ກະຊວງການຄ້າຂອງອາເມຣິກາ ທະຍອຍພິຈາລະນາຄໍາຮ້ອງຂອງຜູ້ປະກອບການໃນປະເທດ ທີ່ຕ້ອງການຄ້າຂາຍກັບບໍລິສັດຫົວເຫວີ່ຍຂອງຈີນ ເມື່ອໃດທີ່ຄວາມຮ່ວມມືນັ້ນ “ບໍ່ກະທົບຕໍ່ຄວາມໝັ້ນຄົງ” ແຕ່ກ່າວດ້ວຍວ່າ “ອາດຈະອະນຸມັດ ຫຼື ບໍ່ ກໍ່ໄດ້”.
ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນອັງຄານ ທີ 9 ກໍລະກົດ ວ່າ ທ່ານວິລເບີ ຣອສ ລັດຖະມົນຕີວ່າການກະຊວງການຄ້າອາເມຣິກາ ກ່າວເມື່ອວັນອັງຄານ ວ່າ ລັດຖະບານວໍຊິງຕັນຈະເລິ່ມພິຈາລະນາຄໍາຮ້ອງ ເພື່ອອອກໃບອະນຸຍາດໃຫ້ແກ່ຜູ້ປະກອບການຂອງອາເມຣິກາ ໃນການຄ້າຂາຍ ຫຼື ເຮັດທຸລະກໍາ ຮ່ວມກັບບໍລິສັດຫົວເຫວີ່ຍ ເທັກໂນໂລຢີຂອງຈີນ ເມື່ອໃດທີ່ຄວາມຮ່ວມມືນັ້ນ “ບໍ່ສ້າງຄວາມສ່ຽງ ແລະ ສົ່ງຜົນກະທົບດ້ານຄວາມໝັ້ນຄົງ” ແລະ ເພື່ອໃຫ້ເປັນໄປຕາມໜຶ່ງໃນເງື່ອນໄຂຂອງ “ຂໍ້ຕົກລົງສະຫງົບສົງຄາມ” ລະຫວ່າງ ປະທານາທິບໍດີໂດນັລ ທຣໍາ ຜູ້ນໍາອາເມຣິກາ ກັບ ປະທານປະເທດສີ ຈິ້ນຜິງ ຜູ້ນໍາຈີນ ເຊິ່ງພົບຫາລືກັນ ລະຫວ່າງ ການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ 20” ທີ່ເມືອງໂອຊາກ້າ ປະເທດຍີ່ປຸ່ນ ເມື່ອທ້າຍເດືອນມິຖຸນາ ຜ່ານມາ.
ຢ່າງໃດກໍ່ຕາມ ທ່ານຣອສ ຢໍ້າວ່າ ຫົວເຫວີ່ຍ ຍັງເປັນບໍລິສັດຂ້າມຊາດທີ່ຢູ່ໃນບັນຊີດໍາ “ຕ້ອງເຝົ້າລະວັງ” ຂອງກະຊວງການຄ້າອາເມຣິກາ ໝາຍຄວາມວ່າ ຄໍາຮ້ອງທີ່ຍື່ນມາບໍ່ວ່າຈາກບໍລິສັດແຫ່ງໃດກໍ່ຕາມ ອາດຈະໄດ້ຮັບການອະນຸມັດ ຫຼື ປະຕິເສດກໍ່ໄດ້ ແລະ ຍັງບໍ່ສາມາດກໍານົດໄລຍະເວລາທີ່ຊັດເຈນໄດ້ວ່າ ການພິຈາລະນາເອກສານຂອງບໍລິສັດແຕ່ລະແຫ່ງທີ່ສົ່ງມາຈະໃຊ້ເວລາດົນເທົ່າໃດ ແຕ່ຈະປະກາດແນວທາງປະຕິບັດ “ຊົ່ວຄາວ” ຢ່າງເປັນທາງການ ເພື່ອໃຫ້ທຸກຝ່າຍດໍາເນີນການ ພາຍໃນໄລຍະກາງເດືອນຕຸລາ ນີ້.
ຜູ້ສັນທັດກໍລະນີ ວິເຄາະວ່າ ຄໍາຖະແຫຼງຂອງ ທ່ານຣອສ ຍັງບໍ່ຊັດເຈນໃນປະເດັນສໍາຄັນ ແລະ ບໍ່ໄດ້ສ້າງ “ຄວາມໂລ່ງໃຈ” ໃຫ້ກັບຜູ້ປະກອບການຂອງອາເມຣິກາຫຼາຍເທົ່າທີ່ຄວນ ໃນຂະນະທີ່ ຍັງມີກະແສຂ່າວວ່າ ບໍລິສັດເທັກໂນໂລຢີລາຍໃຫຍ່ຫຼາຍແຫ່ງ ໂດຍສະເພາະທີ່ກ່ຽວຂ້ອງກັບອຸດສາຫະກໍາເຊມິຄອນດັກເຕີຮຽກຮ້ອງລັດຖະບານວໍຊິງຕັນຢ່າງໜັກ ເພື່ອການຜ່ອນຄາຍມາດຕະການຂວໍ້າບາດຫົວເຫວີ່ຍໃຫ້ໄດ້ຫຼາຍທີ່ສຸດ.
