ນັກທຸລະກິດຈາກ ອິນໂດເນເຊຍ ມີ ຄວາມສົນໃຈຢາກເຂົ້າມາລົງທຶນປູກອ້ອຍ ພ້ອມທັງສ້າງໂຮງງານຜະລິດນໍ້າຕານເພື່ອສົ່ງກັບຄືນປະເທດ. ນອກຈາກນີ້, ຍັງສົນໃຈໃນວຽກງານການສົ່ງເສີມການປູກເຂົ້າເພື່ອສົ່ງອອກຢູ່ ແຂວງສະຫວັນນະເຂດ ແລະ ຄໍາມ່ວນ ນໍາອີກ.
ວັນທີ 25 ມິຖຸນາ 2019 ທີ່ກະຊວງກະສິກໍາ ແລະ ປ່າໄມ້, ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ຕ້ອນຮັບການເຂົ້າຢ້ຽມຢາມຂອງ ທ່ານ ນາງ ລິນີ ໂຊມາໂນ ລັດຖະມົນຕີກະຊວງລັດວິສາຫະກິດແຫ່ງ ສ.ອິນໂດເນເຊຍ ໂດຍມີຜູ້ແທນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ໃນໂອກາດການພົບປະທັງສອງຝ່າຍໄດ້ປຶກສາຫາລືຄວາມເປັນໄປໄດ້ ກ່ຽວກັບວຽກງານການຮ່ວມມືດ້ານລັດວິສາຫະກິດຂອງທັງສອງປະເທດ ລະຫວ່າງ ສປປ ລາວ ແລະ ສ.ອິນໂດເນເຊຍ ເຊິ່ງຝ່າຍ ອິນໂດເນເຊຍ ມີຄວາມສົນໃຈຢາກເຂົ້າມາລົງທຶນປູກອ້ອຍ ພ້ອມທັງສ້າງໂຮງງານຜະລິດນໍ້າຕານເພື່ອສົ່ງກັບໄປ ອິນໂດເນເຊຍ. ນອກຈາກນີ້, ກໍຍັງສົນໃຈໃນວຽກງານການສົ່ງເສີມການປູກເຂົ້າເພື່ອສົ່ງອອກຢູ່ແຂວງສະຫວັນນະເຂດ ແລະ ຄໍາມ່ວນ ນໍາອີກ.
ໃນໂອກາດດຽວກັນ, ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ການພົບປະໃນຄັ້ງນີ້ ທີ່ເຫັນໄດ້ວ່າມີຄວາມຕ້ອງການເຂົ້າມາລົງທຶນຫຼາຍດ້ານ ພ້ອມທັງສະເໜີໃຫ້ ສ.ອິນໂດເນເຊຍ ຊ່ວຍສະໜອງແນວພັນເຂົ້າທີ່ມີປະສິດທິພາບ ແລະ ໃຫ້ມີການສືບຕໍ່ຂອດການຮ່ວມມື 2 ຝ່າຍ ທາງດ້ານຂະແໜງການກະສິກໍາ ແລະ ປ່າໄມ້ ລະຫວ່າງ ສປປ ລາວ ແລະ ສ.ອິນໂດເນເຊຍ ໃຫ້ນັບມື້ຍິ່ງກວ້າງ ຂວາງໃນຕໍ່ໜ້າ.
( ຂ່າວ: ເອຢິບ, ຂໍ້ມູນ: ສອນເພັດ )
