ແຂວງໄຊຍະບູລີ ແລະ ແຂວງອຸດົມໄຊ ກຳລັງປະເຊີນໜ້າກັບບົ້ງຝູງສາລີລະບາດ ໂດຍໄດ້ທຳລາຍສວນສາລີຂອງປະຊາຊົນໄປແລ້ວເກືອບ 20 ພັນເຮັກຕາ ໜັກກວ່າໝູ່ແມ່ນແຂວງອຸດົມໄຊ ກວມ 11 ພັນເຮັກຕາ.
ທ່ານ ຄຳເຜົ້າ ບຸນດາລາ ຫົວໜ້າຂະແໜງປູກຝັງ ພະແນກກະສິກຳ ແລະ ປ່າໄມ້ແຂວງອຸດົມໄຊ ໃຫ້ສຳພາດທ້າຍອາທິດຜ່ານມາວ່າ: ເລີ່ມແຕ່ຕົ້ນເດືອນພຶດສະພາເປັນຕົ້ນມາ ໄດ້ເກີດການລະບາດຂອງບົ້ງຝູງທຳລາຍຕົ້ນສາລີຂອງຊາວກະສິກອນຢູ່ແຂວງອຸດົມໄຊ ເປັນຈຳນວນຫຼວງຫຼາຍ, ພາຍຫຼັງໄດ້ຮັບແຈ້ງຈາກປະຊາຊົນ ທາງແຂວງກໍໄດ້ສົ່ງວິຊາການລົງໄປສົບທົບກັບຫ້ອງການກະສິກຳ ແລະ ປ່າໄມ້ແຕ່ລະເມືອງ ໄປສຳຫຼວດ ແລະ ເກັບກຳເນື້ອທີ່ທີ່ຖືກບົ້ງຝູງທຳລາຍຕົວຈິງ ເຫັນວ່າບົ້ງຝູງໄດ້ທຳລາຍຕົ້ນສາລີໄປແລ້ວຢ່າງໄວວາ ແລະ ເປັນບໍລິເວນກວ້າງເຖິງ 11.000 ເຮັກຕາ ຈາກເນື້ອທີ່ປູກສາລີຂອງຊາວກະສິກອນໃນທົ່ວແຂວງ 30.000 ກວ່າເຮັກຕາ ເຊິ່ງເມືອງທີ່ມີການລະບາດລວມມີເມືອງຮຸນ, ເມືອງແບງ, ເມືອງງາ ແລະ ເມືອງຫຼາ. ໃນນັ້ນ, ໄດ້ຮັບຜົນກະທົບຫຼາຍກວ່າໝູ່ແມ່ນເມືອງຮຸນ ເຊິ່ງມີເນື້ອທີ່ຖືກທຳລາຍແລ້ວ 4.000 ກວ່າເຮັກຕາ ເຊິ່ງເປັນເຫດການໃຫຍ່ໜຶ່ງທີ່ໜ້າເປັນຫ່ວງທີ່ສຸດ.
ຕໍ່ກັບເຫດການດັ່ງກ່າວ ທາງພະແນກກະສິກໍາ ແລະ ປ່າໄມ້ແຂວງ ກໍໄດ້ຮີບຮ້ອນລາຍງານຕໍ່ການນຳແຂວງ ແລະ ພາກສ່ວນກ່ຽວຂ້ອງຕ່າງໆເພື່ອຮັບຊາບ ແລະ ຊອກວິທີທາງແກ້ໄຂຢ່າງຮີບດ່ວນ. ຫຼ້າສຸດ, ວັນທີ 21 ມິຖຸນານີ້ ຜູ້ຕາງໜ້າອົງການອາຫານ ແລະ ການກະເສດປະຈຳລາວ ກໍໄດ້ລົງມາກວດກາເບິ່ງຜົນກະທົບຕົວຈິງ ພ້ອມທັງໄດ້ປຶກສາຫາລືກັນຊອກວິທີທາງປາບບົ້ງດັ່ງກ່າວໃຫ້ໝົດໄປໂດຍໄວ ເພື່ອເຮັດໃຫ້ຕົ້ນສາລີຂອງປະຊາຊົນທີ່ຖຶກຜົນກະທົບນັ້ນກັບຄືນສູ່ສະພາບປົກກະຕິ ແລະ ບໍ່ໃຫ້ແຜ່ກະຈາຍສູ່ເມືອງອື່ນໆຕື່ມອີກ.
ທ່ານ ຄໍາຫຼ້າ ຜິວວັນນາ ຫົວໜ້າພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໃຫ້ຮູ້ວ່າ: ໃນວັນທີ 20 ພຶດສະພາ 2019 ໄດ້ຮັບລາຍງານມີການລະບາດຂອງບົ້ງຝູງສາລີ ຢູ່ເມືອງປາກລາຍ ເຊິ່ງມີເນື້ອທີ່ຖືກຜົນກະທົບ 2.727,10 ເຮັກຕາ, ຄາດຄະເນເນື້ອທີ່ມີຄວາມສ່ຽງເສຍຫາຍປະມານ 1.739,49 ເຮັກຕາ ເຊິ່ງເຂດທີ່ມີຄວາມສ່ຽງດັ່ງກ່າວໄດ້ສີດຢາ ແລະ ສາມາດຄວບຄຸມໄດ້ໃນລະດັບໜຶ່ງ. ຫຼ້າສຸດ, ວັນທີ 24 ມິຖຸນາ 2019 ບົ້ງຝູງສາລີໄດ້ມີການລະບາດອອກເປັນວົງກວ້າງຂຶ້ນເລື້ອຍໆ ແລະ ໄດ້ລະບາດໃນຂອບເຂດທົ່ວແຂວງແລ້ວ ເຊິ່ງປັດຈຸບັນທົ່ວແຂວງຊາວກະສິກອນປູກສາລີສໍາເລັດແລ້ວແລ້ວ 25.110,96 ເຮັກຕາ, ມີເນື້ອທີ່ຖືກຜົນກະທົບຈາກບົ້ງຝູງ 8.005,57 ເຮັກຕາ, ຄາດຄະເນເນື້ອທີ່ມີຄວາມສ່ຽງເສຍຫາຍປະມານ 4.217,07ເຮັກຕາ, ມີ 71 ບ້ານ, ມີ 2.790 ຄອບຄົວ.
ປັດຈຸບັນໄດ້ໝູນໃຊ້ງົບປະມານຂອງແຂວງບ້ວງ 50 ລ້ານ ຈັດຊື້ຢາແຊນອີມາແມັກ 5 ໃຫ້ຊາວກະສິກອນແລ້ວ ຈຳນວນ 4 ຊຸດ, ໄດ້ຢາທັງໝົດ 3.700 ຊອງ, ຄິດເປັນມູນຄ່າ 129 ລ້ານກວ່າກີບ, ສາມາດນໍາໃຊ້ໄດ້ 1.233 ເຮັກຕາ ເທົ່າກັບ 15% ຂອງເນື້ອທີ່ຖືກຜົນກະທົບ. ພ້ອມດຽວກັນນັ້ນ, ຍັງສືບຕໍ່ລົງແນະນໍາເຕັກນິກການປ້ອງກັນກຳຈັດ ແລະ ເກັບກຳຂໍ້ມູນຢູ່ບັນດາບ້ານອື່ນໆທີ່ມີການປູກສາລີຕື່ມອີກ ຖ້າການປ້ອງກັນ ແລະ ກຳຈັດບໍ່ທັນກັບສະພາບການ ອາດເຮັດໃຫ້ເນື້ອທີ່ທີ່ປູກສາລີສຳເລັດໄປແລ້ວນັ້ນຖືກຜົນກະທົບ ແລະ ເນື້ອທີ່ມີຄວາມສ່ຽງເສຍຫາຍ ກໍຈະຖືກບົ້ງຝູງສາລີທຳລາຍເສຍຫາຍໄດ້.
ໃນເນື້ອທີ່ຖືກຜົນກະທົບ 8.005,57 ເຮັກຕາ, ມີທັງໝົດ 11 ເມືອງ ໂດຍເມືອງທີ່ໄດ້ຮັບຜົນກະທົບຫຼາຍກ່ວາໝູແມ່ນເມືອງໄຊຍະບູລີ 4.750 ເຮັກຕາ, ເມືອງປາກລາຍ 2.727 ເຮັກຕາ, ເມືອງພຽງ 331 ເຮັກຕາ, ເມືອງຫົງສາ 85 ເຮັກຕາ, ເມືອງເງິນ 63 ເຮັກຕາ, ເມືອງຄອບ 25,85 ເຮັກຕາ, ເມືອງແກ່ນທ້າວ 9,70 ເຮັກຕາ, ເມືອງທົ່ງມີໄຊ 5,96 ເຮັກຕາ, ເມືອງບໍ່ແຕນ 3,80 ເຮັກຕາ, ເມືອງຊຽງຮ່ອນ 3 ເຮັກຕາ ແລະ ເມືອງໄຊສະຖານ 0,5 ເຮັກຕາ.
ທ່ານ ບຸນຊູ ວິໄລສັກ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງໄຊຍະບູລີ ເປີດເຜີຍວ່າ: ຈາກຜົນກະທົບຂອງບົ້ງຝູງສາລີໃນເບື້ອງຕົ້ນອາດສົ່ງຜົນໃຫ້ລາຄາສາລີມີການຖີບຕົວສູງຂຶ້ນ ເນື່ອງຈາກຕະຫຼາດຕ່າງປະເທດກໍມີຄວາມຕ້ອງການຫຼາຍ, ແຕ່ສິນຄ້າຕອບສະໜອງອາດມີໜ້ອຍ ເນື່ອງຈາກສັດຕູພືດທີ່ກໍາລັງຄຸກຄາມຢູ່. ແຕ່ເຖິງຢ່າງໃດກໍຕາມ, ປັດຈຸບັນນີ້ຜົນຜະລິດເກົ່າຂອງປະຊາຊົນໃນທົ່ວແຂວງກໍຍັງຄ້າງຢູ່ປະມານ 30 – 40 ໂຕນ ທີ່ລໍຖ້າການສົ່ງອອກ, ດ້ານລາຄາສາລີໃນປັດຈຸບັນທີ່ສົ່ງຂາຍໃຫ້ແກ່ປະເທດໄທ ປະມານ 2 ພັນກີບຕໍ່ກິໂລ, ສ່ວນລາຄາຮັບຊື້ປະມານ 1.100 ກີບ ຫາ 1.200 ກີບຕໍ່ກິໂລ.
