ການກໍ່ສ້າງຫ້ອງການ ປກສ ເມືອງແກ່ນທ້າວ ຄືບໜ້າກວ່າ 30%

73

ໂຄງການກໍ່ສ້າງຫ້ອງການ ປກສ ເມືອງແກ່ນທ້າວ ແຂວງໄຊຍະບູລີ ເລີ່ມລົງມືກໍ່ສ້າງມາແຕ່ທ້າຍປີ 2018. ຫຼ້າສຸດ, ໃນວັນທີ 29 ພຶດສະພາ 2019 ນີ້ ທ່ານ ພັນເອກ ຄໍາແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ, ທ່ານ ສໍາລານ ສຸວັນນະໂຊດ ເຈົ້າເມືອງແກ່ນທ້າວ ພ້ອມດ້ວຍຄະນະໄດ້ລົງຕິດຕາມ, ກວດກາ ແລະ ຊຸກຍູ້ໂຄງການດັ່ງກ່າວເຫັນວ່າມາຮອດປັດຈຸບັນຄືບໜ້າແລ້ວ 30%.

ການລົງຕິດຕາມກວດກາຄັ້ງນີ້ໄດ້ຮັບຟັງການລາຍງານສະພາບຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດໜ້າວຽກຕົວຈິງຈາກບໍລິສັດທີ່ຮັບເໝົາ ເຊິ່ງໂຄງການຕັ້ງຢູ່ເຂດບ້ານທ້າວແກ່ນ ເມືອງແກ່ນທ້າວ ປະກອບມີ 5 ໜ້າວຽກ ຄື: ວຽກຕັດດິນ, ຖົມດິນສະຖານທີ່ກໍ່ສ້າງ, ວຽກກໍ່ສ້າງຫ້ອງການ 2 ຊັ້ນ, ວຽກເຟີນີເຈີ, ຮ່ອງລະບາຍນໍ້າ – ຂຸມພັກນໍ້າ, ທໍ່ລອດທາງ, ວຽກເທເບຕົງ, ຫຼັກທຸງ, ເດີ່ນຫຍ້າ ແລະ ຕົ້ນໄມ້ປະດັບ ແລະ ວຽກຕາຂ່າຍໄຟຟ້າ, ເຈາະນໍ້າບາດານ. ໂຄງການດັ່ງກ່າວໄດ້ເລີ່ມລົງມືກໍ່ສ້າງແຕ່ເດືອນກັນຍາ ປີ 2018 ມາເຖິງປັດຈຸບັນແມ່ນສໍາເລັດກວ່າ 30% ໂດຍແມ່ນບໍລິສັດ PKS ກໍ່ສ້າງ ຈໍາກັດຜູ້ດຽວ ເປັນຜູ້ຮັບເໝົາໃນມູນຄ່າການກໍ່ສ້າງທັງໝົດ 8,95 ຕື້ກວ່າກີບ ກໍານົດສັນຍາພາຍໃນ 36 ເດືອນ ຈະໃຫ້ສໍາເລັດ.

ຈາກນັ້ນ, ຄະນະທີມງານພ້ອມດ້ວຍເຈົ້າຂອງໂຄງການ ແລະ ຜູ້ຮັບເໝົາໂຄງການກໍ່ສ້າງ ກໍໄດ້ປຶກສາຫາລືແລກປ່ຽນຄໍາຄິດເຫັນ ເພື່ອພ້ອມກັນຄົ້ນຄວ້າຊອກຫາວິທີແກ້ໄຂບາງໜ້າວຽກທີ່ຍັງຄ້າງຄາ ເພື່ອແນໃສ່ເຮັດໃຫ້ໂຄງການສໍາເລັດຕາມລະດັບຄາດໝາຍ ແລະ ຮັບປະກັນມາດຕະຖານເຕັກນິກ.

( ຂ່າວ: ສາຄອນ ໄຊສົມຮັກສາ )