ຮຽນທາງລັດແຕ່ໜຸ່ມນ້ອຍ, 16 ປີຄ້າຢາຕັ້ງ 60 ມັດ

32

ຄົນເຮົາເກີດມາມີຫຼາຍເສັ້ນທາງໃຫ້ເລືອກເດີນ, ເມື່ອເຮົາຍ່າງໄປໃນທາງທີ່ຖືກຊີວິດເຖິງຈະບໍ່ລາບລື່ນແຕ່ກໍ່ຍືນຍາວ ແຕ່ເມື່ອເຮົາຫຼົງທາງຜິດແລ້ວບໍ່ຈັກສຳນຶກກ້າວໄປເລື້ອຍໆສຸດທ້າຍບໍ່ເປັນບ້າເສຍຈິດກໍ່ຈົບລົງທີ່ການຮັບໂທດທາງກົດໝາຍດັ່ງຄະດີລາຍນີ້ ເດັກອາຍຸ 16 ປີ ຮຽນຮູ້ການຫາເງິນ ແຕ່ຫຼົງທາງໄປເປັນເຫຍື່ອຂອງຢາບ້າ, ອາຍຸບໍ່ເຖິງ 18 ປີກໍ່ຕ້ອງໄປຮັບໂທດແລ້ວ!!!

ໃນຕອນບ່າຍຂອງວັນທີ 30 ພຶດສະພານີ້, ຢູ່ທີຫ້ອງປະຊຸມສານຂັ້ນຕົ້ນແຂວງອຸດົມໄຊ ໄດ້ຮັບຟັງການອ່ານຄໍາຖະແຫຼງຂອງອົງການໄອຍະການປະຊາຊົນແຂວງທີ່ເປັນໂຈດສະບັບເລກທີ 03/ອຍກຂ.ອຊ ລົງວັນທີ 9.5 2019 ແລະ ປະເດັນຄໍາຕັດສີນຄະດີອາຍາ ເລກທີ 003/ຂຕ.ດ ລົງວັນທີ 29 ພຶດສະພາ 2019 ໂດຍຊ່ອງໜ້າຄະນະສານອາຍາ, ອົງການກຽ່ວຂ້ອງ, ຍາດພີ່ນ້ອງຄອບຄົວ ແລະ ຈໍາເລີຍ ບວກກັບຄໍາຮັບສາລະພາບຂອງຈໍາເລີຍ ຊື່ ທ້າວ ເກັ່ງທໍ່ ອາຍຸ 16 ປີ ອາຊີບຄ້າຂາຍ ຢູ່ບ້ານຜາເມືອງ ເມືອງບໍລິຄັນ ແຂວງບໍລິຄຳໄຊ, ຖືກກັກຕົວໃນວັນທີ 16 ສິງຫາ 2018 ຂໍ້ຫາຄ້າຂາຍຢາເສບຕິດ ແລະ ມີຢາເສບຕິດໄວ້ຄອບຄອງ ( ປະເພດຢາບ້າ ) ຈຳນວນ 60 ມັດ, ມີ 120.000 ເມັດ, ນ້ຳໜັກ 14 ກິໂລກຣາມ.

ຜ່ານການຄົ້ນຄວ້າ ແລະ ພິຈາລະນາຢ່າງລະອຽດຖີ່ຖ້ວນ ຄະນະສານອາຍາຂັ້ນຕົ້ນແຂວງ ອຸດົມໄຊ ລົງໂທດຕັດອິດສາຫຼະພາບ ທ້າວ ເກັ່ງທໍ່ ( ຈຳເລີຍ ) 20 ປີ, ປັບໃໝ 500.000.000 ກີບ. ສົ່ງໂທລະສັບມືຖື ຍີ່ຫໍ້ ຫົວເຫວີຍ ( HUAWEI ) ສີທອງ ໜຶ່ງເຄື່ອງ, ໂມງໃສ່ແຂນ ຍີ່ຫໍ້ ບີລູຊິ ( BELUSHI ) ສີດໍາ ຫນຶ່ງເຄື່ອງ ແລະ ເງີນ 1.000.000 ກີບ ຄືນໃຫ້ແກ່ຈຳເລີຍ , ຮີບຢາເສບຕິດປະເພດ ຢາບ້າ ຈຳນວນ 60 ມັດ, ມີ 120.000 ເມັດ, ນ້ຳໜັກ 14 ກິໂລກຣາມ ຂອງຈຳເລີຍມາທຳລາຍຖິ້ມ, ຮີບລົດກະບະ ຍີ່ຫໍ້ ວີໂກ້ ( VIGO ) ສີປອນເງີນ ໝາຍເລກທະບຽນ ຊຽງຂວາງ ກກ 6818 ຂອງທ້າວ ກົງເມັງວື ແລະ ໂທລະສັລມືຖື ຍີ່ຫໍ້ ຢູ່ນີເທວ ( unitel ) ສີດໍາ ໜຶ່ງເຄື່ອງ ຂອງທ້າວ ກົງເມັງວື ທີ່ ທ້າວ ເກັ່ງທໍ່ ໄດ້ເອົາມານໍາໃຊ້ເຂົ້າໃນການເຄື່ອນໄຫວກະທໍາຜິດ ມາເປັນຂອງລັດ.