ສໍານັກຂ່າວຊິນຫົວຂອງຈີນ ລາຍງານເມື່ອວັນສຸກ ທີ 7 ມິຖຸນາ ວ່າ ການຍົດລະດັບສາຍສໍາພັນຮ່ວມມື ຈີນ-ຣັດເຊຍ ເຊິ່ງຢູ່ໃນລະດັບດີທີ່ສຸດໃນປະວັດສາດ ໄດ້ກ້າວໜ້າສູ່ “ຍຸກໃໝ່ແຫ່ງການພັດທະນາອັນຍິ່ງໃຫຍ່” ຂະນະທີ່ ປະທານປະເທດສີ ຈິ້ນຜິງ ເດີນທາງຢ້ຽມຢາມຣັດເຊຍ ແລະ ພົບປະກັບ ທ່ານວະລາດິເມຍ ປູຕິນ ປະທານາທິບໍດີຣັດເຊຍ.
ທ່ານສີ ຈິ້ນຜິງ ໄດ້ຫາລືກັບ ທ່ານປູຕິນ ທັງສອງຮ່ວມລົງນາມຖະແຫຼງການສໍາຄັນ ເພື່ອພັດທະນາຄວາມສໍາພັນລະດັບທະວີພາຄີສູ່ການເປັນຫຸ້ນສ່ວນຄວາມຮ່ວມມືດ້ານຍຸດທະສາດຢ່າງຮອບດ້ານ ລວມເຖິງຖະແຫຼງການສົ່ງເສີມສະຖຽນລະພາບດ້ານຍຸດທະສາດໂລກຍຸກປັດຈຸບັນ.
ການເດີນທາງຢ້ຽມຢາມ ຣັດເຊຍ ຢ່າງເປັນທາງການຂອງ ທ່ານສີ ຈິ້ນຜິງ ມີຂໍ້ສໍາຄັນເບື້ອງຫຼັງຂອງສະຖານະການລະຫວ່າງປະເທດ ທີ່ກໍາລັງເກີດຄວາມສະຫຼັບຊັບຊ້ອນ ແລະ ຄວາມບໍ່ໝັ້ນຄົງອັນແນ່ນອນ.
ຈີນ ແລະ ຣັດເຊຍ ທີ່ສະຖາປະນາຄວາມສໍາພັນທາງການທູດ ຄົບ 70 ປີ ໃນປີ 2019 ນັ້ນ ແບກຮັບຄວາມຄາດຫວັງອັນໃຫຍ່ຍິ່ງຈາກປະຊາຊົນ ແລະ ປະຊາຄົມນານາຊາດ ຂະນະໂລກ ກໍາລັງປະເຊີນໜ້າກັບຄວາມປ່ຽນແປງຄັ້ງໃຫຍ່.
ການຂະຫຍາຍສາຍສໍາພັນຂອງຈີນ ແລະ ຣັດເຊຍ ຈຶ່ງເປັນສິ່ງສໍາຄັນໃນປະຫວັດສາດ ອີກທັງເປັນຕົວເລືອກດ້ານຍຸດທະສາດອັນເຂັ້ມແຂງຂອງທັງສອງຝ່າຍ.
ການເດີນໜ້າສູ້ສຸກໃໝ່ ຈີນ ແລະ ຣັດເຊຍ ຄາດຫວັງຈະເສີມສ້າງການສື່ສານ ແລະ ຄວາມຮ່ວມມືດ້ານຍຸດທະສາດໃຫ້ເຂັ້ມແຂງຍິ່ງຂຶ້ນ ໂດຍເນັ້ນການສະໜັບສະໜຸນເຊິ່ງກັນ ແລະ ກັນ ໃນປະເດັນຕ່າງໆ ໂດຍຄໍານຶງເຖິງຜົນປະໂຫຍດຫຼັກຂອງຊາດ ແລະ ສົ່ງເສີມການຍົກລະດັບຄວາມຮ່ວມມືທາງເສດຖະກິດ ແລະ ການຄ້າຢ່າງຮອບດ້ານ.
ທັງສອງຝ່າຍຈະສະແຫວງຫາການເຮັດວຽກຮ່ວມກັນ ແລະ ຄວາມຮ່ວມມືລະຫວ່າງແຜນການລິເລີ່ມໜຶ່ງແລວໜຶ່ງເສັ້ນທາງ (BRI) ຂອງຈີນ ແລະ ສະຫະພາບເສດຖະກິດຢູເຣເຊຍ (EEU) ທີ່ນໍາໂດຍຣັດເຊຍ ຢ່າງແຂງຂັນຍິ່ງຂຶ້ນ.
ນອກຈາກນັ້ນ, ຈີນ ແລະ ຣັດເຊຍ ຍັງຈະເດີນໜ້າການແລກປ່ຽນລະດັບປະຊາຊົນ ໂດຍຈະມີການວາງແຜນການເປັນຢ່າງດີ ເພື່ອຊຸກດັນ ປີແຫ່ງວິທະຍາສາດ ແລະ ນະວັດຕະກໍາ ເທັກໂນໂລຢີ ຈີນ-ຣັດເຊຍ 2020-2021.
ຈີນ ແລະ ຣັດເຊຍ ຈະສົ່ງເສີມການສື່ສານ ແລະ ຄວາມຮ່ວມມືໃນອົງກອນລະຫວ່າງປະເທດຕ່າງໆ ເຊັ່ນ: ສະຫະປະຊາຊາດ (UN), ອົງການຄວາມຮ່ວມມືຊ່ຽງໄຮ້ (SCO), ກຸ່ມຊາດເສດຖະກິດບຣິກສ໌ (BRICS), ກຸ່ມເອເປັກ (APEC) ແລະ ກຸ່ມຈີ 20 (G20) ເພື່ອຮ່ວມປົກປ້ອງລັດທິພະຫຸພາຄີ ແລະ ບັນທັດຖານຄວາມສໍາພັນລະຫວ່າງປະເທດ.