ການເສຍຊີວິດຈາກອຸບັດເຫດຢູ່ລາວເຄີຍມີການສົມທຽບໃນວົງສົນທະນາຫຼິ້ນໆວ່າ ຮ້າຍແຮງກວ່າການວາງລະເບີດ ເພາະສະເລ່ຍແລ້ວຍອດຜູ້ຕາຍຢູ່ປະມານເດືອນລະ 100 ຄົນ, ເຈົ້າໜ້າທີ່ໄດ້ໃຫ້ຂໍ້ສະຫຼຸບວ່າຕົ້ນເຫດຂອງລົດຕຳກັນທີ່ຮຸນແຮງເຖິງຂັ້ນເສຍຊີວິດນັ້ນກໍ່ມາຈາກ 3 ຢ່າງຫຼັກໆຄືການດື່ມເມົາແລ້ວຂັບຂີ່, ຂີ່ລົດໄວເກີນ ແລະ ຜູ້ໃຊ້ລົດໃຊ້ຖະໜົນປະໝາດຂາດສະຕິ.
ການເກີດອຸບັດເຫດເປັນເລື່ອງທີ່ທຸກຄົນບໍ່ເພິ່ງປາຖະໜາ ແລະ ເປັນເຫດສຸດວິໄສ ແຕ່ທຸກຄົນສາມາດຊ່ວຍກັນໃຫ້ຫຼຸດຜ່ອນລົງໄດ້ ຢ່າງໜ້ອຍທີ່ສຸດຄືຫຼຸດຄວາມຮຸນແຮງຂອງອຸບັດເຫດ ເພາະເມື່ອມັນເກີດຂຶ້ນແລ້ວບໍ່ວ່ານ້ອຍ ຫຼື ໃຫຍ່ກໍ່ສົ່ງຜົນເສຍຫາຍທັງນັ້ນ ນັບທັງຊັບສິນ, ຂອງທີ່ມີຄ່າ ແຕ່ຍິ່ງຮ້າຍແຮງໄປກວ່ານັ້ນຄືການສູນເສຍສະມາຊິກຄອບຄົວໃດໜຶ່ງໄປຕະຫຼອດການ ເພາະສະນັ້ນທຸກໆຄົນຈົ່ງມີສະຕິໃນການຂັບຂີ່ຄ່ອຍໄປຄ່ອຍມາຮອດຊ້າດີກວ່າໄປບໍ່ເຖິງ ແລະ ບໍ່ໄດ້ໄປອີກເລີຍ!!!
ເຫັນຕົວເລກສະຕິຖິໃນ 6 ເດືອນຕົ້ນປີ 2019 ແລ້ວໜ້າຄິດ ທົ່ວປະເທດ ມີອຸບັດເຫດກີດຂຶ້ນ ທັງໝົດ 3.554 ຄັ້ງ, ພາຫະນະເປ່ເພເລັກໜ້ອຍ 2.987 ຄັນ, ສົມຄວນ 3.090 ຄັນ, ໃຊ້ການບໍ່ໄດ້ 202 ຄັນ, ຄົນໄດ້ຮັບບາດ ເຈັບເລັກໜ້ອຍ 2.476 ຄົນ, ສົມຄວນ 2.324 ຄົນ, ສາຫັດ 801 ຄົນ ແລະ ເສຍ ຊີວິດ 612 ຄົນນັ້ນກໍ່ຄືສະເລ່ຍທຸກໆເດືອນໃດມີຄົນລາວເສຍຊີວິດຍ້ອນອຸບັດເຫດ 100 ຄົນ.
ອີງຕາມບົດສະຫຼຸບຂອງກົມຕໍາຫຼວດ ຈະລາຈອນ ກົມໃຫຍ່ຕໍາຫຼວດ ກະຊວງ ປກສ ໃຫ້ຮູ້ວ່າ: ຈາກອຸບັດເຫດທີ່ເກີດຂຶ້ນທັງໝົດ ນະຄອນຫຼວງວຽງຈັນ ເສຍ ຊີວິດ 118 ຄົນ, ສະຫວັນນະເຂດ 61 ຄົນ, ວຽງຈັນ 59 ຄົນ, ໄຊຍະບູລີ 53 ຄົນ, ຈໍາປາສັກ 51 ຄົນ, ຫຼວງພະບາງ 47 ຄົນ, ບໍລິຄໍາໄຊ 34 ຄົນ, ສາລະວັນ 31 ຄົນ, ບໍ່ແກ້ວ 30 ຄົນ, ອຸດົມໄຊ 20 ຄົນ, ເຊກອງ 20 ຄົນ, ຫຼວງນໍ້າທາ 17 ຄົນ, ອັດຕະປື 16 ຄົນ, ຫົວພັນ 15 ຄົນ, ຄໍາມ່ວນ 15 ຄົນ, ຊຽງຂວາງ 14 ຄົນ, ໄຊສົມບູນ 7 ຄົນ ແລະ ຜົ້ງສາລີ 4 ຄົນ ມູນຄ່າຄວາມເສຍຫາຍ 58 ຕື້ກວ່າກີບ.
ໃນນີ້, ລົດຈັກຕໍາກັນ ເສຍຊີວິດ 264 ຄົນ, ລົດຈັກຕໍາຄົນຍ່າງ ເສຍຊີວິດ 23 ຄົນ, ລົດຈັກຕໍາສັດ ເສຍຊີວິດ 9 ຄົນ, ລົດຈັກຕໍາກໍາແພງ ເສຍຊີວິດ 3 ຄົນ, ລົດ ຈັກຕໍາລົດຈັກ ເສຍຊີວິດ 89 ຄົນ, ລົດ ຈັກຕໍາລົດບັນທຸກ ເສຍຊີວິດ 12 ຄົນ, ລົດຈັກລົ້ມເອງ ເສຍຊີວິດ 23 ຄົນ, ລົດ ຍົນຕໍາລົດຍົນ ເສຍຊີວິດ 31 ຄົນ, ລົດຍົນຕໍາລົດຖີບ ເສຍຊີວິດ 3 ຄົນ, ລົດ ຍົນຕໍາຄົນຍ່າງ ເສຍຊີວິດ 20 ຄົນ, ລົດ ຍົນປິ້ນເອງ ເສຍຊີວິດ 35 ຄົນ, ລົດ ບັນທຸກຕໍາລົດບັນທຸກ ເສຍຊີວິດ 5 ຄົນ ແລະອື່ນໆ ເສຍຊີວິດ 130 ກວ່າຄົນ.
ໃນ 6 ເດືອນຜ່ານມາ, ກົມຕໍາຫຼວດຈະລາຈອນ ຊີ້ນໍາພະແນກຕໍາຫຼວດຈະລາຈອນແຂວງໃນທົ່ວປະເທດ ເອົາໃຈໃສ່ອອກປະຕິບັດໜ້າທີ່ ແລະ ຕິດຕາມກວດກາວຽກງານຕາມພາລະບົດບາດໜ້າທີ່ເຫັນວ່າຍັງພົບຜູ້ຂັບຂີ່ບໍ່ປະຕິບັດກົດລະບຽບການຂັບຂີ່ເຊັ່ນ: ດື່ມສິ່ງມຶນເມົາຂັບຂີ່, ຂັບຂີ່ລົດໄວ, ປະໝາດຂາດສະຕິ ທັງໝົດນີ້ເປັນສາເຫດ ພາໃຫ້ເກີດອຸບັດເຫດ ແລະ ຄົນເສຍ ຊີວິດເປັນຈໍານວນຫຼວງຫຼາຍ.
