ທີ່ຜ່ານມາການເຮັດໜັງສືຜ່ານແດນຂອງພໍ່ແມ່ພີ່ນ້ອງຈາກທົ່ວປະເທດຕ້ອງເສຍເງິນຫຼາຍຕໍ່ ນອກຈາກຄ່າເຮັດປື້ມແລ້ວຍັງມີຄ່າລົດຄ່າກິນນອນພັກເຊົາໝົດຫຼາຍກວ່າອີກເພາະຕ້ອງເດີນທາງມານະຄອນຫຼວງວຽງຈັນດ້ວຍຕົວເອງ, ບາດນີ້ແຂວງໄຊຍະບູລີມີສູນບໍລິການເຮັດໜັງສືຜ່ານແດນແລ້ວບໍ່ຈຳເປັນນັ່ງລົດເມຂ້າມຄືນ ຈ່າຍພຽງ 3 ແສນປາຍກໍ່ໄດ້ພັດສະປອດເປັນຂອງຕົນເອງ ບໍ່ຕ້ອງເສຍເວລາບໍ່ໄດ້ອິດເມື່ອຍຕື່ມເດີກລຸກເຊົ້າມາຕໍ່ຄີວອີກ!!!
ອີງຕາມການແຈ້ງການ ຂອງຫ້ອງການກະຊວງການຕ່າງປະເທດ ສະບັບເລກທີ 1801/ຫກ.ກກສ ນະຄອນຫຼວງວຽງຈັນ ລົງວັນທີ 12 ມິຖຸນາ 2019 ແລະ ອີງຕາມການຄົ້ນຄວ້າ ແລະ ການຕົກລົງຂອງຄະນະພະແນກການຕ່າງປະເທດ ແຂວງໄຊຍະບູລີ ຄັ້ງວັນທີ 14 ມິຖຸນາ 2019
ດັ່ງນັ້ນ, ພະແນກການຕ່າງປະເທດແຂວງໄຊຍະບູລີຂໍຖືເປັນກຽດແຈ້ງມາຍັງ ພະແນກການ, ອົງການ, ກົມກອງອ້ອມຂ້າງແຂວງ ແລະ ບັນດາເມືອງ 11 ເມືອງ ຂອງແຂວງໄຊຍະບູລີຊາບວ່າ: ກະຊວງການຕ່າງປະເທດຈະໄດ້ເປີດນຳໃຊ້ສູນຮັບຄຳຮ້ອງຂໍໜັງສືຜ່ານແດນທີ່ບ້ານນາໄຮ ເມືອງ ໄຊຍະບູລີ ແຂວງ ໄຊຍະບູລີ ໂດຍໄດ້ເປີດນຳໃຊ້ຢ່າງເປັນທາງການແລ້ວ ນັບແຕ່ວັນທີ 1 ກໍລະກົດ ເປັນຕົ້ນມາ.
ໂດຍຄ່າທຳນຽມ ແລະ ຄ່າການບໍລິການເຮັດໜັງສືຜ່ານແດນປະກອບມີ: ໜັງສືຜ່ານແດນທຳມະດາ (32 ໜ້າ) ລາຄາ 360.000 ກີບ; ໜັງສືຜ່ານແດນ ເອເລັກໂທຼນິກ (48 ໜ້າ) ລາຄາ 460.000 ກີບ. ນອກນີ້, ຍັງມີການກຳນົດຮັບໜັງສືຜ່ານແດນ ພາຍໃນ 10 ວັນລັດຖະການ, ຖ້າກໍລະນີຕ້ອງການດ່ວນ ພຽງແຕ່ຈ່າຍເພີ່ມ 150.000 ກີບ ແລະ ກຳນົດຮັບໜັງສືຜ່ານແດນພາຍໃນ 5 ວັນລັດຖະການ.
ສະນັ້ນ, ພະແນກການຕ່າງປະເທດຈຶ່ງແຈ້ງມາຍັງພະແນກການ, ອົງການ, ກົມກອງອ້ອມຂ້າງແຂວງ ແລະ ບັນດາເມືອງ 11 ເມືອງຂອງແຂວງໄຊຍະບູລີ ເພື່ອຊາບທົ່ວເຖິງກັນ!
ສ່ວນການຮັບໃຊ້ຄຳຮ້ອງຂໍເຮັດໜັງສືຜ່ານແດນຢູ່ບັນດາດ່ານສາກົນພາຍໃນແຂວງແມ່ນຢຸຕິການບໍລິການ, ບັນດາທ່ານ, ພະນັກງານ, ທະຫານ, ຕຳຫຼວດ ຕະຫຼອດຮອດພີ່ນ້ອງພໍ່ແມ່ປະຊາຊົນພາຍໃນແຂວງໄຊຍະບູລີ ແລະ ບັນດາແຂວງໃກ້ຄຽງໃຫ້ມາຮັບບໍລິການຂໍເຮັດໜັງສືຜ່ານແດນຢູ່ສູນບໍລິການທີ່ບ້ານນາໄຮ, ເມືອງໄຊຍະບູລີ, ແຂວງໄຊຍະບູລີ ເທົ່ານັ້ນ.
