ນັບແຕ່ທ້າຍເດືອນກັນຍາ ປີ 2018 ຫາ ທ້າຍເດືອນພຶດສະພາ 2019 ເຈົ້າໜ້າທີ່ໄດ້ດໍາເນີນມາດຕະການຕໍ່ຄົນຕ່າງປະເທດທີ່ລະເມີດກົດໝາຍ – ລະບຽບການ ສປປ ລາວ ຢູ່ນະຄອນຫຼວງວຽງຈັນ ຈຳນວນ 1 ພັນກວ່າຄົນ. ໃນນັ້ນ, ສັນຊາດຫວຽດນາມ 700 ກວ່າຄົນ.
ອີງຕາມການເປີດເຜີຍຂອງ ທ່ານ ພັນເອກ ຄຳພອນ ເທດພະວົງ ຮອງກອງບັນຊາການ ປກສ.ນວ ຕໍ່ກອງປະຊຸມການຈັດຕັ້ງປະຕິບັດ ແກ້ໄຂຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍຂອງ ສປປ ລາວ ຢູ່ນະຄອນຫຼວງວຽງຈັນ ເມື່ອທ້າຍອາທິດທີ່ຜ່ານມາ ວ່າ: ການແກ້ໄຂຄົນຕ່າງປະເທດຢູ່ນະຄອນຫຼວງວຽງຈັນ ເຊິ່ງໃນປີຜ່ານມາທາງກອງບັນຊາການປ້ອງກັນຄວາມສະຫງົບນະຄອນຫຼວງ ໄດ້ຊີ້ນໍາຫ້ອງສັນຕິບານ ແລະ ພະແນກວິຊາສະເພາະໃນການເຄື່ອນໄຫວວຽກງານຄຸ້ມຄອງຄົນຕ່າງປະເທດ ດັ່ງນີ້: ໂດຍອີງຕາມກົດໝາຍວ່າດ້ວຍການ ເຂົ້າ – ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ເລກທີ 59/ສພຊ ລົງວັນທີ 26 ທັນວາ 2014.
ການຈັດຕັ້ງຜັນຂະຫຍາຍແຜນແມ່ບົດເລກທີ 21/ປກສ ລົງວັນທີ 8 ມັງກອນ 2018 ວ່າດ້ວຍການຫັນກໍາລັງລົງກໍ່ສ້າງຮາກຖານການເມືອງຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍຢູ່ນະຄອນຫຼວງວຽງຈັນ.
ທັງເປັນການຈັດຕັ້ງປະຕິບັດແຜນການຂອງກົມໃຫຍ່ 502 ເລກທີ 420/502 ລົງວັນທີ 01 ສິງຫາ 2018 ການສືບຕໍ່ດໍາເນີນການລົງກໍ່ສ້າງຮາກຖານຢູ່ນະຄອນຫຼວງວຽງຈັນ ບາດກ້າວ II ( ບາດກ້າວແກ້ໄຂ ) ເຊິ່ງໄດ້ຈັດຕັ້ງປະຕິບັດມາແຕ່ເດືອນ 9 ປີ 2018 ເປັນຕົ້ນມາ ສາມາດແກ້ໄດ້ບັນດາປາກົດການຫຍໍ້ທໍ້ໃນຂົງເຂດຄົນຕ່າງປະເທດໃນ 2 ໄລຍະ ຄື: ໄລຍະທີ 1 ແມ່ນໄດ້ແຕ່ງຕັ້ງໜ່ວຍສະເພາະກິດແກ້ໄຂຄົນຕ່າງປະເທດ ໂດຍສົມທົບກັບກົມຕໍາຫຼວດຄຸ້ມຄອງຄົນຕ່າງປະເທດ ແລະ ກົມຕໍາຫຼວດກວດຄົນເຂົ້າ – ອອກເມືອງຂອງກະຊວງປ້ອງກັນຄວາມສະຫງົບ ແລະ ບັນດາເມືອງຈຸດສຸມ 6 ເມືອງ ໄດ້ດໍາເນີນມາດຕະການຕໍ່ຄົນຕ່າງປະເທດທີ່ລະເມີດກົດໝາຍ – ລະບຽບການ ແຕ່ວັນທີ 20 ກັນຍາ 2018 – ວັນທີ 30 ພຶດສະພາ 2019 ໄດ້ທັງໝົດ 1.142 ຄົນ ຍິງ 394 ຄົນ, ມີ 12 ສັນຊາດ ຄື: ສັນຊາດ ຫວຽດນາມ 738 ຄົນ ຍິງ 319 ຄົນ, ສັນຊາດ ຈີນ 316 ຄົນ ຍິງ 55 ຄົນ ແລະ ສັນຊາດອື່ນໆຈໍານວນໜຶ່ງ.
ໄລຍະທີ 2 ພາຍຫຼັງທາງກະຊວງໄດ້ມອບ – ໂອນໜ່ວຍສະເພາະກິດໃຫ້ນະຄອນຫຼວງສືບຕໍ່ ເຊິ່ງເລີ່ມຈັດຕັ້ງປະຕິບັດມາແຕ່ຕົ້ນເດືອນ 6 ມາເຖິງປັດຈຸບັນສາມາດກວດກາພົບເຫັນຄົນຕ່າງປະເທດລະເມີດກົດໝາຍ – ລະບຽບການ ແລະ ໄດ້ນໍາໃຊ້ມາດຕະການທາງກົດໝາຍ ແລະ ວິຊາສະເພາະໄດ້ຈໍານວນ 302 ຄົນ ຍິງ 112 ຄົນ, ມີ 3 ສັນຊາດ.
ທ່ານກ່າວຕໍ່ວ່າ: ການແກ້ໄຂກໍລະນີຕ່າງໆຈໍານວນ 1.444 ຄົນ ຍິງ 506 ຄົນ ໄດ້ຈັດສົ່ງກັບຄືນປະເທດເດີມ 28 ຄັ້ງ ມີ 402 ຄົນ ຍິງ 124 ຄົນ, ມີ 6 ສັນຊາດ; ສະເໜີເອົາເຂົ້າບັນຊີຫ້າມເຂົ້າ ສປປ ລາວ 339 ຄົນ ຍິງ 97 ຄົນ, ມີ 7 ສັນຊາດ ແລະ ( ກໍາລັງຈັດສົ່ງກັບຄືນປະເທດ 22 ຄົນ ສັນຊາດຫວຽດນາມ ).
ທ່ານ ພັນເອກ ຄຳພອນ ເທດພະວົງ ກ່າວຕື່ມວ່າ: ເຖິງຈະມີບັນດານິຕິກໍາເປັນບ່ອນອີງໃນທາງຈັດຕັ້ງປະຕິບັດກ່ຽວກັບການຄຸ້ມຄອງ ແລະ ແກ້ໄຂຕໍ່ການລະເມີດກົດໝາຍ – ລະບຽບການຂອງຄົນຕ່າງປະເທດ ແຕ່ການປະຕິບັດດ້ານກົດໝາຍຍັງບໍ່ທັນເປັນເອກະພາບ, ບໍ່ທັນເຂັ້ມງວດ ເເລະ ເດັດຂາດຕໍ່ບາງກໍລະນີຂອງການລະເມີດກົດໝາຍຂອງຄົນຕ່າງປະເທດ, ຄົນຕ່າງປະເທດຍັງມີການເຄື່ອນໄຫວຢູ່ ເຖິງວ່າໜ່ວຍສະເພາະກິດໄດ້ແກ້ໄຂແລ້ວ ຈັດສົ່ງຫຼາຍຄັ້ງແຕ່ຄົນຕ່າງປະເທດຍັງເຄື່ອນໄຫວລະເມີດກົດໝາຍ – ລະບຽບການຂອງ ສປປ ລາວ; ອໍານາດການປົກຄອງ ແລະ ເຈົ້າໜ້າທີ່ຢູ່ບາງບ່ອນຂອງບັນດາກອງຮ້ອຍຍັງປົກປິດຂໍ້ມູນສະຖິຕິ ແລະ ບຸກຄົນຕ່າງປະເທດທີ່ພັກເຊົາຢູ່ເຂດຮັບຜິດຊອບຂອງຕົນ; ຄົນຕ່າງປະເທດຍັງມີລັກສະນະດື້ດ້ານຕໍ່ລະບຽບກົດໝາຍສະແດງອອກ ຈໍານວນໜຶ່ງຖືກໜ່ວຍສະເພາະກິດໃຊ້ມາດຕະການທາງກົດໝາຍ ແລະ ວິຊາສະເພາະແລ້ວສົ່ງກັບຄືນປະເທດເດີມແລ້ວພັດກັບເຂົ້າມາລາວອີກ, ຄົນຕ່າງປະເທດຈໍານວນໜຶ່ງພາຍຫຼັງໜ່ວຍສະເພາະກິດມີມາດຕະການຕໍ່ໃຫ້ກັບຄືນປະເທດເດີມພັດບໍ່ກັບ, ຍັງໄປໝູນຢູ່ດ່ານສາກົນຂົວມິດຕະພາບລາວ – ໄທ ( 1 ) ແລ້ວກັບມາເຮັດວຽກຢູ່ນະຄອນຫຼວງວຽງຈັນຄືເກົ່າ.
ສ່ວນແຜນການໃນຕໍ່ໜ້າ ໂດຍປະຕິບັດຕາມມະຕິກອງປະຊຸມຮ່ວມລະຫວ່າງກະຊວງປ້ອງກັນຄວາມສະຫງົບ ກັບ ກະຊວງແຮງງານ ແລະ ສະຫວັດດີການສັງຄົມຄັ້ງວັນທີ 7 – 8 ມັງກອນ 2019 ກ່ຽວກັບແຜນສືບຕໍ່ແກ້ໄຂຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ ພວກເຮົາແມ່ນໄດ້ສືບຕໍ່ຈັດຕັ້ງປະຕິບັດມາໄດ້ 1 ເດືອນແລ້ວ ໂດຍຫັນເອົາກໍາລັງລົງປະຈໍາຢູ່ບັນດາເມືອງ ໂດຍສະເພາະ 6 ເມືອງຈຸດສຸມຂອງການລົງກໍ່ສ້າງຮາກຖານການເມືອງ ເພື່ອເລັ່ງໃສ່ແກ້ໄຂຄົນຕ່າງປະເທດຕາມຂອບເຂດການແບ່ງປັນ ໂດຍສະເພາະໃນກໍລະນີຊໍາລະສະສາງໃຫ້ໄດ້ຕາມຄາດໝາຍກໍານົດອອກ.
( ຂ່າວ: ສົມລົດ; ຮູບ: ວິລະສັກ )
