ແຂວງຈຳປາສັກ ພົບຜູ້ຕິດເຊື້ອໄຂ້ຍຸງລາຍ 2.000 ກວ່າກໍລະນີ, ເສຍຊີວິດແລ້ວ 5 ກໍລະນີ, ຖ້າທຽບໃສ່ປີຜ່ານມາເພີ່ມຂຶ້ນເທົ່າຕົວ.
ທ່ານ ດຣ. ຣັດສະໝີ ສີພັນ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງຈຳປາສັກ ໃຫ້ຮູ້ວ່າ: ນັບແຕ່ 1 ມັງກອນ 2019 ຫາ 18 ມິຖຸນາ 2019 ພົບຜູ້ຕິດເຊື້ອໄຂ້ຍຸງລາຍ 2.032 ກໍລະນີ ເສຍຊີວິດ 05 ກໍລະນີ, ຖ້າທຽບໃສ່ຜູ້ຕິດເຊື້ອໄຂ້ຍຸງລາຍໝົດປີ 2018 ມີ 1.022 ກໍລະນີ ເສຍຊີວິດ 2 ກໍລະນີ.
ຜ່ານການລາຍງານຄົນເຈັບພະຍາດໄຂ້ຍຸງລາຍໃນ 10 ເມືອງ ມີດັ່ງນີ້: ເມືອງຈໍາປາສັກ 424 ກໍລະນີ, ເມືອງໂພນທອງ 372 ກໍລະນີ ເສຍຊີວິດ 2 ກໍລະນີ, ເມືອງມູນລະປາໂມກ 322 ກໍລະນີ, ເມືອງຊະນະສົມບູນ 218 ກໍລະນີ, ເມືອງສຸຂຸມາ 176 ກໍລະນີ, ເມືອງປາກເຊ 173 ກໍລະນີ ເສຍຊີວິດ 1 ກໍລະນີ, ເມືອງບາຈຽງ 128 ກໍລະນີ, ເມືອງໂຂງ 118 ກໍລະນີ ເສຍຊີວິດ 1 ກໍລະນີ, ເມືອງປະທຸມພອນ 84 ກໍລະນີ ເສຍຊີວິດ 1 ກໍລະນີ ແລະ ເມືອງປາກຊ່ອງ 17 ກໍລະນີ.
ຈາກການປະເມີນຄວາມສ່ຽງເຫັນໄດ້ວ່າຍັງຈະເກີດການລະບາດໃຫຍ່ ຂອງພະຍາດໄຂ້ຍຸງລາຍ ໂດຍອີງຕາມກໍລະນີລາຍງານແມ່ນມີຕົວເລກສູງຂຶ້ນເລື້ອຍໆ ເພາະມີຫຼາຍບ້ານທີ່ໄດ້ເຮັດມາດຕະການໂຕ້ຕອບໄປແລ້ວແຕ່ຍັງພົບວ່າມີຜູ້ຕິດເຊື້ອພະຍາດດັ່ງກ່າວຢູ່.
ສ່ວນມາດຕະການທີ່ໄດ້ປະຕິບັດປ້ອງກັນ ແລະ ຄວບຄຸມພະຍາດໄຂ້ຍຸງລາຍ ທາງພະແນກສາທາລະນະສຸກແຂວງ ມີດັ່ງນີ້: ຜັນຂະຫຍາຍບັນດາຄໍາສັ່ງກ່ຽວກັບການປ້ອງກັນ ແລະ ຄວບຄຸມພະຍາດທີ່ເກີດຂຶ້ນຕາມລະດູການໃນປີ 2019.
ແຕ່ງຕັ້ງພະນັກງານຂັ້ນແຂວງ ລົງຊ່ວຍໃນການຄວບຄຸມພະຍາດໄຂ້ຍຸງລາຍໃນທົ່ວແຂວງ, ຕັ້ງທີມສຳຫຼວດໜອນນໍ້າ ແລະ ທຳລາຍແຫຼ່ງເພາະພັນທຸກບ້ານ ພ້ອມລົງສໍາຫຼວດເມືອງຈຳປາສັກ, ໂພນທອງ ແລະ ຊະນະສົມບູນ ເພາະເປັນເມືອງທີ່ມີ ຄວາມສ່ຽງສູງ.
ແຕ່ລະເມືອງຈະມີການສໍາຫຼວດ ຄວາມໜາແໜ້ນຂອງໜອນນໍ້າໃນທຸກໆອາທິດຢູ່ບ້ານເປົ້າໝາຍ ພ້ອມລາຍງານໃຫ້ຂັ້ນແຂວງ ແລະ ສູນກາງ; ອົບຮົມໃຫ້ທ່ານໝໍ ແລະ ພະຍາບານຢູ່ໂຮງໝໍແຂວງຈໍາປາສັກ ເພີ່ມຂຶ້ນ. ຈັດປະຊຸມຄະນະກໍາມະການຄວບຄຸມພະຍາດຕິດຕໍ່ຂັ້ນແຂວງ ແລະ ຂັ້ນເມືອງຫາຂັ້ນກຸ່ມບ້ານ ແລະ ປະຊຸມໜ່ວຍງານປະຕິບັດງານສຸກເສີນດ້ານສາທາລະນະສຸກ ( EOC ) ທຸກໆອາທິດ.
ສາເຫດທີ່ເຮັດໃຫ້ຕົວເລກຜູ້ຕິດເຊື້ອພະຍາດດັ່ງກ່າວ ເພີ່ມຂຶ້ນຍ້ອນການໂຄສະນາສຸຂະສຶກສາໃນການໃຫ້ຄວາມຮູ້ກ່ຽວກັບການປ້ອງກັນ ແລະ ຄວບຄຸມພະຍາດໄຂ້ຍຸງລາຍໃຫ້ແກ່ຊຸມຊົນຍັງບໍ່ເປັນລະບົບຕໍ່ເນື່ອງ ແລະ ເຮັດໃຫ້ການຮ່ວມມືຂອງປະຊາຊົນບໍ່ທັນໄດ້ດີ ຫຼື ຮູ້ແຕ່ບໍ່ເຮັດ ເຊິ່ງໄດ້ມີການສະເໜີໃຫ້ທຸກພາກສ່ວນເຂົ້າຮ່ວມໃນການຕອບໂຕ້ພະຍາດໄຂ້ຍຸງລາຍຢ່າງເປັນຂະບວນ ພ້ອມໃຫ້ແຕ່ລະເມືອງຈັດຕັ້ງສ້າງຂະບວນການທໍາລາຍແຫຼ່ງເພາະພັນໜອນນໍ້າຍຸງລາຍ ໃນແຕ່ລະບ້ານທຸກອາທິດຢ່າງເປັນປົກກະຕິຕໍ່ເນື່ອງຢ່າງຕັ້ງໜ້າ ແລະ ປະຕິບັດ 5 ປ ຢ່າງເຂັ້ມງວດ.
( ຂ່າວ: ທິບອຸສາ )
