ຈາກເຫດການທີ່ມີຝົນຕົກໜັກ ເຮັດໃຫ້ດິນເຈື່ອນທັບຄົນເສຍຊີວິດ 4 ຄົນ ແລະ ເຈັບໜັກ 1 ຄົນ ໃນວັນທີ 2 ມິຖຸນາ 2019 ຢູ່ບ້ານນາກາງ ເມືອງໃໝ່ ແຂວງຜົ້ງສາລີ. ສະນັ້ນ, ໃນຕອນແລງຂອງວັນດຽວກັນທາງອົງການປົກຄອງ ແຂວງຜົ້ງສາລີ ກໍໄດ້ນຳເອົາເງິນສົດຈຳນວນ 10 ລ້ານກີບ, ເຂົ້າສານ 200 ກິໂລ ແລະ ສາດປູ 10 ຜືນ ພ້ອມເງິນສົດ 5 ລ້ານກີບ ຂອງອົງການປົກຄອງເມືອງໃໝ່ ໄປມອບໃຫ້ຜູ້ຖືກເຄາະຮ້າຍດັ່ງກ່າວ ຕາງໜ້າອົງການປົກຄອງແຂວງຜົ້ງສາລີ ກ່າວມອບໂດຍແມ່ນ ທ່ານ ທອງສີ ເສົາສຸລິພົມ ຮອງເຈົ້າແຂວງຜົ້ງສາລີ ແລະ ທ່ານ ສົມຈິດ ສິດທິວົງ ເຈົ້າເມືອງໃໝ່ ແລະ ກ່າວຮັບໂດຍແມ່ນຍາດພີ່ນ້ອງຂອງຜູ້ຖືກເຄາະຮ້າຍ ໂດຍຊ້ອງໜ້າຈາກອົງການປົກຄອງແຂວງ, ເມືອງ ແລະ ບ້ານນາກາງ ເຂົ້າຮ່ວມເປັນສັກຂີພິຍານ.
ສຳລັບຜົນເສຍຫາຍໃນຄັ້ງນີ້ຕາມການລົງປະເມີນເບື້ອງຕົ້ນຂອງຫ້ອງການແຮງງານ – ສະຫວັດດີການສັງຄົມ ເມືອງໃໝ່ ໃຫ້ຮູ້ວ່າ: ຈາກການລົງເກັບກຳຂໍ້ມູນຕົວຈິງໃນມື້ເກີດເຫດ ເຫັນວ່າເຫດການດິນເຈື່ອນທັບຖົມເຮືອນ ເຮັດໃຫ້ມີຜູ້ເສຍຊີວິດ 4 ຄົນ ເຊິ່ງໃນຄອບຄົວດັ່ງກ່າວມີ 5 ຄົນ. ໃນນັ້ນ, ພໍ່ແມ່ ແລະ ລູກຊາຍຝາແຝດອີກ 2 ຄົນ ເສຍຊີວິດຄາທີ່; ສໍຳລັບຜູ້ໄດ້ຮັບບາດເຈັບໜັກ ແມ່ນເປັນລູກຊາຍອາຍຸ 8 ປີ ລົດຈັກ 2 ຄັນ ແລະ ເຄື່ອງໃຊ້ໃນເຮືອນເສຍຫາຍ 100% ປະເມີນມູນຄ່າເສຍຫາຍເບື້ອງຕົ້ນ 385 ລ້ານກີບ.
ທ່ານ ທອງເລົາ ວົງອິນຄຳ ຮອງຫົວໜ້າພະແນກແຮງງານສະຫວັດດີການສັງຄົມ ແຂວງຜົ້ງສາລີ ໃຫ້ຮູ້ວ່າ: ສຳລັບເຫດການດິນເຈື່ອນທັບເຮືອນເຮັດໃຫ້ມີຜູ້ເສຍຊີວິດ 4 ຄົນ ແລະ ລອດ 1 ຄົນ ຢູ່ເມືອງໃໝ່ນັ້ນ ເດັກທີ່ລອດຕາຍ 1 ຄົນ ແມ່ນຄົນພິການ. ສະນັ້ນ, ຕໍ່ເຫດການດັ່ງກ່າວມາຮອດປັດຈຸບັນອົງການປົກຄອງແຕ່ລະຂັ້ນໄດ້ນຳເອົາວັດຖຸ ແລະ ເງິນໄປຊ່ວຍເຫຼືອແລ້ວ, ພີ່ນ້ອງ ແລະ ປະຊາຊົນບັນດາເຜົ່າພວມໃຫ້ການຊ່ວຍເຫຼືອ ແລະ ໃຫ້ກຳລັງໃຈແກ່ຜູ້ລອດຊີວິດ ແລະ ພີ່ນ້ອງຜູ້ຖືກເຄາະຮ້າຍຢ່າງໃກ້ຊິດ.
ສໍຳລັບທ່ານໃດທີ່ມີນຳໃຈຢາກໃຫ້ການຊ່ວຍເຫຼືອຜູ້ຖືກເຄາະຮ້າຍຄັ້ງນີ້ ແມ່ນສາມາດພົວພັນນຳພີ່ນ້ອງຂອງຜູ້ກ່ຽວໂດຍກົງ ຫຼື ພົວພັນນຳອົງການປົກຄອງແຂວງຜົ້ງສາລີ, ອົງການປົກຄອງເມືອງໃໝ່ກໍໄດ້.
( ຂ່າວ: ສົມຄິດ ແກ້ວນວນລາ )
