ອຸດົມໄຊກຽມພ້ອມ ຈັດການປະກົດການຫຍໍ້ທໍ້ ທີ່ອາດຈະເກີດຂຶ້ນ ໃນໄລຍະສອບເສັງ - Laoedaily

ອຸດົມໄຊກຽມພ້ອມ ຈັດການປະກົດການຫຍໍ້ທໍ້ ທີ່ອາດຈະເກີດຂຶ້ນ ໃນໄລຍະສອບເສັງ

ແຂວງອຸດົມໄຊກຽມພ້ອມຮອບດ້ານ ຕ້ານສະພາບປະກົດການຫຍໍ້ທໍ້ທີ່ອາດເກີດຂຶ້ນລະຫວ່າງການກະກຽມ ແລະ ສອບເສັງຈົບຊັ້ນ ມ7 ບໍ່ສະເພາະແຕ່ການຝ່າຝືນລະບຽບການ ແຕ່ຍັງລວມໄປເຖິງອຸບັດຕິເຫດ ແລະ ການສະຫຼອງຕາມຮ້ານກິນດື່ມຕ່າງໆນຳ.

 

ໃນວັນທີ 21 ມິຖຸນານີ້, ທີ່ສະໂມສອນຂອງພະແນກສຶກສາທິການ ແລະ ກິລາແຂວງອຸດົມໄຊ. ຄະນະກວດກາສະເພາະກິດ ໄດ້ຈັດກອງປະຊຸມ ປຶກສາຫາລື ເພື່ອຕ້ານ ແລະ ສະກັດກັ້ນ ປະກົດການຫຍໍ້ທໍ້ ທີ່ອາດຈະເກີດຂຶ້ນ ໃນການສອບເສັງຈົບຊັ້ນມັດທະຍົມສຶກສາ ຕອນປາຍ ມ7 ປະຈໍາສົກຮຽນນີ້. ເປັນປະທານ ໂດຍ ທ່ານ ສົມດີ ສີລາທອດ ຫົວໜ້າພະແນກສຶກສາທິການ ແລະ ກິລາແຂວງ, ເຂົ້າຮ່ວມມີຄະນະພະແນກສຶກສາ-ກິລາ, ເຈົ້າໜ້າທີ່ ປກສ, ພະແນກໄປສະນີ, ໂທລະຄົມມະນາຄົມ ແລະ ການສື່ສານ, ບໍລິສັດ ໂທລະຄົມມະນາຄົມ, ບໍລິສັດ ETL, ບໍລິສັດ UNITEL ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

 

 

ໃນກອງປະຊຸມໄດ້ຮັບຟັງການຜ່ານຂໍ້ຕົກລົງ ຂອງທ່ານ ເຈົ້າແຂວງ ກ່ຽວກັບການແຕ່ງຕັ້ງຄະນະກວດກາສະເພາະກິດເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້, ພ້ອມທັງຮັບຟັງການຜ່ານແຜນການກະກຽມລົງເຮັດວຽກຂອງແຕ່ລະສູນ, ຈຳນວນສູນສອບເສັງ ແລະ ວຽກງານອື່ນໆທີ່ກ່ຽວຂ້ອງ.

 

 

ໃນໂອກາດນີ້, ໄດ້ຮັບຟັງການໂອ້ລົມແນະນຳ ຈາກທ່ານ ຫົວໜ້າພະແນກສຶກສາທິການ ແລະ ກິລາ ປະທານ ຄະນະກຳມະການກວດກາສະເພາະກິດເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ທີ່ອາດຈະເກີດຂຶ້ນ ໃນການສອບເສັງ ພ້ອມທັງແລກປ່ຽນຄວາມຄິດເຫັນຈາກແຕ່ລະພາກສ່ວນ ເພື່ອເຮັດໃຫ້ ກ່ອນການສອບເສັງ, ເວລາສອບເສັງ ແລະ ພາຍຫຼັງເສັງແລ້ວ ຈົບຊັ້ນ ມ7 ໃນຄັ້ງນີ້ດໍາເນີນໄປດ້ວຍດີ, ມີຄວາມສະຫງົບ, ປອດໄພ ແລະ ຮັບປະກັນຄຸນນະພາບ ໂດຍສະເພາະ ການຊ່ວຍແກ້ໄຂປາກົດການຫຍໍ້ທໍ້ຕ່າງໆ ທີ່ອາດຈະເກີດຂື້ນ ກ່ຽວກັບຄູ, ນັກຮຽນ, ຫົວບົດ, ການຂັບຂີ່, ເຂົ້າຮ້ານກິ່ນດື່ມເຮຮ່າສະຫຼອງເວລາເສັງແລ້ວ ແລະ ອື່ນໆ.

 

 

ສຳລັບການສອບເສັງ ມ7 ປີນີ້, ແມ່ນຈັດຂຶ້ນໃນວັນທີ 25 ແລະ 26 ມິຖຸນາ 2019 ເອກະພາບກັນໃນທົ່ວປະເທດ ເຊິ່ງໃນຕອນເຊົ້າວັນທີ 25 ເວລາ 9:00 – 11:00. ສອບເສັງ ວິຊາພາສາລາວ-ວັນນະຄະດີ; ຕອນບ່າຍເວລາ 14:00 – 16:00. ສອບເສັງວິຊາ ເຄມີສາດ; ວັນທີ 26 ຕອນເຊົ້າ ເວລາ 9:00 – 11:00. ສອບເສັງວິຊາ ຄະນິດສາດ ແລະ ຕອນບ່າຍ ເວລາ 14:00 – 15:30 ສອບເສັງວິຊາ ປະຫວັດສາດ.

 

ເປັນພຽງພາບປະກອບຂ່າວ

 

ສົກນີ້, ແຂວງອຸດົມໄຊ ມີນັກຮຽນສອບເສັງທັງໝົດ 3.361 ຄົນ, ຍິງ 1.492 ຄົນ, ມາຈາກໂຮງຮຽນ 43 ແຫ່ງ, ມີ 162 ຫ້ອງສອບເສັງ ແລະ ມີ 12 ສູນສອບເສັງ ປະກອບມີ: ສູນ ມສ ແຂວງ, ມສ ເມືອງໄຊ, ມສ ສົງບ້ານເຈງ, ມສ ນ້ຳແຫງ, ມສ ເມືອງຫຼາ, ມສ ນາໝໍ້, ມສ ດອນແອ່ນ, ມສ ລາດຫານ, ມສ ເມືອງແບງ, ມສ ເມືອງຮຸນ, ມສ ດອນເມືອງ ແລະ ມສ ປາກແບງ.

 

ເປັນພຽງພາບປະກອບຂ່າວ

 

 

ຂໍ້ມູນ: ສຶກສາທິການ ແລະ ກິລາ ແຂວງອຸດົມໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ