າໄລ່ຕາມມາດຕະຖານສາກົນກໍານົດກໍສາມາດບັນລຸໄດ້ຫຼາຍກວ່າ 60%.
ສໍາລັບການລົງທຶນປູກໄມ້ ແລະ ການປຸງແຕ່ງຜະລິດຕະພັນໄມ້ຂອງ ບໍລິສັດ ບົວລະພາ ແມ່ນການປະຕິບັດນະໂຍບາຍຂອງລັດຖະບານໃນການພັດທະນາຂະແໜງກະສິກໍາ – ປ່າໄມ້ ຕິດພັນກັບການປຸງແຕ່ງ ແມ່ນເຮັດໃຫ້ຄວາມໄວຂອງເນື້ອທີ່ປົກຫຸ້ມປ່າໄມ້ເພີ່ມຂຶ້ນ.
ທ່ານຮອງນາຍົກກ່າວຕື່ມອີກວ່າ: ການລົງທຶນປູກໄມ້ໂດຍການມີສ່ວນຮ່ວມຂອງປະຊາຊົນແມ່ນສອດຄ່ອງກັບນະໂຍບາຍການພັດທະນາຂອງລັດຖະບານ ຮຽກຮ້ອງໃຫ້ຄະນະພັກ, ອໍານາດການປົກຄອງ ແຂວງວຽງຈັນ ພ້ອມກັບຂະແໜງການກ່ຽວຂ້ອງຈົ່ງສືບຕໍ່ເອົາໃຈໃສ່ຕິດຕາມການພັດທະນາໂຄງການດັ່ງກ່າວ.
ໂຮງງານຜະລິດໄມ້ອັດ ບໍລິສັດ ບົວລະພາ ກະສິກໍາ – ປ່າໄມ້ ຈໍາກັດ ຕັ້ງຢູ່ບ້ານໂພນສູງ ແລະ ບ້ານຄອນພຸກ ເມືອງຫີນເຫີບ ແຂວງວຽງຈັນ ເຊິ່ງ ບໍລິສັດ CAMCE ເປັນຜູ້ຮັບເໝົາກໍ່ສ້າງ ໃນມູນຄ່າ 12,42 ລ້ານໂດລາສະຫະລັດ, ໄລຍະເວລາກໍ່ສ້າງ 21 ເດືອນ. ພາຍຫຼັງສໍາເລັດຈະສ້າງທ່າແຮງຍູ້ສໍາຄັນ ເຮັດໃຫ້ປະຊາຊົນໃນທ້ອງຖິ່ນມີວຽກເຮັດງານທໍາ, ເສດຖະກິດໂດຍລວມຂອງເມືອງຫີນເຫີບ ຂະຫຍາຍຕົວຂຶ້ນເທື່ອລະກ້າວ.
( ຂ່າວ: ພຸດຕີ້, ຮູບ: ສອນໄຊ )
