ເປີດນຳໃຊ້ອະນຸສາວະລີ ອົງແກ້ວ ວິລະບຸລຸດຂອງຊາດ ມູນຄ່າ 23 ຕື້ກວ່າກີບ - Laoedaily

ເປີດນຳໃຊ້ອະນຸສາວະລີ ອົງແກ້ວ ວິລະບຸລຸດຂອງຊາດ ມູນຄ່າ 23 ຕື້ກວ່າກີບ

ອະນຸສາວະລີ ອົງແກ້ວ ວິລະບຸລຸດຂອງຊາດລາວ ທີ່ປະດິດສະຖານຢູ່ຫຼັກສອງ ບ້ານໃໝ່ຫົວເມືອງ ເມືອງລະມາມ ແຂວງເຊກອງ ໄດ້ເປີດນຳໃຊ້ຢ່າງເປັນທາງການ ໃນວັນທີ 13 ມິຖຸນານີ້ ໂດຍ ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ຄະນະເລຂາທິການສູນກາງ, ຫົວໜ້າຫ້ອງວ່າການສູນກາງພັກ, ທ່ານ ຄໍາເຜີຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ. ພ້ອມນີ້, ກໍມີການນຳ 3 ແຂວງພາກໃຕ້ ຄື: ແຂວງສາລະວັນ, ຈໍາປາສັກ, ອັດຕະປື, ພາກສ່ວນກ່ຽວຂ້ອງ ແລະ ມວນຊົນແຂວງດັ່ງກ່າວເຂົ້າຮ່ວມ.

ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ກ່າວວ່າ: ທ່ານ    ອົງແກ້ວ ແມ່ນຜູ້ນຳທີ່ໂດດເດັ່ນ ແລະສຳຄັນໃນສະໄໝຕໍ່ສູ້ຕ້ານຝຣັ່ງ ແລະ ຈາກການເປັນຜູ້ໜຶ່ງທີ່ມີນ້ຳໃຈຮັກຊາດຍອມເສຍສະຫຼະຊີວິດ ເພື່ອຊາດເພື່ອປະຊາຊົນຢ່າງແທ້ຈິງ, ທ່ານໄດ້ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າຢູ່ເຂດພາກໃຕ້ຂອງລາວລຸກຮືຂຶ້ນຕໍ່ສູ້ປົດປ່ອຍປະເທດຊາດໃຫ້ຫຼຸດພົ້ນຈາກການກົດຂີ່ຂູດຮີດຂອງພວກສັກດີນາໃນປະເທດ ແລະ ພວກຈັກກະພັດຮຸກຮານ ໂດຍສະເພາະພວກລ່າເມືອງຂຶ້ນຝຣັ່ງ ເພື່ອ ຄວາມເປັນເອກະລາດ ປົກປັກຮັກສາຜືນແຜ່ນດິນຂອງຕົນໄວ້ໃຫ້ຍືນຍົງ ເຊິ່ງການກໍ່ສ້າງອະນຸສາວະລີອົງແກ້ວ ເພື່ອຈາລຶກວິລະກໍາອັນລໍ້າເລີດ ແລະ ເພື່ອເຮັດໃຫ້ຄົນຮຸ່ນຫຼັງໄດ້ຮຽນເອົາຄຸນງາມຄວາມດີ  ແລະ ບົດຮຽນອັນລໍ້າຄ່າທັງເປັນການເສີມຂະຫຍາຍມູນເຊື້ອຮັກຊາດ, ມູນເຊື້ອສາມັກຄີປອງດອງຕໍ່ສູ້ບໍ່ຍອມຈຳນົນຂອງເພິ່ນ ຈົນໄດ້ຮັບນາມມະຍົດເປັນ “ ວິລະບຸລຸດຂອງຊາດລາວ ”. ຂະນະດຽວກັນ, ກໍເປັນສັນຍະລັກແຫ່ງດິນແດນຖິ່ນກຳເນີດວິລະຊົນຄົນກ້າ ແລະ ເປັນສະຖານທີ່ສັກກາລະບູຊາ ທັງເປັນສູນລວມຈິດໃຈເຕົ້າໂຮມ ຄວາມສາມັກຄີຂອງປະຊາຊົນບັນດາເຜົ່າຄຽງຄູ່ກັບຫຼັກເມືອງ, ເປັນບ່ອນອົບຮົມບົ່ມສອນຄົນຮຸ່ນຫຼັງໃຫ້ຮູ້ຮັກເຊື້ອແພງຊາດ, ຮູ້ຄຽດແຄ້ນສັດຕູຂອງຊາດທັງເປັນການເສີມຂະຫຍາຍລັດທິວິລະຊົນ.

ຂະນະທີ່ ທ່ານ ບູ່ໄຊ ໄຊຍະເສນ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງເຊກອງ ກ່າວວ່າ: ຍ້ອນເຫັນໄດ້ວິລະກຳອັນລ້ຳເລີດ, ຄຸນງາມຄວາມດີຂອງເພິ່ນທີ່ມີຕໍ່ປະເທດຊາດ, ກົມການເມືອງສູນກາງພັກໄດ້ຕົກລົງໃຫ້ແຂວງເຊກອງ ສ້າງອະນຸສາວະລີ ແລະ ຫຼໍ່ຮູບ ທ່ານ ອົງແກ້ວ ໃນເນື້ອທີ່ 4 ເຮັກຕາ ແລະ ດໍາເນີນການກໍ່ສ້າງອາຄານ, ນ້ຳພຸ, ສວນສາທາລະນະ ແລະ ເດີ່ນອະເນກປະສົງ, ຕາຂ່າຍໄຟຟ້າ ແລະ ຖານຕັ້ງຮູບຫຼໍ່ອົງແກ້ວ ໂດຍມີມູນຄ່າ 23 ຕື້ກວ່າກີບ. ສ່ວນຮູບຫຼໍ່ອົງແກ້ວຫຼໍ່ດ້ວຍທອງປະສົມ ສູງ 4,90 ແມັດ, ໜັກ 6 ໂຕນ ມູນຄ່າ 1,8 ຕື້ ກວ່າກີບ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ