ຜູ້ນໍາຍີ່ປຸ່ນ ຮຽກຮ້ອງຜູ້ນໍາໂລກຢຶດຖືການຄ້າພະຫຸພາຄີ

33

ຜູ້ນໍາຍີ່ປຸ່ນ ຮຽກຮ້ອງໃຫ້ຜູ້ນໍາໂລກສະແຫວງຫາຜົນປະໂຫຍດຮ່ວມກັນ ແລະ ເນັ້ນຢໍ້າເຖິງຄວາມຈໍາເປັນຂອງການມີການຄ້າເສລີ, ເປັນທໍາ ແລະ ບໍ່ເລືອກປະຕິບັດ ເຊິ່ງຖືເປັນການອັດກອງປະຊຸມ ຈີ 20 ເມື່ອທ້າຍອາທິດທີ່ຜ່ານມາ.

ທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນ ຖືໂອກາດປິດກອງປະຊຸມ       ຈີ 20 ເຊິ່ງໄຂຂຶ້ນໃນເມືອງໂອຊາກາ ຮຽກຮ້ອງໃຫ້ຜູ້ນໍາໂລກສະແຫວງຫາຜົນປະໂຫຍດຮ່ວມກັນ ແລະ ຫວັງທີ່ຈະເດີນໜ້າພັດທະນາເສດຖະກິດໂລກ.

ນອກຈາກນີ້, ຜູ້ນໍາຍີ່ປຸ່ນ ຍັງລະບຸວ່າຜູ້ນໍາ ຈີ 20 ຢືນຢັນຈະແຈ້ງເຖິງຄວາມຈໍາເປັນຂອງການມີນະໂຍບາຍທາງການຄ້າທີ່ເສລີ, ເປັນທໍາ ແລະ ບໍ່ເລືອກປະຕິບັດ ໂດຍກຸ່ມ ຈີ 20 ເຫັນດີໃນຫຼັກການພື້ນຖານທີ່ສົ່ງເສີມລະບົບການຄ້າເສລີ ແລະ ຕະຫຼາດທີ່ເປີດກວ້າງສໍາລັບທຸກປະເທດ.

ຜູ້ນໍາ ຈີ 20 ມີຄວາມເຫັນຮ່ວມກັນວ່າການຂະຫຍາຍຕົວທາງເສດຖະກິດທົ່ວໂລກຍັງຊັກຊ້າ ແລະ ສ່ຽງຕໍ່ການງຽບ      ເຫງົາ. ຂະນະທີ່ຄວາມເຄັ່ງຕຶງທາງການຄ້າ ແລະ ການເມືອງໂລກກັບທະວີຄວາມຮ້າຍແຮງຫຼາຍຂຶ້ນ.

ດ້ານຜູ້ນໍາ ອາເມຣິກາ ປະກາດວ່າ: ອາເມຣິກາ ຈະບໍ່ຂຶ້ນພາສີສິນຄ້ານໍາເຂົ້າຈາກຈີນເພີ່ມຕື່ມລະຫວ່າງການເຈລະຈາ ແຕ່ຍັງບໍ່ຍົກເລີກນະໂຍບາຍທາງພາສີທີ່ມີການບັງຄັບໃຊ້ແລ້ວ.

ຂະນະທີ່ກະຊວງການຕ່າງປະເທດຈີນ ໃຫ້ຮູ້ວ່າ: ຜູ້ນໍາຈີນ ຫວັງວ່າ ອາເມຣິກາ ຈະປະຕິບັດກັບບໍລິສັດຂອງຈີນ ຢ່າງເປັນທໍາ ແລະ ຢືນຢັນວ່າຈີນ ຕ້ອງປົກປ້ອງຜົນປະໂຫຍດຂອງປະເທດ.