ລັດຖະບານການາດາປະກາດແຜນແບນການໃຊ້ຜະລິດຕະພັນພລາສຕິກແບບ “ໃຊ້ຄັ້ງດຽວຖິ້ມ” ເຊັ່ນ: ຫຼອດດູດກາເຟ “ຢ່າງໄວທີ່ສຸດ” ພາຍໃນປີ 2021.
ສໍານັກຂ່າວຕ່າງປະເທດລາຍງານຈາກນະຄອນຫຼວງອັອດຕາວາ ປະເທດການາດາ ເມື່ອວັນຈັນ ທີ 10 ມິຖຸນາ ວ່າ ນາຍົກລັດຖະມົນຕີຈັສຕິນ ທຣູໂດ ຖະແຫຼງ ເມື່ອວັນຈັນ ວ່າ ການຫ້າມໃຊ້ຜະລິດຕະພັນພລາສຕິກເພື່ອການອຸປະໂພກບໍລິໂພກແບບ “ໃຊ້ຄັ້ງດຽວຖິ້ມ” ເຊັ່ນຫຼອດດູດກາເຟ, ອຸປະກອນຮັບປະທານອາຫານ ແລະ ຖົງພລາສຕິກຈະມີຜົນບັງຄັບໃຊ້ໃນປະເທດການາດາ “ຢ່າງໄວທີ່ສຸດ” ພາຍໃນປີ 2021 ໂດຍ ທ່ານທຣູໂດ ກ່າວວ່າ ນະໂຍບາຍດັ່ງກ່າວຖືເປັນ “ໂອກາດດີ” ຂອງການາດາ ເຊິ່ງປັດຈຸບັນຂະບວນການລີໄຊເຄິລຂີ້ເຫຍື້ອພລາສຕິກໃນປະເທດໜ້ອຍກວ່າ 10% ໃນການປັບປ່ຽນພຶດຕິກໍາເພື່ອຮ່ວມເປັນໜຶ່ງໃນຜູ້ນໍາການຫຼຸດມົນລະພິດຂີ້ເຫຍື້ອໂລກ ໃນຖານະເປັນປະເທດທີ່ມີຄວາມຍາວຂອງແຄມຝັ່ງຫຼາຍທີ່ສຸດ.
ທັງນີ້ ຜູ້ນໍາການາດາໃຫ້ເຫດຜົນເຖິງການກໍານົດໄລຍະເວລາຜ່ອນຜັນສໍາລັບທຸກຝ່າຍ ດົນເກືອບ 2 ປີ ວ່າ ກ່ຽວຂ້ອງກັບ “ການວິໄຈທາງວິທະຍາສາດ” ໂດຍລັດຖະບານຈະໃຊ້ໄລຍະເວລານີ້ ທະຍອຍປະກາດລາຍະລະອຽດ ແລະ ປະເພດຂອງພລາສຕິກທີ່ເຂົ້າຂ່າຍຕ້ອງຫ້າມຕໍ່ໄປ ຂະນະດຽວກັນ ຍັງເປັນການໃຫ້ເວລາກັບຜູ້ປະກອບການພລາສຕິກໃນການປ່ຽນແປງການຜະລິດສິນຄ້າຂອງຕົນເອງດ້ວຍ.
ຄວາມເຄື່ອນໄຫວດັ່ງກ່າວຂອງລັດຖະບານອັອດຕາວາ ເກີດຂຶ້ນຫຼັງການເປັນເຈົ້າພາບຈັດການປະຊຸມກຸ່ມປະເທດອຸດສາຫະກໍາຊັ້ນນໍາ “ຈີ 7” ທີ່ເມືອງຄວິເບກ ເມື່ອປີຜ່ານມາ ເຊິ່ງສະມາຊິກໄດ້ແກ່: ການາດາ, ຝຣັ່ງ, ເຢຍລະມັນ, ສະຫະຣາຊະອານາຈັກ ແລະ ອິຕາລີ ຕະຫຼອດຈົນສະຫະພາບເອີຣົບ (EU) ຮ່ວມກັນລົງນາມໃນກົດໝາຍວ່າດ້ວຍການກໍານົດແນວທາງເພິ່ມຕື່ມ ເພື່ອຕໍ່ສູ້ກັບປັນຫາສິ່ງແວດລ້ອມໂລກ ແຕ່ເປັນທີ່ສັງເກດ ວ່າ ສະຫະລັດ ແລະ ຍີ່ປຸ່ນ ເຊິ່ງເປັນສະມາຊິກ ຈີ7 ເຊັ່ນກັນ ຍັງປະຕິເສດລົງນາມໃນກົດໝາຍດັ່ງກ່າວ ໂດຍທັງສອງປະເທດຢູ່ໃນກຸ່ມສົ່ງອອກຂີ້ເຫຍື້ອຫຼາຍເປັນອັນດັບຕົ້ນໆຂອງໂລກ.
ຢ່າງໃດກໍ່ຕາມ ທ່າທີຂອງການາດາ ຍັງເກີດຂຶ້ນລະຫວ່າງຄວາມຂັດແຍ່ງເລື່ອງຂີ້ເຫຍື້ອພລາສຕິກກັບກຸ່ມປະເທດໃນອາຊີຕາເວັນອອກສຽງໃຕ້ ໂດຍສະເພາະປະເທດຟິລິບປິນ ຈົນລັດຖະບານອັອດຕາວາເປັນຝ່າຍສົ່ງເຮືອບັນທຸກສິນຄ້າມາຂົນເອົາຕູ້ຄອນເທັນເນີບັນຈຸຂີ້ເຫຍື້ອມາຖິ້ມ ລະຫວ່າງປີ 2013-2014 ກັບຄືນປະເທດ ເມື່ອທ້າຍເດືອນພຶດສະພາ ຜ່ານມາ ຫຼັງຜະເຊີນກັບການກົດດັນຢ່າງໜັກຈາກປະທານາທິບໍດີໂລດຣິໂກ ດູເຕເຕ ຂອງຟິລິບປິນ.
