ຄື້ນຄວາມຮ້ອນປົກຄຸມພື້ນທີ່ສ່ວນໃຫຍ່ຂອງທະວີບເອີຣົບ ສົ່ງຜົນໃຫ້ອຸນຫະພູມສຸງສຸດເປັນປະຫວັດການ ຕາມສະຖິຕິເດືອນມິຖຸນາ ໃນຫຼາຍປະເທດ ແລະ ມີແນວໂນ້ມສູງເກີນ 40 ອົງສາ ໃນອີກດົນຈາກນີ້.
ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນພະຫັດ ທີ 27 ມິຖຸນາ ວ່າ ສໍານັກງານອຸຕຸນິຍົມວິທະຍາຂອງຝຣັ່ງ “ເມເຕໂອຟຣັອງຊ໌” ອອກປະກາດເຕືອນໄພຄວບຄຸມ 13 ພາກພື້ນ ຈາກທັງໝົດ 18 ພາກພື້ນໃນປະເທດໃຫ້ປະຊາຊົນໃນພື້ນທີ່ເພິ່ມການເບິ່ງແຍງຕົວເອງ ຈາກອິດທິພົນຂອງຄື້ນຄວາມຮ້ອນທີ່ຮຸນແຮງ ໃນລະດັບ “ສີສົ້ມ” ເຊິ່ງເປັນຂັ້ນທີ 2 ຮອງຈາກ “ສີແດງ” ທີ່ເປັນລະດັບສູງສຸດເທົ່ານັ້ນ ຂະນະທີ່ ກະຊວງສຶກສາທິການ ສັ່ງປິດໂຮງຮຽນທົ່ວປະເທດຕະຫຼອດອາທິດນີ້ ຫຼັງເລື່ອນການສອບເສັງເຂົ້າສະຖາບັນສຶກສາລະດັບມັດທະຍົມປາຍເປັນອາທິດໜ້າ ດ້ານກະຊວງຄົມມະນາຄົມ ປະກາດມາດຕະການຄວບຄຸມການໃຊ້ພາຫະນະ ເພື່ອຫວັງຫຼຸດການຜະລິດກ໊າຊພິດໃຫ້ໄດ້ຫຼາຍທີ່ສຸດ.
ທັງນີ້ ເມເຕໂອຟຣັອງຊ໌ ລາຍງານວ່າ ອຸນຫະພູມໃນພື້ນທີ່ສ່ວນໃຫຍ່ຂອງຝຣັ່ງ ຢູ່ລະດັບ 40 ອົງສາ ເມື່ອວັນພຸດ ແຕ່ໃນບາງພາກພື້ນ ມີແນວໂນ້ມເພິ່ມສູງຂຶ້ງເຖິງ 44 ອົງສາ ໃນໄລຍະທ້າຍອາທິດນີ້ ແລະ ຢໍ້າເຕືອນວ່າ ອາກາດຮ້ອນແຮງເຊັ່ນນີ້ “ເປັນອັນຕະລາຍເຖິງແກ່ຊີວິດ” ໂດຍຝຣັ່ງເປັນໜຶ່ງໃນປະເທດທີ່ຜະເຊີນກັບອິດທິພົນຂອງຄື້ນຄວາມຮ້ອນຮຸນແຮງ ເມື່ອປີ 2003 ພາກຊີວິດຊາວຝຣັ່ງ ປະມານ 15.000 ຄົນ ສ່ວນໃຫຍ່ເປັນຜູ້ສູງອາຍຸ.
ຂະນະທີ່ ສະຖານະການໃນປະເທດເພື່ອນບ້ານເຊັ່ນ ເຢຍລະມັນ ແລະ ສະວິດເຊີແລນ ກໍ່ບໍ່ຕ່າງກັນຫຼາຍ ໂດຍອຸນຫະພູມໃນພື້ນທີ່ສ່ວນໃຫຍ່ ປະມານ 40 ອົງສາ ແລະ ມີແນວໂນ້ມເກີນກວ່ານັ້ນ ໃນໄລຍະທ້າຍອາທິດນີ້ ດ້ານສື່ທ້ອງຖິ່ນຫຼາຍແຫ່ງພ້ອມໃຈກັນສະເໜີລາຍງານພິເສດ ເປັນການໃຫ້ຄວາມຮູ້ແກ່ປະຊາຊົນກ່ຽວກັບການຮັກສາສຸຂະພາບ ໃນໄລຍະລະດູຮ້ອນທີ່ຍິ່ງຮ້ອນຂຶ້ນທຸກປີ.
ສ່ວນສະຖານະການໃນປະເທດອື່ນສໍານັກງານອຸຕຸນິຍົມວິທະຍາຂອງສະເປນ ພະຍາກອນອຸນຫະພູມໃນປະເທດອາດສູງເຖິງ 42 ອົງສາ ໃນອີກບໍ່ເທົ່າໃດວັນຂ້າງໜ້າ ນອກເໜືອຈາກຄວາມກັງວົນເລື່ອງປະຊາຊົນຈະລົ້ມປ່ວຍດ້ວຍພາວະຮ່າງກາຍຂາດນ້ໍາແລ້ວ ຫຼາຍຝ່າຍຍັງວິຕົກເລື່ອງການເກີດໄຟປ່າດ້ວຍ ເຊັ່ນດຽວກັບໃນປະເທດປັອກຕຸຍການ ແລະ ກຣີຊ ທີ່ຜະເຊີນກັບໄຟປ່າຮຸນແຮງ ໃນໄລຍະນີ້ທຸກປີ ໂດຍໄຟປ່າໃນກຣີຊ ເມື່ອລະດູຮ້ອນປີທີ່ແລ້ວ ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 100 ຄົນ ແລະ ໃນປີນີ້ ສໍານັກງານອຸຕຸນິຍົມວິທະຍາກຣີຊ ອອກປະກາດເຕືອນໄພສະພາບອາກາດ “ສີແດງ” ເຊິ່ງເປັນຂັ້ນສູງສຸດ.
ນອກຈາກນີ້, ສໍານັກງານອຸຕຸນິຍົມວິທະຍາຂອງປະເທດໂປແລນ ແລະ ສາທາລະນະລັດເຊັກ ລາຍງານ ວ່າ ອຸນຫະພູມ ເມື່ອວັນພຸດ ທີ່ຜ່ານມາ ເຮັດສະຖິຕິຮ້ອນທີ່ສຸດເປັນປະຫວັດການຂອງສະຖິຕິເດືອນມິຖຸນາ ໂດຍວັດແທກໄດ້ 38,2 ອົງສາ ແລະ 38,9 ອົງສາ ຕາມລໍາດັບ.
