ຊື່ນໃຈ! ສະໜາມບິນສາກົນວັດໄຕ ປະກາດເປັນເຂດປອດຄວັນຢາສູບ, ຜູ້ຝ່າຝືນມີປັບໃໝ - Laoedaily

ຊື່ນໃຈ! ສະໜາມບິນສາກົນວັດໄຕ ປະກາດເປັນເຂດປອດຄວັນຢາສູບ, ຜູ້ຝ່າຝືນມີປັບໃໝ

ຢາສູບແມ່ນວ່າຈະເປັນທີ່ຕິດອົກຕິດໃຈຂອງໃຜຫຼາຍໆຄົນແຕ່ເວົ້າເລື່ອງສຸຂະພາບບໍ່ດີແນ່ນອນ ແຕ່ຜົນການຕິດຕາມຍັງເຫັນວ່າສະພາະສະໜາມບິນວັດໄຕຍັງມີຜູ້ສູບຢາລະດັບ 7 ແສນຄົນໃນແຕ່ລະປີ ໃນນັ້ນ ຄົນລາວກວມເປັນເຄິ່ງ ຈິ່ງເຫັນວ່າຄວນປະກາດສະຖານທີ່ແຫ່ງນີ້ໃຫ້ເປັນຕົວແບບທຳອິດປອດຄັວນຢາສູບ.

 

ວັນທີ 31 ພຶດສະພາ 2019 ນີ້, ທີ່ອາຄານຜູ້ໂດຍສານສາກົນ ມີພິທີປະກາດສະໜາມບິນສາກົນວັດໄຕ ປອດຄວັນຢາສູບຢ່າງເປັນທາງການ ໂດຍການເຂົ້າຮ່ວມມີທ່ານສັນຕິສຸກ ສິມມາລາວົງ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ທ່ານສົມຈິດ ອິນທະມິດ, ຮອງລັດຖະມົນຕີກະຊວງອຸດສາຫະກໍາແລະ ການຄ້າ, ພ້ອມດ້ວຍ ຜູ້ຕາງໜ້າອົງການອະນາໄມໂລກ, ຜູ້ຕາງໜ້າສະມາພັນຄວບຄຸມຢາສູບອາຊຽນ, ແລະ ຜູ້ບໍລິຫານ ເຈົ້າໜ້າທີ່ສາຍການບິນຕ່າງໆ ແລະ ພາກສ່ວນກ່ຽວຂ້ອງເຂົ້າຮ່ວມ.

 

 

ໃນພິທີ, ທ່ານ​ ພູທອນ ເມືອງປາກ ກ່າວວ່າ: ມີຄວາມປິຕິຊົມຊື່ນເປັນຢ່າງຍິ່ງ ແລະ ສະແດງຄວາມຊົມເຊີຍຕໍ່ຄະນະຮັບຜິດຊອບສະໜາມບິນສາກົນວັດໄຕທຸກພາກສ່ວນ ທີ່ໄດ້ປະກາດໃຫ້ສະໜາມບິນແຫ່ງນີ້ເປັນສະໜາມບິນປອດຄວັນຢາສູບ ເຊິ່ງອົງການອະນາໄມໂລກ ໄດ້ກໍານົດເອົາວັນທີ 31 ພຶດສະພາຂອງທຸກໆປີ ເປັນວັນສະເຫຼີມສະຫຼອງວັນງົດສູບຢາໂລກ ແລະ ສປປ ລາວ ກໍ່ມີສ່ວນຮ່ວມເຊັ່ນດຽວກັນ. ວັນງົດສູບຢາໃນປີນີ້ ແມ່ນມີຄວາມໝາຍຄວາມສໍາຄັນເປັນຢ່າງຍິ່ງ ພາຍໃຕ້ຄໍາຂັວນ “ການສູບຢາ ພາໃຫ້ເປັນພະຍາດປອດ ຫຼື tobacco and lung health”

 

 

ເພື່ອເປັນການປຸກລະດົມ ແລະ ໃຫ້ຄວາມຮູ້ກ່ຽວກັບຄວາມອັນຕະລາຍຂອງການສູບຢາ ແລະ ການໄດ້ຮັບຄວັນຢາສູບ ເຊິ່ງເປັນສາເຫດຂອງການເກີດພະຍາດປອດຮ້າຍແຮງ, ຊໍ້າເຮື້ອ, ທໍລະມານຈາກການເຈັບປ່ວຍ ແລະ ນໍາໄປສູ່ການເສຍຊີວິດກ່ອນໄວອັນຄວນ. ຈາກການດຳເນີນບັ້ນສໍາຫຼວດແຫ່ງຊາດ ກ່ຽວກັບການສູບຢາຂອງຜູ້ໃຫຍ່ໃນປີ 2015 ພົບວ່າ: ການໄດ້ຮັບຄວັນຢາສູບພາຍໃນສະຖານທີ່ສາທາລະນະຍັງສູງ, ໂດຍສະເພາະແມ່ນການໄດ້ຮັບຄວັນຢາສູບພາຍໃນອາຄານເຮັດວຽກສູງເຖິງ 63%. ດັ່ງນັ້ນ, ຈຶ່ງຮຽກຮ້ອງມາຍັງທຸກຄົນ ໃຫ້ເພີ່ມທະວີການມີສ່ວນຮ່ວມ ແລະ ເປັນເຈົ້າການໃນການປົກປ້ອງສຸຂະພາບຕົນເອງ ແລະ ຄົນອ້ອມຂ້າງຈາກຄວັນຢາສູບ ແລະ ທັງໃຫ້ຜູ້ສູບຢາ ໄປສູບຢາຢູ່ບ່ອນອະນຸຍາດສູບຢາເທົ່ານັ້ນ.

 

 

ດ້ານ ທ່ານສັນຕິສຸກ ສິມມາລາວົງ ກໍ່ໄດ້ສະແດງຄວາມເຫັນວ່າ: ໃນໂອກາດການສະເເຫຼີມສະຫຼອງວັນງົດສູບຢາແຫ່ງຊາດ ກໍ່ຄື ວັນງົດສູບຢາໂລກໃນຄັ້ງນີ້, ຂໍຕາງໜ້າໃຫ້ກະຊວງໂຍທາທິການແລະ ຂົນສົ່ງ ສະແດງຄວາມຊົມເຊີຍມາຍັງຜູ້ບໍລິຫານ ແລະ ພະນັກງານຂອງສະໜາມບິນສາກົນວັດໄຕ ທີ່ໄດ້ມີຄວາມພະຍາຍາມເຮັດໃຫ້ສະໜາມບິນແຫ່ງນີ້ ກາຍເປັນສະໜາມບິນປອດຄວັນຢາສູບ ແຫ່ງທໍາອິດຂອງ ສປປ ລາວ ທັງອາຄານຜູ້ໂດຍສານພາຍໃນ ແລະ ສາກົນ. ການເຮັດໃຫ້ສະໜາມບິນສາກົນວັດໄຕ ປອດຄວັນຢາສູບ ແມ່ນເພື່ອປົກປ້ອງສຸຂະພາບຂອງຜູ້ບໍ່ສູບຢາ ຈາກການໄດ້ຮັບຄວັນຢາສູບຂອງຄົນອື່ນ ລວມທັງ ການປົກປ້ອງອັກຄີໄພທີ່ອາດຈະເກີດຂຶ້ນ, ການຈັດໃຫ້ສະໜາມບິນສາກົນວັດໄຕ ປອດຄວັນຢາສູບນີ້ ຈະສ້າງສະພາບແວດລ້ອມທີ່ສົດໃສ ທີ່ມີຄວາມເປັນລະບຽບຮຽບຮ້ອຍ ສະອາດງາມຕາໃຫ້ພະນັກງານປະຈໍາສະໜາມບິນ, ຜູ້ໂດຍສານລວມທັງ ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເຂົ້າມາສະໜາມບິນ.

 

 

ຈາກນັ້ນ ທ່ານ ພູທອນ ເມືອງປາກ ແລະ ທ່ານ ສັນຕິສຸກ ສິມມາລາວົງ ໄດ້ຮ່ວມກັນເປີດປ້າຍປະກາດສະໜາມບິນສາກົນວັດໄຕຢ່າງເປັນທາງການ. ສຳລັບຜູ້ທີ່ສູບຢາຢູ່ສະໜາມບິນຕ້ອງໄປສູບຢູ່ສະຖານທີ່ຈັດໄວ້ໃຫ້ ຢູ່ຫ່າງຈາກອາຄານຜູ້ໂດຍສານສິບແມັດ; ຜູ້ໃດລະເມີດຄັ້ງທໍາອິດຈະຖືກກ່າວເຕືອນ ແລະ ຄັ້ງຕໍ່ໄປຈະຖືກປັບໃໝຕາມລະບຽບການ.

 

ຂໍ້ມູນ: Lao National Radio

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ