ປະທານາທິບໍດີຢູເຄຣນ ສັ່ງການໃຫ້ໜ່ວຍງານທີ່ກ່ຽວຂ້ອງສະເໜີແຜນປັບປຸງພື້ນທີ່ຮອບໂຮງໄຟຟ້ານິວເຄຣຍເຊີໂນບິລ ໃຫ້ກາຍເປັນ “ສະຖານທີ່ທ່ອງທ່ຽວ” ເພື່ອຟື້ນຟູພາບລັກຂອງປະເທດ.
ສໍານັກຂ່າວຕ່າງປະເທດລາຍງານຈາກນະຄອນຫຼວງຄຽບ ປະເທດຢູເຄຣນ ເມື່ອວັນພະຫັດ ທີ 11 ກໍລະກົດ ວ່າ ປະທານາທິບໍດີໂວໂລດິເມຍ ເຊເລນສະກີ້ ລົງນາມໃນດໍາລັດສະບັບໜຶ່ງ ເມື່ອວັນພຸດ ໃຫ້ໜ່ວຍງານທີ່ກ່ຽວຂ້ອງຈັດເຮັດແຜນການປັບປ່ຽນທິວທັດ ແລະ ການບູລະນະພື້ນທີ່ອ້ອມຮອບໂຮງງານໄຟຟ້ານິວເຄີ້ຍເຊີໂນບິລ ໂດຍສະເພາະທີ່ເມືອງພຣິພຽດ ເຊິ່ງຢູ່ໃກ້ທີ່ສຸດ ແລະ ຕອນນີ້ ເກືອບກາຍເປັນເມືອງຮ້າງໃຫ້ເປັນສະຖານທີ່ທ່ອງທ່ຽວ ໂດຍ ທ່ານເຊເລນສະກີ້ ສະເໜີແນວຄິດເລື່ອງການຈັດເຮັດທາງຍ່າງທ່ອງທ່ຽວພາຍໃນບໍລິເວນນັ້ນ. ຂະນະດຽວກັນ, ຜູ້ນໍາຢູເຄຣນ ກ່າວດ້ວຍວ່າ ໄພພິບັດນິວເຄຣຍ ເຊີໂນບິລ ຄື “ຝັນຮ້າຍທີ່ຫຼອກຫຼອນ” ຊາວຢູເຄຣນມາດົນນານ ແລະ ຕອນນີ້ ໄດ້ເວລາອັນສົມຄວນແລ້ວ ທີ່ຕ້ອງປ່ຽນແປງກອບຄວາມຄິດນັ້ນ ທັງຂອງປະຊາຊົນໃນທ້ອງຖິ່ນ ແລະ ຊາວໂລກ.
ທັງນີ້ ໃນວັນດຽວກັນ ທ່ານເຊເລນສະກີ້ ເປັນປະທານໃນພິທີເປີດໂຄງສ້າງຂະໜາດໃຫຍ່ ເຊິ່ງໃຊ້ເວລາກໍ່ສ້າງດົນ 9 ປີ ເພື່ອຄວບເອົາເສດຊາກທີ່ຍັງຫຼົງເຫຼືອຈາກເຕົາປະຕິກອນ ເບີ 4 ຂອງໂຮງໄຟຟ້ານິວເຄຣຍເຊີໂນບິລ ໂດຍລັດຖະບານຄຽບ ໄດ້ຮັບງົບປະມານຊ່ວຍເຫຼືອສ່ວນໃຫຍ່ຈາກທັງໝົດ 2.200 ລ້ານເອີໂຣ (ປະມານ 21.550 ຕື້ກີບ) ຈາກທະນາຄານເອີຣົບ ເພື່ອການຟື້ນຟູ ແລະ ການພັດທະນາ (EBRD: European Bank for Reconstruction and Development) ໂດຍເຕົາປະຕິກອນ ເບີ 4 ເປັນຈຸດເລິ່ມຕົ້ນຂອງໄພພິບັດນິວເຄຣຍເຊີໂນບິລ ທີ່ຖືເປັນອຸບັດຕິເຫດນິວເຄຣຍຄັ້ງຮ້າຍແຮງທີ່ສຸດ ໃນປະຫວັດສາດໂລກ ໂດຍ “ຄວາມຜິດພາດ” ທີ່ເກີດຂຶ້ນກັບລະບົບສຸກເສີນຄວບຄຸມການເຮັດວຽກຂອງຕົວຫຼໍ່ເຢັນ ສົ່ງຜົນໃຫ້ແກນຂອງເຕົາປະຕິກອນເກີດຄວາມຮ້ອນຂຶ້ນຢ່າງວ່ອງໄວຈົນລະເບີດ ເມື່ອວັນທີ 26 ເມສາ 1986 ແລະ ລັງສີແຜ່ກະຈາຍໄປທົ່ວຝັ່ງພາກຕາເວັນຕົກຂອງສະຫະພາບໂຊຫວຽດທີ່ສະໄໝນັ້ນ ປະເທດຢູເຄຣນຍັງເປັນສ່ວນໜຶ່ງ ແລະ ພື້ນທີ່ເກືອບທັງໝົດຂອງທະວີບເອີຣົບ ປະຊາຊົນຫຼາຍກວ່າ 350.000 ຄົນ ຕ້ອງອົບພະຍົບ ແລະ ມີຜູ້ເສຍຊີວິດໂດຍກົງຈາກມະຫາໄພພິບັດຄັ້ງນັ້ນ 31 ຄົນ.
