ເສຍຊີວິດແລ້ວ 18 ຄົນ! ເຮືອເຟີຣີ່ ຫຼົ້ມນອກຝັ່ງເກາະຊະວາ ປະເທດອິນໂດເນເຊຍ - Laoedaily

ເສຍຊີວິດແລ້ວ 18 ຄົນ! ເຮືອເຟີຣີ່ ຫຼົ້ມນອກຝັ່ງເກາະຊະວາ ປະເທດອິນໂດເນເຊຍ

ຈໍານວນຜູ້ເສຍຊີວິດຈາກອຸບັດຕິເຫດເຮືອເຟີຣີ່ຫຼົ້ມນອກຊາຍຝັ່ງເກາະຊະວາຂອງອິນໂດເນເຊຍ ເມື່ອວັນຈັນ ທີ່ຜ່ານມາ ເພີ່ມຂຶ້ນເປັນ 18 ຄົນແລ້ວ ຫຼັງຜະເຊີນກັບຄື້ນລົມແຮງໃນທະເລ ປະກອບກັບບັນທຸກຜູ້ໂດຍສານມາເກີນຈໍາກັດ.

ສໍານັກຂ່າວເອເອັຟພີລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນອັງຄານ ທີ 18 ມິຖຸນາ ວ່າ ສໍານັກງານຄົ້ນຫາ ແລະ ກູ້ໄພຂອງອິນໂດເນເຊຍ ແຈ້ງວ່າ ອຸບັດຕິເຫດເຮືອເຟີຣີ່ທີ່ບັນທຸກຜູ້ໂດຍສານຫຼາຍວ່າ 60 ຄົນ ເຊິ່ງເກີນອັດຕາຈົນເກີດອັບປາງໃນທະເລ ເນື່ອງຈາກຜະເຊີນກັບຄື້ນລົມແຮງໃນທະເລ ເມື່ອວັນຈັນ ທີ່ຜ່ານມາ ໃກ້ກັບເກາະມາດູຣາ ນອກຊາຍຝັ່ງທາງທິດເໜືອຂອງເກາະຊະວາ ພົບຜູ້ເສຍຊີວິດແລ້ວ 18 ຄົນ ມີເດັກນ້ອຍລວມຢູ່ນໍາຫຼາຍຄົນ ແລະ ມີຜູ້ລອດຊີວິດ 39 ຄົນ.

ເຮືອຂອງໜ່ວຍກູ້ໄພ, ຍົນ ແລະ ເຮືອປະມົງທ້ອງຖິ່ນໄດ້ລະດົມກໍາລັງຄົ້ນຫາໃນທະເລ ເພາະຍັງມີຜູ້ສູນຫາຍອີກ 4 ຄົນ ແຕ່ສື່ທ້ອງຖິ່ນລາຍງານດ້ວຍວ່າ ຈໍານວນຜູ້ເສຍຊີວິດອາດສູງກວ່ານີ້ ເພາະຍັງມີຜູ້ໂດຍສານອີກຫຼາຍຄົນທີ່ບໍ່ໄດ້ຢູ່ໃນລາຍຊື່ຜູ້ໂດຍສານ.

ในภาพอาจจะมี หนึ่งคนขึ้นไป

ດ້ານ ທ່ານຟຣານ ບາຣຸງ ແມນເຈຣາ ໂຄສົກສໍານັກງານຕໍາຫຼວດ ແຂວງອິສຊະວາ ຖະແຫຼງວ່າ ເຈົ້າໜ້າທີ່ສົງໄສ ວ່າ ເຮືອລໍາທີ່ເກີດເຫດອາດບັນທຸກນ້ໍາໜັກເກີນ ແລະ ພົບກັບຄື້ນຂະໜາດໃຫຍ່ໃນທະເລ ເຮັດໃຫ້ພິກຂວໍ້າ ແລະ ຈົມລົງ ເຊິ່ງເຮືອເຟີຣີ່ ຍາວ 10 ແມັດ ຖືກຊາວປະມົງທ້ອງຖິ່ນພົບໃນເວລາຕໍ່ມາ.

ອຸບັດຕິເຫດທາງເຮືອເກີດຂຶ້ນເປັນປົກກະຕິໃນປະເທດອິນໂດເນເຊຍ ເພາະເປັນໝູ່ເກາະຂະໜາດໃຫຍ່ ມີເກາະຫຼາຍກວ່າ 17.000 ເກາະ ຈຶ່ງຕ້ອງໃຊ້ເຮືອເຟີຣີ່ ແລະ ເຮືອຕ່າງໆເປັນພາຫະນະໃນການເດີນທາງສັນຈອນທາງນ້ໍາ ເຖິງວ່າຈະລະຫຼວມໃນດ້ານມາດຕະຖານຄວາມປອດໄພ ເຊັ່ນເມື່ອປີຜ່ານມາ ມີຜູ້ເສຍຊີວິດຫຼາຍກວ່າ 160 ຄົນ ຈາກເຮືອເຟີຣີ່ຫຼົ້ມ ໃກ້ກັບເກາະສຸມາຕຣາຂອງອິນໂດເນເຊຍ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ