ພາຍຫຼັງລໍຄອຍມາດົນນານພໍສົມຄວນ ໂຄງການກໍ່ສ້າງຕ້ານເຈື່ອນແຄມຂອງ ແຂວງສະຫວັນນະເຂດ ຄວາມຍາວເກືອບ 1 ກິໂລແມັດ. ຫຼ້າສຸດ, ໄດ້ມີພິທີເຊັນສັນຍາຈັດຊື້ – ຈັດຈ້າງບໍລິສັດຮັບເໝົາກໍ່ສ້າງ ຄາດຈະເລີ່ມລົງມືກໍ່ສ້າງໃນເດືອນກໍລະກົດນີ້ ຈະໃຫ້ສຳເລັດພາຍໃນ 2 ປີ.
ພິທີເຊັນສັນຍາຈັດຊື້ – ຈັດຈ້າງ ບໍລິສັດ ຮັບເໝົາກໍ່ສ້າງຕ້ານເຈື່ອນແຄມຂອງ ພ້ອມທາງເບຕົງລຽບແຄມຂອງ ຍາວ 980 ແມັດ ສຳລັບໂຄງການພັດທະນາຕົວເມືອງຕາມແລວເສດຖະກິດຕາເວັນ ອອກ – ຕາເວັນຕົກ ອະນຸພາກພື້ນແມ່ນ້ຳຂອງ ( ໂຄງການ GMS ) ລະຫວ່າງພະແນກໂຍທາທິການ ແລະ ຂົນສົ່ງ ແຂວງສະຫວັນນະເຂດ ກັບ ບໍລິສັດ ລາວມີໄຊ ກໍ່ສ້າງ ຈຳກັດຜູ້ດຽວ ໄດ້ຈັດຂຶ້ນໃນອາທິດຜ່ານມາ ທີ່ຮ້ານອາຫານລາວວິວ ນະຄອນໄກສອນ ພົມວິຫານ ໂດຍການເປັນກຽດເຂົ້າຮ່ວມຂອງ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ທ່ານ ຄຳທະວີ ໄທພະຈັນ ຫົວໜ້າກົມເຄຫາ – ຜັງເມືອງ ກະຊວງ ຍທຂ, ທ່ານ ປະສົງສິນ ຈະເລີນສຸກ ຫົວໜ້າພະແນກ ຍທຂ ແຂວງ, ທ່ານ ພົມມາ ວົງພະຈິດ ຫົວໜ້າໂຄງການ GMS ແລະ ທ່ານ ສີພັນດອນ ມີໄຊ ຜູ້ອຳນວຍການ ບໍລິສັດ ລາວມີໄຊ ກໍ່ສ້າງ ຈຳກັດຜູ້ດຽວ. ຈາກນີ້, ກໍມີພະແນກການ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ, ທ່ານ ນາລົງ ສຸລິຍະວົງສາ ຮອງຫົວໜ້າໂຄງການ GMS ໄດ້ລາຍງານວ່າ: ໂຄງການກໍ່ສ້າງຕາຝັ່ງເຈື່ອນ ແລະ ເສັ້ນທາງລຽບແຄມຂອງຍາວ 980 ແມັດ ແມ່ນ 1 ໃນ 7 ໂຄງການຍ່ອຍທີ່ຕັ້ງຢູ່ໃນເທສະບານນະຄອນໄກສອນ ພົມວິຫານ ເຊິ່ງເຫດຜົນການຊັກຊ້າໃນການຈັດຕັ້ງປະຕິບັດໂຄງການຕ້ານເຈື່ອນແຄມຂອງ ເນື່ອງຈາກວ່າການອອກແບບລະອຽດດ້ານວິສະວະກຳ, ທຶນທະນາຄານພັດທະນາອາຊີໃຫ້ວຽກກໍ່ສ້າງ 6 ໂຄງການຍ່ອຍແມ່ນ 29 ລ້ານກວ່າໂດລາສະຫະລັດ, ປະເມີນລາຄາຂອງຊ່ຽວຊານ 28,4 ລ້ານໂດລາສະຫະລັດ ແລະ ຮັກສາໄວ້ສຳລັບໂຄງການປ້ອງກັນເຈື່ອນແຄມຂອງ 1 ແສນໂດລາສະຫະລັດ. ພາຍຫຼັງປະຕິບັດ 6 ໂຄງການຍ່ອຍຈຶ່ງສາມາດປະຢັດເງິນໄດ້ 31% ຂອງຈຳນວນເງິນ ແລະ ສືບຕໍ່ອອກແບບປ້ອງກັນຕາຝັ່ງເຈື່ອນແຄມຂອງ 980 ແມັດ ລວມທັງເສັ້ນທາງເບຕົງ ເຊິ່ງແມ່ນ ບໍລິສັດ ລາວມີໄຊ ກໍ່ສ້າງ ຈຳກັດຜູ້ດຽວ ເປັນຜູ້ຊະນະການປະມູນໃນມູນຄ່າ 4,5 ລ້ານໂດລາສະຫະລັດ ໂດຍການກໍ່ສ້າງແມ່ນຈະໃຫ້ສຳເລັດໃນໄລຍະເວລາ 2 ປີ ຄາດວ່າຈະເລີ່ມລົງມືການກໍ່ສ້າງໃນເດືອນກໍລະກົດທີ່ຈະເຖິງນີ້ ໂດຍຈະເຮັດການກໍ່ສ້າງເສັ້ນທາງເບຕົງກ່ອນ.
ໂຄງການກໍ່ສ້າງຕ້ານເຈື່ອນແຄມຂອງ ແມ່ນເລີ່ມຕົ້ນຈາກທ່າບັກເກົ່າລຽບແຄມຂອງລົງໄປຕາມສາຍນ້ຳ ຍາວ 980 ແມັດ, ມີເນື້ອທີ່ຂອງການຖົມຂະຫຍາຍສວນສາທາລະນະ 15.340 ຕາແມັດ, ລະດັບການຖົມຕະຫຼອດແລວ ຕາມການຕົກລົງເຫັນດີໃນກອງປະຊຸມຄັ້ງກ່ອນແມ່ນ 114 ຕາແມັດ, ໄລຍະທາງລົງທ່າບັກຫາຫໍມະເຫສັກ ມີການກໍ່ຝາກັນເຈື່ອນລວງຍາວປະມານ 130 ແມັດ ເພື່ອບໍ່ໃຫ້ການຖົມຂະຫຍາຍເນື້ອທີ່ກະທົບເຖິງທາງລົງທ່າບັກ. ພ້ອມນັ້ນ, ກໍຍັງມີເນື້ອທີ່ສຳລັບໃຊ້ຂັດກິດຈະກຳຕ່າງໆ ເຊັ່ນ: ເດີ່ນກວ້າງອະເນກປະສົງ, ສະຖານທີ່ເດັກນ້ອຍຫຼິ້ນ, ເດີ່ນອອກກຳລັງກາຍດ້ວຍການເຕັ້ນແອໂຣບິກ, ເດີ່ນອອກກຳລັງກາຍດ້ວຍການໃຊ້ອຸປະກອນ, ເດີ່ນເບຕັງ, ສວນພັກຜ່ອນນັ່ງຫຼິ້ນ, ຮ້ານຄ້າປະມານ 20 ຫ້ອງ, ຫ້ອງນ້ຳສາທາລະນະ, ບ່ອນຈອດລົດຈັກ, ບ່ອນຈອດລົດໃຫຍ່, ບ່ອນນັ່ງພັກຜ່ອນຢູ່ກ້ອງຕົ້ນໄມ້ ໃຫຍ່, ຮົ້ວອ້ອມເຂດຕົ້ນໄມ້ໃຫຍ່ ແລະ ສານພະພູມ, ມີການປັບປຸງບ່ອນເຮືອໂດຍສານເຂົ້າທຽບທ່າຢູ່ອາຄານດ່ານພາສີ ລວມເຖິງບ່ອນຈອດເຮືອໂດຍສານ, ມີຂັ້ນໄດລົງຫານ້ຳຂອງທຸກໆໄລຍະ 100 ແມັດ, ມີລະບົບລະບາຍນ້ຳລົງສູ່ນ້ຳຂອງ ຈຳນວນ 4 ຈຸດ.
