ການຄ້າ ລາວ – ຈີນ ພົບປະຫາລືເພີ່ມຊ່ອງທາງດ້ານການຮ່ວມມື

ວັນທີ 28 ພຶດສະພາ 2019 ທ່ານ      Xu Lejiang ຮອງປະທານ ສະຫະພັນອຸດສາຫະກໍາ ແລະ ການຄ້າ ທົ່ວປະເທດຈີນ, ພ້ອມດ້ວຍຄະນະໄດ້ເຂົ້າຢ້ຽມຄຳນັບພົບປະ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າລາວ ໂດຍມີ ທ່ານ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ຮອງຫົວໜ້າຫ້ອງການ, ຫົວໜ້າກົມ – ຮອງກົມ, ຫົວໜ້າພະແນກ ແລະ ວິຊາການກົມທີ່ກ່ຽວຂ້ອງ ພ້ອມຄະນະທັງສອງຝ່າຍເຂົ້າຮ່ວມມີຈໍານວນ 30 ກວ່າທ່ານ.

ການເຂົ້າຢ້ຽມຄຳນັບພົບປະໃນຄັ້ງນີ້ ຈຸດປະສົງເພື່ອເປັນການສຶກສາຂໍ້ມູນແລກປ່ຽນບົດຮຽນຊອກຫາຊ່ອງທາງໃນການຮ່ວມມື, ດ້ານເສດຖະກິດ, ການລົງທຶນ ແລະ ເສີມສ້າງສາຍພົວພັນທີ່ດີເຊິ່ງກັນ ແລະ ກັນ ທາງດ້ານການຄ້າ ແລະ ການລົງທຶນຢູ່ ສປປ ລາວ; ຄະນະດັ່ງກ່າວມີເຈດຈໍານົງ ເພື່ອເຂົ້າມາລົງທຶນດໍາເນີນທຸລະກິດທີ່ ສປປ ລາວ ເພື່ອເປັນການຮັດແໜ້ນສາຍພົວພັນຮ່ວມມືທີ່ດີ ລະຫວ່າງ ສອງປະເທດ ສປປ ລາວ – ສປ ຈີນ ໃຫ້ມີການຄ້າການລົງທຶນຮ່ວມກັນເພີ່ມຂຶ້ນ ເຊິ່ງຄະນະມາຄັ້ງນີ້ມີ 2 ບໍລິສັດ ຄື: ບໍລິສັດ ຊີນຊີຫວັງ ( New Hope Group ) ເປັນກຸ່ມບໍລິສັດທີ່ໄດ້ມາສ້າງຕັ້ງໂຮງງານຜະລິດຫົວອາຫານຢູ່ເຂດພັດທະນາກວມລວມໄຊເສດຖາ ແລະ ບໍລິສັດ Shanghai MicroPort Medical ( Group ) Co.,Ltd ເປັນກຸ່ມບໍລິສັດຮັບໃຊ້ອຸປະກອນທັນສະໄໝທາງດ້ານການແພດ ເຊິ່ງທ່ານນາຍົກລັດຖະມົນຕີ ໄດ້ໄປຢ້ຽມຢາມບໍລິສັດດັ່ງກ່າວໃນໄລຍະທີ່ໄປເຂົ້າຮ່ວມງານວາງສະແດງສິນຄ້ານໍາເຂົ້າສາກົນແຫ່ງຊາດຈີນ ໃນທ້າຍປີ 2018 ທີ່ຜ່ານມາ.

ຕອນທ້າຍ ທ່ານ ນາງ ເຂັມມະນີ       ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ຄະນະຜູ້ແທນ ດັ່ງກ່າວທີ່ສົນໃຈມາລົງທຶນຢູ່ລາວການທີ່ຈະມີນັກລົງທຶນມາລົງທຶນຢູ່ ສປປ ລາວ ຫຼາຍຂຶ້ນກໍເປັນຜົນປະໂຫຍດທີ່ດີຕໍ່ກັບການພັດທະນາປະເທດຊາດ​. ພ້ອມກັນນັ້ນ, ທ່ານ Xu Lejiang ກໍສະແດງຄວາມຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບ.