ສາລະວັນ ພົບໝູຕິດເຊື້ອພະຍາດອະຫິວາໝູອາຟຣິກກາ

63

ພະຍາດອະຫິວາໝູອາຟຣິກກາ ລະບາດຢູ່ 2 ປະເທດໃກ້ຄຽງ ຄື: ຈີນ ແລະ ຫວຽດນາມ ໃນກາງເດືອນມີນາ 2019 ທີ່ຜ່ານມາ, ຫຼ້າສຸດພົບໝູຕິດເຊື້ອພະຍາດດັ່ງກ່າວຢູ່ 7 ບ້ານ ຂອງເມືອງຕຸ້ມລານ ແຂວງສາລະວັນ, ຄາດສາເຫດມາຈາກຮ້ານອາຫານຫວຽດນາມ ລັກລອບນໍາເຂົ້າຜະລິດຕະພັນໝູມາປຸງແຕ່ງອາຫານໃນເຂດດັ່ງກ່າວ.

ອີງຕາມແຈ້ງການ ກະຊວງກະສິກໍາ ແລະ ປ່າໄມ້, ກົມລ້ຽງສັດ ແລະ ການປະມົງ ກ່ຽວກັບກໍລະນີກວດພົບເຊື້ອພະຍາດອະຫິວາໝູອາຟຣິກກາ ຢູ່ເມືອງຕຸ້ມລານ ແຂວງສາລະວັນ ສະບັບເລກທີ 1609/ກລປ ລົງວັນທີ 20 ມິຖຸນາ 2019 ໂດຍແຈ້ງໃຫ້ຊາບ ວ່າ: ໃນວັນທີ 17 ມິຖຸນາ 2019 ສູນວິໄຈພະຍາດສັດ ກົມລ້ຽງສັດ ແລະ ການປະມົງ ໄດ້ກວດພົບເຊື້ອພະຍາດອະຫິວາໝູອາຟຣິກກາຈໍານວນ 8 ຕົວຢ່າງ ຈາກ 7 ບ້ານ ທີ່ມີການລະບາດ ຄື: ບ້ານສາມັກຄີໄຊ, ດິນດາກ, ໂພນງາມ, ແກ້ງຮັງ, ນາລະຈາງ, ຫ້ວຍຫວ້າ ແລະ ບ້ານນາຮ່ອງໃຫຍ່ທີ່ຂຶ້ນກັບເມືອງຕຸ້ມລານ ແຂວງສາລະວັນ.

ດັ່ງນັ້ນ, ເພື່ອບໍ່ໃຫ້ພະຍາດແຜ່ລາມອອກເປັນວົງກວ້າງ ແລະ ສົ່ງຜົນກະທົບດ້ານລົບຕໍ່ການຜະລິດໝູ ແລະ ການດໍາລົງຊີວິດຂອງປະຊາຊົນ, ມີຄວາມຈໍາເປັນຕ້ອງໄດ້ພ້ອມກັນຕ້ານ, ສະກັດກັ້ນ ແລະ ຕອບໂຕ້ພະຍາດໃຫ້ສະຫງົບລົງໂດຍໄວ ຈຶ່ງແນະນໍາໃຫ້ປະຕິບັດບາງມາດຕາດ່ວນສຸກເສີນ ດັ່ງນີ້: 1). ໃຫ້ຂະແໜງລ້ຽງສັດ ແລະ ການປະມົງລາຍງານການເກີດພະຍາດອະຫິວາໝູອາຟຣິກກາ ແລະ ຂໍທິດຊີ້ນໍາ – ນໍາພະແນກກະສິກໍາ ແລະ ປ່າໄມ້ແຂວງ, ພ້ອມທັງປະສານສົມທົບກັບຫ້ອງການກະສິກໍາ ແລະ ປ່າໄມ້ເມືອງ ແຕ່ງຕັ້ງຄະນະສະເພາະກິດຕ້ານ ແລະ ຕອບໂຕ້ພະຍາດດັ່ງກ່າວທີ່ເກີດຂຶ້ນ ພ້ອມທັງວາງແຜນກຽມ ຄວາມພ້ອມ ເປັນຕົ້ນກໍາລັງຄົນ, ວັດຖຸອຸປະກອນ, ພາຫະນະ ແລະ ງົບປະມານ ເພື່ອລົງເຄື່ອນໄຫວຕ້ານ ແລະ ຕອບໂຕ້ພະຍາດໃຫ້ທັນການ. ພ້ອມນີ້, ໃຫ້ສະເໜີຫາທ່ານເຈົ້າເມືອງ ປະກາດເຂດລະບາດຂອງພະຍາດໂດຍດ່ວນ.

2). ໃຫ້ຂະແໜງລ້ຽງສັດ ແລະ ການປະມົງປະສານສົມທົບກັບຫ້ອງການກະສິກໍາ ແລະ ປ່າໄມ້ເມືອງ ແລະ ອໍານາດການປົກຄອງບ້ານ ລົງໂຄສະນາເຜີຍແຜ່ໄປຮອດຄອບຄົວຂອງຜູ້ທີ່ໄດ້ຮັບຜົນກະທົບ ແລະ ຄົນອ້ອມຂ້າງໃກ້ຄຽງຂອງ 7 ບ້ານ ທີ່ໄດ້ຮັບຜົນກະທົບ ໂດຍໃຫ້ຕິດຕາມ, ເຝົ້າລະວັງຢ່າງເຄັ່ງຄັດ, ສືບສວນ, ສອບສວນພະຍາດ, ເກັບກໍາຂໍ້ມູນສະພາບການລ້ຽງໝູ, ຈໍານວນໝູເຈັບ ຫຼື ຕາຍ ແລະ ກໍານົດຂອບເຂດລະບາດຂອງພະຍາດ ພ້ອມທັງໃຫ້ນໍາສະເໜີຕໍ່ທ່ານເຈົ້າເມືອງ ເພື່ອປະກາດເປັນເຂດລະບາດຢ່າງເປັນທາງການ ຕາມກົດໝາຍວ່າດ້ວຍການລ້ຽງສັດ ແລະ ສັດຕະວະແພດທີ່ກໍານົດໄວ້.

3). ຕັ້ງຈຸດດ່ານກວດກາສັດຕະວະແພດຊົ່ວຄາວ ກວດຢຶດໝູ ແລະ ຜະລິດຕະພັນໝູທີ່ເຄື່ອນຍ້າຍຈາກເຂດລະບາດ ພ້ອມທັງຈັດຕັ້ງສີດພົ່ນຢາຂ້າເຊື້ອ, ພາຫະນະທີ່ອອກຈາກເຂດດັ່ງກ່າວເພື່ອປ້ອງກັນບໍ່ໃຫ້ພະຍາດແຜ່ລາມ.

4). ໃຫ້ຈັດຕັ້ງກັນລົງໂຄສະນາເຜີຍແຜ່ໃຫ້ຄວາມຮູ້, ຄວາມເຂົ້າໃຈກ່ຽວກັບອັນຕະລາຍຂອງພະຍາດດັ່ງກ່າວໃຫ້ແກ່ປະຊາຊົນພາຍໃນບ້ານ ແລະ ບ້ານອ້ອມຂ້າງ ພ້ອມທັງຊຸກຍູ້ລະດົມໃຫ້ເຂົາເຈົ້າສະໝັກໃຈເຂົ້າຮ່ວມປະຕິບັດມາດຕະການຕອບໂຕ້ພະຍາດ ທີ່ລັດວາງອອກຢ່າງພ້ອມພຽງ.

5). ເຮັດແຜນສະເໜີຂໍອຸປະກອນ ເຊັ່ນ: ເຄື່ອງນຸ່ງປ້ອງກັນ PPE, ຢາຂ້າເຊື້ອ, ຊົບມື, ເກີບໂບກ ນໍາກົມລ້ຽງສັດ ແລະ ການປະມົງ ເພື່ອໄປຮັບໃຊ້ໃນການໂຕ້ຕອບພະຍາດໂດຍດ່ວນ.

6). ຖ້າເປັນໄປໄດ້ໃຫ້ຊຸກຍູ້, ລະດົມປະຊາຊົນນຳພາຂ້າທໍາລາຍໝູທີ່ຕິດເຊື້ອ ຫຼື ສ່ຽງຕໍ່ການຕິດເຊື້ອເປັນວົງແຄບຢູ່ຄອບຄົວຂອງເຂົາເຈົ້າ ຫຼື ຄອບຄົວໃກ້ຄຽງທີ່ສ່ຽງ ຫຼື ໄດ້ຮັບຜົນກະທົບຢ່າງສະໝັກໃຈເພື່ອຕັດວົງຈອນຂອງເຊື້ອພະຍາດ ແລະ ກໍາຈັດດ້ວຍການເຜົາ ຫຼື ຝັງ ໃຫ້ຖືກຕ້ອງຕາມຫຼັກວິຊາການ ບໍ່ໃຫ້ນໍາເອົາໝູທີ່ເຈັບ ຫຼື ຕາຍໄປບໍລິໂພກ ຫຼື ຖິ້ມລົງຫ້ວຍນໍ້າລໍາເຊ ຫຼື ຕາມທໍາມະຊາດຢ່າງເດັດຂາດ.

7). ນໍາພາປະຊາຊົນເຮັດອະນາໄມ ແລະ ຂ້າເຊື້ອຄອກສັດ, ສີດພົ່ນດ້ວຍຢາຂ້າເຊື້ອ ຫຼື ໂຮຍດ້ວຍປູນຂາວໃຫ້ທົ່ວເຖິງໃນບໍລິເວນບ້ານທີ່ໝູອາໄສຢູ່ ຫຼື ບ່ອນທີ່ໝູຍ່າງໄປ – ມາແຕ່ລະມື້.

8). ໃຫ້ລາຍງານສະພາບການລະບາດຂອງພະຍາດ ແລະ ຄວາມຄືບໜ້າຂອງການປະຕິບັດມາດຕະການໂຕ້ຕອບພະຍາດໃຫ້ຂັ້ນເທິງຖັດຕົນ, ກົມລ້ຽງສັດ ແລະ ການປະມົງເປັນແຕ່ລະວັນ.

9). ໃຫ້ປະຕິບັດມາດຕະການອື່ນຕາມລະບຽບກົດໝາຍ, ມາດຕະຖານ ແລະ ຂັ້ນຕອນການປະຕິບັດ ທາງດ້ານເຕັກນິກທີ່ເໝາະສົມ.

ດ້ານ ທ່ານ ສີແສງ ຂຸນສີ ຮອງຫົວໜ້າກົມລ້ຽງສັດ ແລະ ການປະມົງ ໃຫ້ຮູ້ວ່າ: ປັດຈຸບັນໄດ້ກວດພົບໝູຕິດເຊື້ອພະຍາດດັ່ງກ່າວຢູ່ 7 ບ້ານຂອງເມືອງຕຸ້ມລານ ແຂວງສາລະວັນ, ຄາດສາເຫດມາຈາກຮ້ານອາຫານຫວຽດນາມ ລັກລອບນໍາເຂົ້າຜະລິດຕະພັນໝູມາປຸງແຕ່ງອາຫານໃນເຂດດັ່ງກ່າວ. ພ້ອມນີ້, ກໍມີການຄຸມເຂັ້ມຕັ້ງດ່ານກວດກາຢ່າງເຂັ້ມງວດບໍ່ໃຫ້ມີການຍົກຍ້າຍໝູຈາກເມືອງດັ່ງກ່າວໄປເມືອງອື່ນພາຍໃນແຂວງຢ່າງເດັດຂາດ.