ຈໍານວນຜູ້ເສຍຊີວິດຈາກເຊື້ອໄວຣັສອີໂບລາ ເຊິ່ງລະບາດໃນສາທາລະນະລັດ ປະຊາທິປະໄຕ ຄອງໂກ ຕັ້ງແຕ່ເດືອນສິງຫາ ປີ 2018 ຫຼື ຕະຫຼອດ 10 ເດືອນ ທີ່ຜ່ານມາ ເພິ່ມຂຶ້ນຫຼາຍກວ່າ 1.500 ຄົນແລ້ວ.
ສໍານັກຂ່າວຕ່າງປະເທດລາຍງານຈາກນະຄອນຫຼວງກິນຊາຊາ ສາທາລະນະລັດ ປະຊາທິປະໄຕຄອງໂກ ຫຼື ດີອາຄອງໂກ ເມື່ອວັນອັງຄານ ທີ 25 ມິຖຸນາ ວ່າ ກະຊວງສາທາລະນະສຸກຂອງດີອາຄອງໂກອອກຖະແຫຼງການເມື່ອວັນຈັນ ກ່ຽວກັບຈໍານວນຜູ້ເສຍຊີວິດຈາກເຊື້ອໄວຣັສອີໂບລາ ເຊິ່ງລະບາດຄັ້ງໃຫຍ່ເມື່ອເດືອນສິງຫາ ປີຜ່ານມາ ວ່າ ມີປະມານ 1.506 ຄົນ ຈາກສະຖິຕິຜູ້ປ່ວຍສະສົມ 2.239 ຄົນ ຂະນະທີ່ປະຊາຊົນຢ່າງໜ້ອຍ 141.000 ຄົນ ໄດ້ຮັບການສັກຢາຕ້ານເຊື້ອ ໂດຍສ່ວນໃຫຍ່ຢູ່ໃນແຂວງອິຕູຣິ ແລະ ແຂວງຄິວູເໜືອ ເຊິ່ງມີຊາຍແດນທາງພາກຕາເວັນອອກ ຕິດກັບປະເທດຢູກັນດາ ແລະ ລາຍງານເມື່ອກາງເດືອນນີ້ ພົບຜູ້ເສຍຊີວິດຈາກເຊື້ອໄວຣັສອີໂບລາໃນປະເທດແລ້ວ 2 ຄົນ ໜຶ່ງໃນນັ້ນເປັນເດັກຊາຍອາຍຸ 5 ປີ ທີ່ຂ້າມຊາຍແດນມາຈາກດີອາຄອງໂກ.
ຢ່າງໃດກໍ່ຕາມ ໃນທີ່ປະຊຸມສຸກເສີນຂອງອົງການອະນາໄມໂລກ (WHO: World Health Organization) ມີມະຕິເມື່ອອາທິດ ທີ່ຜ່ານມາ ວ່າ ຍັງບໍ່ປະກາດໃຫ້ສະຖານະການການແຜ່ລະລະບາດຂອງເຊື້ອໄວຣັສອີໂບລາ ໃນດີອາຄອງໂກ ເຊິ່ງຂ້າມຊາຍແດນໄປປະເທດຢູກັນດາແລ້ວ ໃຫ້ເປັນ “ພາວະສຸກເສີນດ້ານສາທາລະນະສຸກລະຫວ່າງປະເທດ” ແຕ່ຢືນຢັນວ່າ ການຍັງບໍ່ປະກາດສະຖານະການສຸກເສີນບໍ່ໄດ້ໝາຍຄວາມວ່າ ດັບເບິລຢູເອັດຈ໌ໂອ ບໍ່ໃສ່ໃຈຕໍ່ວິກິດຄັ້ງນີ້ ແຕ່ໃນທາງກົງກັນຂ້າມ ຍິ່ງເພິ່ມຄວາມຊ່ວຍເຫຼືອໃຫ້ແກ່ທຸກປະເທດທີ່ກໍງລັງໄດ້ຮັບຜົນກະທົບ.
