ຫຼາຍປະເທດຂອງທະວີບເອີຣົບຍັງຢູ່ພາຍໃຕ້ອິດທິພົນຂອງຄື້ນຄວາມຮ້ອນ ເຊິ່ງຍັງແຜ່ປົກຄຸມໄປທົ່ວ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 3 ຄົນ ແລະ ເກີດໄຟປ່າໃນສະເປນດ້ວຍ.
ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອາທິດ ທີ 30 ມິຖຸນາ ວ່າ ລາຍງານໂດຍອົງການອຸຕຸນິຍົມວິທະຍາໂລກ (WMO: World Meteorological Organization) ເຊິ່ງມີສໍານັກງານໃຫຍ່ຕັ້ງຢູ່ເມືອງເຈນີວາ ປະເທດສະວິດເຊີແລນ ເຜີຍແຜ່ ເມື່ອວັນເສົາ ລະບຸວ່າ ປີ 2019 ມີແນວໂນ້ມເປັນອີກປີໜຶ່ງ ທີ່ໂລກຕ້ອງຜະເຊີນກັບສະພາບອາກາດຮ້ອນທີ່ສຸດ ແລະ ໄລຍະລະຫວ່າງປີ 2015 – 2019 ມີຄວາມເປັນໄປໄດ້ສູງທີ່ຈະເປັນໄລຍະເວລາອາກາດຮ້ອນທີ່ສຸດຕໍ່ເນື່ອງ 5 ປີ ໂດຍລາຍງານລະບຸດ້ວຍວ່າ ອິດທິພົນຂອງຄື້ນຄວາມຮ້ອນທີ່ກໍາລັງແຜ່ປົກຄຸມພື້ນທີ່ສ່ວນໃຫຍ່ຂອງທະວີບເອີຣົບໃນຕອນນີ້ ມີສາເຫດຊັດເຈນມາຈາກພາວະເຮືອນແກ້ວ.
ຂະນະທີ່ສໍານັກງານອຸຕຸນິຍົມວິະຍາແຫ່ງຊາດຝຣັ່ງ (METEO FRANCE) ລາຍງານວ່າ ອຸນຫະພູມສະເລ່ຍທົ່ວປະເທດເລິ່ມຫຼຸດລົງແລ້ວ ຫຼັງເຄີຍສູງເຖິງ 45,9 ອົງສາ ເມື່ອວັນສຸກ ຜ່ານມາ ເປັນໄລຍະທີ່ຮ້ອນເປັນປະຫວັດການ ທໍາລາຍສະຖິຕິ 44,1 ອົງສາ ເມື່ອປີ 2003 ເຊິ່ງໃນປີນັ້ນ ມີຜູ້ເສຍຊີວິດຈາກສະພາບອາກາດຮ້ອນຫຼາຍ ປະມານ 15.000 ຄົນ ສະເພາະໃນຝຣັ່ງ. ຢ່າງໃດກໍ່ຕາມ, ເມເຕໂອ ຍັງເຕືອນວ່າ ພື້ນທີ່ຫຼາຍແຫ່ງໃນປະເທດຍັງມີຄວາມສ່ຽງທີ່ຈະຜະເຊີນກັບອຸນຫະພູມຮ້ອນສູງ ລະຫວ່າງ 40 – 45 ອົງສາ ໃນອາທິດນີ້ ແລະ ຢໍ້າເຕືອນປະຊາຊົນເລື່ອງການເຮັດກິດຈະກໍາກາງແຈ້ງ ຫຼັງມີລາຍງານຜູ້ເສຍຊີວິດ ຢ່າງໜ້ອຍ 1 ຄົນ ຈາກການຂີ່ລົດຖີບກາງແສງແດດ.
ດ້ານສະພາບອາກາດໃນປະເທດສະເປນຮ້ອນກາຍ 43 ອົງສາ ຕໍ່ເນື່ອງຕັ້ງແຕ່ວັນສຸກ ສົ່ງຜົນໃຫ້ເກີດໄຟປ່າຂອບເຂດນ້ອຍ ຢ່າງໜ້ອຍ 2 ແຫ່ງ ໃນພາກເໜືອ ແລະ ພາກກາງຂອງປະເທດ. ທັງນີ້ ໃນສະເປນມີລາຍງານການພົບຜູ້ເສຍຊີວິດຢ່າງໜ້ອຍ 2 ຄົນ ຈາກອິດທິພົນຂອງຄື້ນຄວາມຮ້ອນເປັນຊາຍຊະລາ ອາຍຸ 93 ປີ ທີ່ເມືອງບາຢາໂດລິດ ທາງຕາເວັນຕົກສຽງເໜືອ ແລະ ໄວລຸ້ນ ອາຍຸ 17 ປີ ທີ່ເມືອງກໍໂດບາ ທາງພາກໃຕ້ຂອງປະເທດ.
