ນະຄອນຫຼວງປາຣີສ ທີ່ເປັນເຈົ້າພາບຈັດການປະຊຸມ ແລະ ເຊັນສັນຍາລົງນາມຂໍ້ຕົກລົງ ໃນການຕໍ່ສູ້ກັບພາວະໂລກຮ້ອນ ເມື່ອປີ 2015 ໄດ້ປະກາດ ເມື່ອວັນອັງຄານ ຜ່ານມາ ກ່ຽວກັບ ພາວະສຸກເສີນດ້ານສະພາບອາກາດ ຕໍ່ຈາກຫຼາຍເມືອງທົ່ວໂລກ ແລະ ສະພາຂອງຫຼາຍປະເທດ.
ສໍານັກຂ່າວເອເອັຟພີລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 9 ກໍລະກົດ ວ່າ ທ່ານນາງເຊເລຍ ໂອລເອລ ຮອງນາຍົກເທສະມົນຕີນະຄອນຫຼວງປະຣີສ ທີ່ມີໜ້າທີ່ຮັບຜິດຊອບດ້ານສິ່ງແວດລ້ອມ ກ່າວຕໍ່ທີ່ປະຊຸມສະພາເທສະບານ ວ່າ ນະຄອນຫຼວງປາຣີສ ປະກາດສະຖານະການສຸກເສີນດ້ານສະພາບອາກາດຄືກັບເມືອງອື່ນໆ ໂດຍຢໍ້າວ່າ ປາຣີສຈຳເປັນຕ້ອງຢຶດໝັ້ນໃນວັດຖຸປະສົງຂອງຂໍ້ຕົກລົງປີ 2015.
ທ່ານໂບລເອລ ກ່າວອີກວ່າ ສາລາວ່າການນະຄອນຫຼວງປາຣີສ ຈະສ້າງ “ວິທະຍາໄລສະພາບອາກາດ” ໂດຍມີເປົ້າໝາຍໃຫ້ຄວາມຮູ້ຄວາມເຂົ້າໃຈທີ່ດີກວ່າເກົ່າຕໍ່ເດັກ ແລະ ເຍົາວະຊົນ ລວມທັງປະຊາຊົນທົ່ວໄປກ່ຽວກັບບັນຫາ ແລະ ຜົນກະທົບຈາກການປ່ຽນແປງຂອງສະພາບອາກາດໂລກ ຫຼື ບັນຫາພາວະໂລກຮ້ອນ.
ກ່ອນການເລືອກຕັ້ງສະມາຊິກສະພາເທສະບານໃນປີໜ້າ ທ່ານນາງແອນ ຮິດັລໂກ ນາຍົກເທສະມົນຕີນະຄອນຫຼວງປາຣີສ ພະຍາຍາມຫາສຽງດ້ວຍການຍົກນະໂຍບາຍກ່ຽວກັບສິ່ງແວດລ້ອມ ເຊິ່ງເປັນປະເດັນວິຕົກອັນແທ້ຈິງຂອງຜູ້ມີສິດລົງຄະແນນສຽງຈໍານວນຫຼາຍ.
ສະພາອັງກິດກາຍເປັນອົງກອນທໍາອິດຂອງໂລກ ທີ່ປະກາດສະຖານະການສຸກເສີນສະພາບອາກາດ ທີ່ປະຊຸມອະນຸມັດມະຕິເຊີງສັນຍາລັກ ເມື່ອວັນທີ 1 ພຶດສະພາ ແລະ ສະພາປະເທດໄອແລນ ຜ່ານມະຕິແບບດຽວກັນ ເມື່ອວັນທີ 10 ພຶດສະພາ.
ຈາກຂໍ້ມູນຂອງກຸ່ມ NGO ໃນສະຫະລັດ The Climate Mobilization ທີ່ປະຊາສໍາພັນເພື່ອຊຸກດັນໃຫ້ທົ່ວໂລກປະກາດສະຖານະການສຸກເສີນໂລກຮ້ອນ ຫຼ້າສຸດມີເຈົ້າໜ້າທີ່ທ້ອງຖິ່ນ ແລະ ເມືອງຕ່າງໆທົ່ວໂລກປະກາດໄປແລ້ວ ປະມານ 650 ແຫ່ງ ລວມເຖິງມະຫານະຄອນນິວຢອກຂອງສະຫະລັດ ທີ່ປະກາດພາວະສຸກເສີນ ເມື່ອວັນທີ 26 ມິຖຸນາ ຜ່ານມາ ກາຍເປັນເມືອງຂະໜາດໃຫຍ່ທີ່ສຸດໃນໂລກທີ່ປະກາດ.
