ວັນທີ 27 ມິຖຸນາ 2019 ໄດ້ມີພິທີຖະແຫຼງຂ່າວເປີດສະມາຄົມນໍ້າໃຈຊາວບ້ານ ທີ່ສູນຝຶກອົບຮົມສູນກາງແນວລາວສ້າງຊາດ ນະຄອນຫຼວງວຽງຈັນ ຮ່ວມເປັນປະທານຂອງ ທ່ານ ສຸກກະເສີມ ໂພທິສານ ປະທານສະມາຄົມນ້ຳໃຈຊາວບ້ານ, ທ່ານ ນາງ ມີນາວັນ ພົນເສນາ ອຳນວຍການສະມາຄົມນ້ຳໃຈຊາວບ້ານ ພ້ອມດ້ວຍບັນດາພາກສ່ວນກ່ຽວຂ້ອງ ແລະ ຫົວໜ່ວຍທຸລະກິດທີ່ໃຫ້ການສະໜັບສະໜູນ.
ທ່ານ ສຸກກະເສີມ ໂພທິສານ ໄດ້ກ່າວວ່າ: ສະມາຄົມນ້ຳໃຈຊາວບ້ານ ສ້າງຕັ້ງຂຶ້ນໂດຍໄດ້ຮັບອະນຸຍາດຕາມຂໍ້ຕົກລົງຂອງ ກະຊວງພາຍໃນ ສະບັບເລກທີ 168/ພນ ລົງວັນທີ 4 ເມສາ 2019 ເພື່ອໃຫ້ເຄື່ອນໄຫວຊຸກຍູ້ສົ່ງເສີມກໍາລັງແຮງຂອງສັງຄົມທີ່ບໍ່ຫວັງຜົນກຳໄລ ແລະ ປະກອບສ່ວນສ້າງຂະບວນພັດທະນາເສດຖະກິດ – ສັງຄົມໃນທົ່ວປະເທດຢ່າງຖືກຕ້ອງຕາມລະບຽບກົດໝາຍ ໂດຍເນັ້ນເອົາ 5 ຄໍາຂວັນປະຈໍາໃຈທີ່ເປັນແສງສະຫວ່າງເຍືອງທາງໃນການປະຕິບັດໜ້າທີ່ວຽກງານຂອງສະມາຄົມ ຄື: ຄວາມເມດຕາກະລຸນາ, ກຽດສັກສີ, ຄວາມສະເໝີພາບ,ການມີສ່ວນຮ່ວມ, ຄວາມຊື່ສັດ ແລະ ຄວາມຮັບຜິດຊອບ.
ສຳລັບເປົ້າໝາຍຫຼັກຂອງໂຄງການແມ່ນເພື່ອເຮັດໃຫ້ເດັກນ້ອຍ – ແມ່ຍິງ ເຂົ້າໃຈເຖິງສິດພື້ນຖານການສຶກສາ ແລະ ການປົກປ້ອງຈາກຄວາມຮຸນແຮງໃນທຸກຮູບແບບລວມທັງການຄ້າມະນຸດ. ນອກຈາກນີ້, ຍັງມີບາງໂຄງການທີ່ກໍາລັງຈັດຕັ້ງປະຕິບັດ ດັ່ງນີ້:
ໂຄງການປັບປຸງຄຸນນະພາບການສຶກສາ ເພື່ອການພັດທະນາທີ່ຍືນຍົງທີ່ແຂວງບໍ່ແກ້ວ ໂດຍມີເປົ້າໝາຍເປັນນັກຮຽນຊົນເຜົ່າຊັ້ນປະຖົມ 9 ໂຮງຮຽນ ປະມານ 2.000 ຄົນ. ໃນນັ້ນ, ມີເດັກຍິງຢ່າງຕໍ່າ 1.050 ຄົນ, ກໍານົດໂຄງການ 3 ປີ, ຄາດຄະເນທຶນທີ່ຕ້ອງການ 3 ແສນໂດລາສະຫະລັດ.
ໂຄງການສົ່ງເສີມການເຂົ້າເຖິງການສຶກສາຂັ້ນພື້ນຖານທີ່ແຂວງຫຼວງນໍ້າທາ ໂດຍມີເປົ້າໝາຍຄືນັກຮຽນດ້ອຍໂອກາດຈົບຊັ້ນປະຖົມໄດ້ຮັບທຶນຮຽນຕໍ່ຊັ້ນມັດທະຍົມຢ່າງຕໍ່າ 45 ຄົນ. ໃນນັ້ນ, ມີເດັກຍິງ 85%, ກຳນົດໂຄງການ 5 ປີ, ຄາດຄະເນທຶນທີ່ຕ້ອງການ 60 ພັນໂດລາສະຫະລັດ.
ໂຄງການສົ່ງເສີມການສ້າງໂຮງຮຽນສີຂຽວຢູ່ພາກເໜືອ ເປົ້າໝາຍແມ່ນເດັກຊັ້ນປະຖົມຢ່າງຕໍ່າ 1.500 ຄົນ. ໃນນັ້ນ, ມີເດັກຍິງ 50% ແລະ ພໍ່ແມ່ນັກຮຽນອີກ 1.500 ຄົນ, ກຳນົດໂຄງການ 5 ປີ, ຄາດຄະເນທຶນທີ່ຕ້ອງການ 75 ພັນໂດລາສະຫະລັດ.
ໂຄງການສົ່ງເສີມການປົກປ້ອງການຖືພາກ່ອນໄວອັນຄວນ ເປົ້າໝາຍແມ່ນນັກຮຽນຊັ້ນມັດທະຍົມ 4 ໂຮງຮຽນໃນເຂດພາກເໜືອຢ່າງຕໍ່າ 200 ຄົນ. ໃນນັ້ນ, ເດັກຍິງ 65%, ກໍານົດໂຄງການ 3 ປີ, ຄາດຄະເນທຶນທີ່ຕ້ອງການ 3 ແສນໂດລາສະຫະລັດ.
ໂຄງການປ້ອງກັນຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຢູ່ນະຄອນຫຼວງວຽງຈັນ ແລະ ເຂດພາກເໜືອ ເປົ້າໝາຍແມ່ນ 5 ໂຮງຮຽນ ແລະ 10 ບ້ານ ທັງຢູ່ນະຄອນຫຼວງວຽງຈັນ ແລະ ເຂດພາກເໜືອ ລວມມີຊາວໜຸ່ມທັງໝົດປະມານ 800 ຄົນ. ໃນນັ້ນ, ມີແມ່ຍິງ 50%, ກຳນົດໂຄງການ 5 ປີ, ຄາດຄະເນທຶນທີ່ຕ້ອງການ 6 ແສນໂດລາສະຫະລັດ.
( ຂ່າວ: ທິບອຸສາ, ຮູບ: ສຸກສະຫວັນ )
