ສຳລັບນ້ອງໆກຳລັງກຽມຈົບມໍ7 ພາຍໃນນະຄອນຫຼວງຈັນ ຫຼື ຕ່າງແຂວງ ທີ່ມີຄວາມໄຝ່ຝັນຢາກສຶກສາຕໍ່ທີ່ມະຫາວິທະຍາໄລແຫ່ງຊາດປະຈຳສົກຮຽນ 2019-2020 ສາມາດລົງທະບຽນສອບເສັງໄດ້ຜ່ານລະບົບອອນລາຍ ເຊິ່ງເລີ່ມເປີດໃຫ້ລົງທະບຽນນັບແຕ່ວັນທີ 1-30 ກໍລະກົດ ແລະ ສອບເສັງໃນວັນທີ 3 ສິງຫາ 2019ນີ້.
ໂດຍອີງຕາມໜັງສືແຈ້ງການ ສະບັບເລກທີ 1735/ມຊ ນະຄອນຫຼວງວຽງຈັນ ລົງວັນທີ 3 ມິຖຸນາ 2019 ເລື່ອງການຈັດຕັ້ງປະຕິບັດການລົງທະບຽນ ເພື່ອຮັບສະໝັກສອບເສັງຄັດເລືອກເອົານັກສຶກສາເຂົ້າຮຽນຢູ່ ມະຫາວິທະຍາໄລແຫ່ງຊາດ ໃນສົກສຶກສາ 2019-2020, ການລົງທະບຽນສອບເສັງໃນປີນີ້, ທາງມະຫາວິທະຍາໄລແຫ່ງຊາດ ຈະໄດ້ປະຕິບັດການລົງທະບຽນແບບອອນລາຍ (Online) ເພື່ອຮັບສະໝັກສອບເສັງຄັດເລືອກເອົານັກສຶກສາເຂົ້າຮຽນ.
ມະຫາວິທະຍາໄລແຫ່ງຊາດ ຈະໄດ້ສອບເສັງໃນວັນທີ 3 ສິງຫາ 2019, ນັກສຶກສາທີ່ມີຈຸດປະສົງລົງທະບຽນສອບເສັງບໍ່ຈຳເປັນຈ້າງລົດເມມາວຽງຈັນ ສາມາດລົງທະບຽນທາງອອນລາຍ ເລີ່ມແຕ່ວັນທີ 1-30 ກໍລະກົດ 2019. ຫຼັງຈາກລົງທະບຽນຜ່ານທາງອອນລາຍແລ້ວໃຫ້ນໍາເອົາເອກະສານມາສະເໜີ ເພື່ອຮັບບັດອະນຸຍາດເຂົ້າຫ້ອງສອບເສັງ ເລີ່ມວັນທີ 8-30 ກໍລະກົດ 2019 ທີ່ມະຫາວິທະຍາໄລແຫ່ງຊາດ ວິທະຍາເຂດດົງໂດກ (ສະໂມສອນໃຫຍ່).
ກໍລະນີຜູ້ທີ່ບໍ່ສາມາດລົງທະບຽນເອງໄດ້ ແລະ ບໍ່ເຂົ້າໃຈ ແມ່ນສາມາດມາລົງທະບຽນທາງອອນລາຍກັບທີ່ຢູ່ມະຫາວິທະຍາໄລແຫ່ງຊາດ ວິທະຍາເຂດດົງໂດກ (ສະໂມສອນໃຫຍ່) ເລີ່ມແຕ່ວັນທີ 8-30 ກໍລະກົດ 2019.
ສ່ວນເວລາການສອບເສັງ ໃນວັນທີ 3 ສິງຫາ 2019: ກຸ່ມສອບເສັງ A ຕອນເຊົ້າ ເວລາ 9:00-11:00 (120 ນາທີ) ແມ່ນສອບເສັງວິຊາຄະນິດສາດ A + ພາສາລາວ-ວັນນະຄະດີ, ຕອນບ່າຍ ເວລາ 14:00-16:00 (120 ນາທີ) ແມ່ນສອບເສັງວິຊາຟີຊິກສາດ + ເຄມີສາດ + ຊີວະສາດ;
ກຸ່ມສອບເສັງ B ຕອນເຊົ້າ ເວລາ 9:00-11:00 (120 ນາທີ) ແມ່ນສອບເສັງວິຊາຄະນິດສາດ B + ພາສາລາວ-ວັນນະຄະດີ, ຕອນບ່າຍ ເວລາ 14:00-15:30 (90 ນາທີ) ແມ່ນສອບເສັງວິຊາພູມສາດ + ປະຫວັດສາດ ແລະ ກຸ່ມສອບເສັງ C ຕອນເຊົ້າ ເວລາ 9:00-11:00 (120 ນາທີ) ແມ່ນສອບເສັງວິຊາຄະນິດສາດ C+ ເຄມີສາດ + ຊີວະສາດ, ຕອນບ່າຍ ເວລາ 14:00-15:30 (90 ນາທີ) ແມ່ນສອບເສັງວິຊາພູມສາດ + ປະຫວັດສາດ + ພາສາລາວ-ວັນນະຄະດີ.
ສໍາລັບເອກະສານທີ່ນັກຮຽນຕ້ອງປະກອບຄັດຕິດໃສ່ເອກະສານສະໝັກສອບເສັງປະກອບມີ: ສໍາເນົາບົດເຂົ້າຫ້ອງເສັງຈົບ ມ.7 ທີ່ຈົບໃນສົກຮຽນ 2018-2019 (1 ສະບັບ); ສໍາເນົາປະກາສະນິຍະບັດຈົບ ມ.7 ທີ່ຈົບ ມ.7 ກ່ອນສົກຮຽນ 2018-2019 (1 ສະບັບ); ສໍາເນົາບັດປະຈໍາຕົວ ຫຼື ສໍາເນົາປຶ້ມສໍາມະໂນຄົວທີ່ມີຮູບຜູ້ສະໝັກຕິດຢູ່ (1 ສະບັບ); ຮູບຖ່າຍຂະໜາດ 3×4 ຖ່າຍບໍ່ເກີນ 3 ເດືອນ ຈໍານວນ 2 ໃບ (ສໍາລັບນັກຮຽນຈົບ ມ.7 ສົກຮຽນ 2018-2019 ໃຫ້ເອົາຮູບດຽວກັນກັບຮູບໃນບັດເຂົ້າຫ້ອງສອບເສັງຈົບ ມ.7. ເອກະສານທຸກຊະນິດຕ້ອງມີຕົ້ນສະບັບມາຢັ້ງຢືນເພື່ອກວດສອບຄວາມຖືກຕ້ອງ. ນັກສຶກສາສາມາດຕິດຕາມລາຍຊື່ ແລະ ສະຖານທີ່ສອບເສັງໃນວັນທີ 2 ສິງຫາ 2019.
