ຈະຫຼວດຊູເປີຈໍາໂບ້ “ຟອລຄອນເຮຟວີ” ຂອງສະເປຊເອັກຊ໌ (SpaceX) ປະສົບຄວາມສໍາເລັດໃນການສົ່ງດາວທຽມ 24 ດວງ ໃຫ້ກັບໜ່ວຍງານທັງພາກລັດ ແລະ ເອກະຊົນຂອງສະຫະລັດ ແຕ່ບູສເຕີ 1 ໃນ 3 ລໍາ ເກີດຜິດພາດ ບໍ່ລົງຈອດຕາມຈຸດທີ່ກໍານົດໄວ້.
ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນພຸດ ທີ 26 ມິຖຸນາ ວ່າ ຈະຫຼວດຟອລຄອນເຮຟວີ ບິນຂຶ້ນຈາກຖານໝາຍເລກ 39ເອ ເຊິ່ງເປັນຖານດຽວກັນກັບທີ່ໃຊ້ປ່ອຍຍານອະວະກາດອະພອລໂລ 11 ພາຍໃນສູນອະວະກາດເຄນເນດີ ເທິງແຫຼມຄັນນາເວຣັລ ທາງພາກຕາເວັນອອກຂອງລັດຟຼໍລິດາ ເມື່ອເວລາ 02:30 ໂມງ ຕາມເວລາທ້ອງຖິ່ນຂອງວັນອັງຄານ ທີ່ຜ່ານມາ (13:30 ໂມງ ຂອງວັນອັງຄານ ຕາມເວລາໃນປະເທດລາວ) ໂດຍຈະຫຼວດຊູເປີຈໍາໂບ້ ຂະໜາດ 27 ເຄື່ອງຈັກ ເຊິ່ງມີຄວາມສູງ 70 ແມັດ ແລະ ກວ້າງ 12,2 ແມັດ ທຽບເທົ່າອາຄານ ສູງ 23 ຊັ້ນ ເພື່ອນໍາສົ່ງດາວທຽມ ໃນພາລະກິດ “ໄຣດ໌ແຊຣ໌” ຫຼື “ເອັສທີພີ – ທູ (rideshare or STP–2)” ປະກອບດ້ວຍດາວທຽມ 24 ດວງ ທັງດາວທຽມສໍາຫຼວດໂລກ ແລະ ດາວທຽມສອດແນມຈາກທັງຂອງສະຖາບັນວິໄຈທາງວິທະຍາສາດອົງການບໍລິຫານການບິນ ແລະ ອະວະກາດແຫ່ງຊາດ (NASA) ແລະ ກະຊວງປ້ອງກັນປະເທດ.
ທັງນີ້ ພາລະກິດດັ່ງກ່າວ ຫຼ້າຊ້າກວ່າກໍານົດການເກົ່າເຖິງ 3 ຊົ່ວໂມງ ໃນວັນອັງຄານ ຫຼັງເລື່ອນຈາກກໍານົດຄັ້ງທໍາອິດ ຄື ເມື່ອວັນຈັນ ທີ່ຜ່ານມາ ຂະນະທີ່ ເຖິງວ່າຈະຫຼວດຂັບດັນ ຫຼື ບູສເຕີ 2 ລໍາສາມາດບິນກັບມາລົງຈອດເທິງຖານພາກພື້ນດິນໄດ້ສໍາເລັດ ແຕ່ເປັນຄັ້ງທໍາອິດ ທີ່ບູສເຕີ ລໍາທີ 3 ຜິດລາດເປົ້າລົງຈອດ ໂດຍຕົກລົງກາງມະຫາສະໝຸດແອັດແລນຕິກ ແຕ່ທີມງານສາມາດເກັບກູ້ໄດ້ແລ້ວ ດ້ານ ທ່ານອີລອນ ມັສ ປະທານຄະນະເຈົ້າໜ້າທີ່ບໍລິຫານ (CEO) ຂອງສະເປຊເອັກຊ໌ ຍອມຮັບວ່າ ພາລະກິດຄັ້ງນີ້ “ຍາກທີ່ສຸດ” ເຖິງວ່າຈະເປັນການໃຊ້ວຽກຈະຫຼວດຟອລຄອນເຮຟວີ ເປັນຄັ້ງທີ 3.
ຂະນະທີ່ ສູນອະວະກາດ ແລະ ລະບົບຂີປະນາວຸດຂອງກອງທັບສະຫະລັດ ລາຍງານວ່າ ດາວທຽມທັງ 24 ດວງ ປະສົບຄວາມສໍາເລັດໃນການເຂົ້າສູ່ວົງໂຄຈອນ ຖືເປັນຄັ້ງທໍາອິດ ທີ່ກະຊວງປ້ອງກັນປະເທດສະຫະລັດ ໃຊ້ບໍລິການສົ່ງດາວທຽມ ຫຼື ຮາດແວຮ໌ອື່ນ ດ້ວຍຈະຫຼວດທີຜ່ານມາການໃຊ້ວຽກມາແລ້ວ.
