ເພື່ອເຮັດໃຫ້ ສປປ ລາວ ບັນລຸການສົ່ງອອກເຂົ້າໄປຍັງຕ່າງປະເທດໃຫ້ໄດ້ຕາມເປົ້າໝາຍທີ່ບັນລຸໄວ້ ກະຊວງກະສິກຳ ແລະ ປ່າໄມ້, ພະແນກກະສິກຳ ແລະ ປ່າໄມ້ໃນແຕ່ລະແຂວງແມ່ນມີຄວາມເອົາໃຈໃສ່ສຶກສາເຕັກນິກໃໝ່ໃນຂັ້ນຕອນການຜະລິດ ຫວັງຊ່ວຍຊາວກະສິກອນໃຫ້ປະຢັດແຮງງານ ແລະເວລາຫຼາຍຂຶ້ນການປູກເຂົ້າ, ການບົວລະບັດ ໂດຍການນຳໃຊ້ເຄື່ອງມືທີ່ທັນສະໄໝເຂົ້າໃນການຜະລິດ ສະເພາະນະຄອນຫຼວງວຽງຈັນ ໄດ້ມີການສາທິດການປູກເຂົ້າແບບໃຊ້ກົນຈັກ ໄດ້ປະຕິບັດຢູ່ 4 ເມືອງ ພ້ອມວາງຄາດໝາຍສູ້ຊົນປູກເຂົ້າເປັນສິນຄ້າໃຫ້ໄດ້ 11 ພັນເຮັກຕາ.
ວັນທີ 5 ກໍລະກົດ ຜ່ານມາ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ (ນວ) ສົມທົບກັບ ເມືອງໄຊທານີ ຈັດພິທີສາທິດການປູກເຂົ້າດ້ວຍກົນຈັກທີ່ທັນສະໄໝ ຂຶ້ນຢູ່ທີ່ ບ້ານໜອງໂນ ເມືອງໄຊທານີ ນວ ໂດຍການສະໜັບສະໜູນຂອງບໍລິສັດ ອິນຊີທອງຂາອອກ-ຂາເຂົ້າ ຈຳກັດຜູ້ດຽວ ໂດຍການເຂົ້າຮ່ວມຂອງທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ, ທ່ານ ໜູກີ ສີຫາລາດ ຮອງເຈົ້າເມືອງໄຊທານີ ພ້ອມດ້ວຍຫົວໜ້າຫ້ອງການກະສິກຳ ແລະ ປ່າໄມ້ເມືອງໄຊທານີ, ບັນດາຜູ້ຕາງໜ້າຈາກບໍລິສັດ ຕະຫຼອດຮອດປະຊາຊົນບ້ານໜອງໂນ ແລະ ພາກສ່ວນກ່ຽວຂ້ອງ.
ທ່ານ ຫົວໜ້າພະແນກກະສິກຳ ແລະ ປ່າໄມ້ ໄດ້ກ່າວວ່າ: ວຽກງານຊຸກຍູ້ການປູກເຂົ້າເປັນສິນຄ້າຕິດພັນກັບການນຳໃຊ້ກົນຈັກ ແລະ ເຕັກນິກອື່ນທີ່ເໝາະສົມເຂົ້າໃນການຜະລິດເຂົ້າ ເປັນຕົ້ນ ການກຽມດິນ, ປັກດຳ ແລະ ເກັບກ່ຽວ ກໍ່ເພື່ອຕອບສະໜອງນະໂຍບາຍຂອງພັກ ແລະ ລັດຖະບານ ໂດຍສະເພາະເປັນການສ້າງເງື່ອນໄຂ ໃນການສົ່ງອອກຂອງພາກສ່ວນທຸລະກິດລາວໄປຕ່າງປະເທດໃຫ້ໄດ້ທັງປະລິມານ ແລະ ຄຸນນະພາບ ຕາມເງື່ອນໄຂຂອງຕະຫຼາດ ໃຫ້ຫຼາຍຂຶ້ນຕາມມາດຕະການກະສິກຳທີ່ດີ ເຊັ່ນ: ການຈັດຕັ້ງກຸ່ມຜະລິດ ການຝຶກອົບຮົມເຕັກນິກ ການກວດກາຄຸນນະພາບ ການຂຶ້ນທະບຽນຟາມ ແລະສະເໜີຂໍການຢັ້ງຢືນ ໃນທົ່ວ ນະຄອນຫຼວງວຽງຈັນ ໂດຍໄດ້ຈັດຕັ້ງປະຕິບັດໃນ 4 ເມືອງ ມີ 5 ກຸ່ມມີ 146 ຄອບຄົວ ສູ້ຊົນປູກເຂົ້າເປັນສິນຄ້າໃຫ້ໄດ 11 ພັນເຮັກຕາ ຄາດຄະເນຜົນໄດ້ຮັບ 47.960 ໂຕນ.
ໃນນີ້, ແຕ່ລະເມືອງຈະໄດ້ສ້າງເປັນຈຸດສຸມຕົວແບບຂອງເມືອງໃນການຊຸກຍູ້ປູກເຂົ້າເປັນສິນຄ້າ ແລະ ບໍລິການກົນຈັກ ໂດຍການມີສ່ວນຮ່ວມຂອງພາກທຸລະກິດ ໂດຍສະເພາະບໍລິສັດອິນຊີທອງ ຮ່ວມກັນສາທິດ ການດຳນາດ້ວຍກົນຈັກ ໃນ 4 ເມືອງ ເມືອງລະ 1 ຈຸດ ໃນນັ້ນ ມີເມືອງຫາດຊາຍຟອງ, ໄຊທານີ, ນາຊາຍທອງ ແລະ ປາກງຶ່ມ ເພື່ອເຮັດໃຫ້ວຽກງານການຜະລິດກະສິກຳຫັນເປັນທັນສະໄໝ ໂດຍໃຫ້ເມືອງ ແລະ ບ້ານເປັນເຈົ້າການປຸກລະດົມຊາວກະສິກອນເຂົ້າຮ່ວມໃນການຈັດຕັ້ງປະຕິບັດ ໃນເນື້ອທີ່ການຜະລິດຂອງຕົນໃຫ້ເປັນຂະບວນກວ້າງຂວາງອອກ.
