ກາຍເປັນປະເດັນທີ່ສັງຄົມໃຫ້ຄວາມສົນໃຈເປັນຢ່າງຍິ່ງ ກໍລະນີທີ່ມີສື່ອອນລາຍ ໄດ້ໂພສຮູບພາບປ້າຍຊື່ຖະໜົນຢູ່ ເຂດເສດຖະກິດສະເພາະ (ບຶງທາດຫຼວງ ) ນະຄອນຫຼວງວຽງຈັນ, ທັນທີທີ່ມີປ້າຍເຫຼົ່ານັ້ນຕັ້ງຂຶ້ນ ຄຳຖາມຂອງສັງຄົມກໍ່ຕາມມາຫຼວງຫຼາຍ ແລະ ບໍ່ສ້າງສັງສັນເທົ່າໃດ ເຊິ່ງຄວາມຈິງແລ້ວບໍ່ມີພຽງໂຄງການດຽວນີ້ດອກທີ່ເອົາແຂວງຕ່າງໆຂອງປະເທດລາວມາຕັ້ງເປັນຊື່ ຫາກທີ່ຜ່ານມາບັນດາໂຮງແຮມຫຼູໆກໍ່ໄດ້ຕັ້ງຊື່ຫ້ອງປະຊຸມຫ້ອງຮັບແຂກປະມານວ່າ ຫ້ອງຈຳປາສັກ, ຫຼວງພະບາງ, ຊຽງຂວາງ…. ຕ່າງແຕ່ວ່າປະຊາຊົນສ່ວນໃຫຍ່ບໍ່ເຄີຍເຫັນຈິ່ງຄາໃຈຢູ່ຢາກຮູ້ເຫດຜົນ, ສ່ວນວ່າໂຄງການບຶງທາດຫຼວງເດເພິ່ນຕັ້ງຂຶ້ນຍ້ອຍສາເຫດໃດໄປເບິ່ງຄຳຕອບພ້ອມໆກັນ.
ທ່ານ ສົມກຽດ ສີຫາລາດ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ນວ) ໃຫ້ສຳພາດບໍ່ດົນຜ່ານມາວ່າ: ເຂດເສດຖະກິດບຶງທາດຫຼວງ ຜູ້ພັດທະນາໄດ້ສ້າງເສັ້ນທາງຫຼາຍເສັ້ນຄື: ຖະໜົນເລກ 1 ແຕ່ສາມແຍກໂພນທັນ-ໂນນຫວາຍເອີ້ນວ່າ ຖະໜົນທາດຫຼວງ ກວ້າງ 36 ແມັດ ຖະໜົນເລກ 2 ອ້ອມໜອງນ້ຳເນື້ອທີ່ 50 ເຮັກຕາ ກວ້າງ 24 ແມັດ ນອກນີ້ຍັງມີຖະໜົນ 38 ເສັ້ນ ກວ້າງ 12 ແມັດ ລວງຍາວ 30 ກວ່າກິໂລແມັດ.
ເຊິ່ງຖະໜົນແຕ່ລະເສັ້ນໄດ້ໃສ່ຊື່ແຕ່ລະແຂວງ ແລະ ເມືອງທີ່ມີຊື່ສຽງຈົນຄົບທຸກເສັ້ນ ເຖິງວ່າຖະໜົນຫຼາຍເສັ້ນຍັງສ້າງບໍ່ສຳເລັດ ແຕ່ກໍໄດ້ຕິດຕັ້ງປ້າຍບອກຊື່ ແລະ ຜ່ານການຕິດຕັ້ງຊື່ຖະໜົນ ສາມາດສ້າງຄວາມສົນໃຈໃຫ້ສັງຄົມຫຼາຍສົມຄວນ ໂດຍສະເພາະສື່ສັງຄົມອອນລາຍ ທີ່ເວົ້າແບບບໍ່ສ້າງສັນ.
ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນຊີ້ແຈງວ່າ: ເຫດຜົນທີ່ເອົາຊື່ຂອງແຕ່ລະແຂວງ ມາເປັນຊື່ຖະໜົນຢູ່ເຂດດັ່ງກ່າວແມ່ນອີງຕາມບົດຮຽນ ປະສົບການຕົວຈິງຢູ່ຕ່າງປະເທດທີ່ນຳເອົາຊື່ຂອງແຂວງ, ນະຄອນ, ເມືອງ ສະຖານທີ່ທ່ອງທ່ຽວທີ່ມີຊື່ສຽງມາຕັ້ງເປັນຊື່ຖະໜົນ ເພື່ອໂຄສະນາໃຫ້ເປັນທີ່ຮູ້ຈັກຂອງຄົນທີ່ໄດ້ມານຳໃຊ້ຖະໜົນ ເຊິ່ງປະເທດລາວບາງເຂດບາງບ້ານ ກໍເອົາຊື່ບ້ານເປັນຊື່ຖະໜົນ ເພື່ອໃຫ້ປະຊາຊົນຄົນລາວທົ່ວທຸກແຂວງທີ່ມາພັກອາໄສ ມາທ່ຽວຊົມໃນເຂດເສດຖະກິດສະເພາະບຶງທາດຫຼວງ ໃຫ້ມີຄວາມຮູ້ສຶກໃກ້ຊິດອົບອຸ່ນເປັນກັນເອງ ເໝືອນກັບໄດ້ຢູ່ບ້ານເກີດຕົວເອງ ອີງຕາມລັກສະນະ ແລະ ຈຸດພິເສດຂອງຕອນດິນທີ່ມີລັກສະນະຍາວແຕ່ເໜືອຮອດໃຕ້.
ເຂດເສດຖະກິດບຶງທາດຫຼວງ ໄດ້ອອກແບບໃຫ້ມີຕາໜ່າງຂອງຖະໜົນຍາວ 30 ກວ່າກິໂລແມັດ ເຊິ່ງມີຄວາມກວ້າງ-ແຄບຫຼາຍປະເພດ ເພື່ອຮອງຮັບການສັນຈອນບໍ່ໃຫ້ແອອັດໃນອະນາຄົດ ເມື່ອມີຖະໜົນຫຼາຍເສັ້ນ ແລະ ເຮັດໃຫ້ການຕັ້ງຊື່ບໍ່ສັບສົນ ຈຶ່ງໄດ້ຊອກຫາຄຳສັບຕ່າງໆທີ່ນອນຢູ່ໃນໝວດກຽວກັນ ຫົວຂໍ້ດຽວກັນ ມີຄວາມໝາຍດີ ບໍ່ສັບສົນ ຈຶ່ງ່າຍ ມີສ່ວນຊ່ວຍໃນການໂຄສະນາ ແລະ ອື່ນໆ.
ອີງຕາມລັກສະນະຈຸດພິເສດ ແລະ ບົດຮຽນຕົວຈິງດັ່ງກ່າວ ຈຶ່ງພາໃຫ້ເກີດມີແນວຄວາມຄິດເອົາຊື່ແຂວງ ເມືອງ ແລະ ຊື່ສະຖານທີ່ທີ່ມີຊື່ສຽງຕ່າງໆ ມາຕັ້ງເປັນຊື່ຂອງຖະໜົນ ເພື່ອໃຫ້ຈື່ງ່າຍ ທັງເປັນການເຜີຍແຜ່ໃຫ້ຊາວຕ່າງປະເທດໃຫ້ຮູ້ຈັກຊື່ແຂວງ ເມືອງ ແລະ ສະຖານທີ່ທ່ອງທ່ຽວຕ່າງໆໄປໃນຕົວ ສັງລວມຖະໜົນ 38 ເສັ້ນທີ່ລັດຖະບານໄດ້ຮັບຮອງແຜນແມ່ບົດ ຕ້ອງໄດ້ມີຊື່ສະຖານທີ່ຕ່າງໆ ຫຼື ເມືອງທີ່ມີບົດບາດ ເພາະ ສປປ ລາວ ມີ 18 ແຂວງ ແຕ່ເສັ້ນທາງມີ 38 ເສັ້ນ ຈຶ່ງຕ້ອງໄດ້ໃສ່ຊື່ເມືອງຕ່າງໆທີ່ສຳຄັນໃນລາວຕື່ມອີກ.
ຖືວ່າການໃສ່ຊື່ຖະໜົນຢູ່ບຶງທາດຫຼວງນີ້ ແມ່ນເຮັດຕາມລະບຽບການຕາມແຜນແມ່ບົດທີ່ລັດຖະບານລາວໄດ້ຮັບຮອງ ເປັນຕົ້ນກົດໝາຍວ່າດ້ວຍການສົ່ງເສີມການລົງທຶນ ດຳລັດວ່າດ້ວຍເຂດເສດຖະກິດພິເສດ ຂໍ້ຕົກລົງວ່າດ້ວຍການແຕ່ງຕັ້ງ ແລະ ການເຄື່ອນໄຫວຂອງຄະນະຄຸ້ມຄອງເຂດເສດຖະກິດພິເສດແຂວງ ແລະ ນະຄອນຫຼວງວຽງຈັນ ແລະ ນິຕິກຳອື່ນໆ. ນອກນີ້, ຍັງອີງຕາມການເຫັນດີຂອງພາກສ່ວນກ່ຽວຂ້ອງຂອງສູນກາງ ແລະ ນວ ໂດຍສະເພາະພະແນກ ກໍຄືກະຊວງໂຍທາທິການ ແລະ ຂົນສົ່ງ.
