ໃນເວລາປະມານ 8:00 ໂມງ ຂອງວັນທີ 23 ພຶດສະພາ 2019 ທາງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວສະຫວັນນະເຂດ ໄດ້ສົມທົບກັບທະຫານຊາຍແດນແຂວງກວາງຈິ ສສ ຫວຽດນາມ ໄດ້ສືບຮູ້ວ່າ: ມີຄົນບໍ່ດີຈຳນວນໜຶ່ງກຳລັງເຄື່ອນໄຫວຄ້າຂາຍຢາເສບຕິດປະເພດຢາບ້າ ຢູ່ຂອບເຂດເມືອງເຊໂປນ ແຂວງສະຫວັນນະເຂດ.
ດັ່ງນັ້ນ, ຈຶ່ງຈັດຕັ້ງກຳລັງວິຊາສະເພາະເພື່ອມ້າງຄະດີດັ່ງກ່າວ ຈົນມາຮອດເວລາປະມານ 10:30 ໂມງ ຂອງວັນດຽວກັນ ຈຶ່ງສາມາດກັກຕົວເປົ້າໝາຍໄດ້ 3 ຄົນ ຊື່ທ້າວ ໄມຄຳ ສຸກພົມມີ ອາຍຸ 40 ປີ ອາຊີບກຳມະກອນ ບ້ານທ່າແຂກກາງ ເມືອງທ່າແຂກ ແຂວງຄຳມ່ວນ, ທ້າວ ເສກສັນ ສີທອງ ຫຼື ຕ໋ອງ ອາຍຸ 40 ປີ ອາຊີບເຮັດນາ ບ້ານມັນປາ ເມືອງໜອງບົກ ແຂວງຄຳມ່ວນ ແລະ ທ້າວ ປອງສະຫວັນ ຍືນຍົງ ຫຼື ປອງ ອາຍຸ 46 ປີ ອາຊີບກຳມະກອນ ບ້ານໂພນ ເມືອງໜອງບົກ ແຂວງຄຳມ່ວນ ພ້ອມຂອງກາງຢາບ້າ 50 ມັດ ເທົ່າກັບ 1 ແສນເມັດ ແລະ ໂທລະສັບ 3 ໜ່ວຍ, ລົດໃຫຍ່ນິສສັນນາວາຣາ ເລກທະບຽນ ກຄ 9886 ສະຫວັນນະເຂດ 1 ຄັນ, ຜ່ານການສືບສວນ – ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້ໂດຍໄດ້ຊື້ມາຈາກເພື່ອນຮ່ວມຂະບວນການຂອບເຂດແຂວງບໍລິຄຳໄຊ ໃນລາຄາມັດລະ 2 ໝື່ນບາດ ມາຂາຍຕໍ່ໃຫ້ລູກຄ້າຫວຽດນາມ ໃນລາຄາມັດລະ 6 ໝື່ນບາດ, ແຕ່ຖືກເຈົ້າໜ້າທີ່ີ່ຈັບໄດ້ເສຍກ່ອນ, ປັດຈຸບັນຄະດີດັ່ງກ່າວຍັງສືບຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍບ້ານເມືອງຕໍ່ໄປ.
