ຊົມເຊີຍ!! ນາຍຕໍາຫຼວດ 4 ສະຫາຍ ໄດ້ຮັບການເລື່ອນຊັ້ນ - Laoedaily

ຊົມເຊີຍ!! ນາຍຕໍາຫຼວດ 4 ສະຫາຍ ໄດ້ຮັບການເລື່ອນຊັ້ນ

ເພື່ອເປັນການຍົກຍ້ອງ ແລະ ຊົມເຊີຍຜົນງານທີ່ຍາດມາໄດ້ໃນແຕ່ລະໄລຍະ ພ້ອມທັງປະຕິບັດຕົນໄດ້ຕາມເງື່ອນໄຂມາດຖານ ຂອງການເລື່ອນຊັ້ນຕໍາແໜ່ງ. ສະນັ້ນ, ກະຊວງປ້ອງກັນຄວາມສະຫງົບ ຈຶ່ງໄດ້ປະກາດເລື່ອນຊັ້ນໃຫ້ນາຍຕໍາຫຼວດຈາກຊັ້ນພັນເອກຂຶ້ນເປັນ ຊັ້ນພົນຈັດຕະວາ ຈຳນວນ 4 ທ່ານ.

 

ໃນວັນທີ 30 ພຶດສະພາ 2019 ທີ່ກະຊວງປ້ອງກັນຄວາມສະຫງົບ (ປກສ) ໄດ້ຈັດພິທີປະກາດເລື່ອນຊັ້ນໃຫ້ນາຍຕໍາຫຼວດ ຊັ້ນພັນເອກ ຂຶ້ນເປັນຊັ້ນພົນຈັດຕະວາ ໂດຍການເຂົ້າຮ່ວມເປັນປະທານ ແລະ ປະດັບຊັ້ນ ໂດຍ ພົນໂທ ວິໄລ ຫຼ້າຄໍາຟອງ, ຖະມົນຕີກະຊວງ ປກສ ມີຄະນະລັດຖະມົນຕີ, ຫົວໜ້າກົມໃຫຍ່, ວິທະຍາຄານ ແລະ ຄະນະນໍາກົມກອງອ້ອມຂ້າງກະຊວງເຂົ້າຮ່ວມ.

 

 

ພົນຕີ ວັນທອງ ກອງມະນີ ຫົວໜ້າກົມໃຫຍ່ການເມືອງ ປກສ ໄດ້ຜ່ານລັດຖະດໍາລັດຂອງປະທານປະເທດ ເລກ ທີ 207, 208, 209 ແລະ 209/ປປທ ລົງວັນທີ 20 ພຶດສະພາ 2019 ວ່າດ້ວຍການເລື່ອນຊັ້ນນາຍຕໍາຫຼວດຊັ້ນ ພັນເອກ ຂຶ້ນຊັ້ນພົນຈັດຕະວາ. ໃນນີ້, ໄດ້ຕົກລົງເລື່ອນຊັ້ນ ພັນເອກ ທອງເຄນ ບຸນໝັ້ນ, ຫົວໜ້າກອງບັນຊາ ການ ປກສ ແຂວງວຽງຈັນ, ພັນເອກ ສົມລິດ ດາວຮຸ່ງສຸລິ, ຫົວໜ້າກົມຕໍາຫຼວດຄຸມຂັງ-ດັດສ້າງ, ພັນເອກ ທອງສຸກ ຍ່າເອີລາວລີ, ຮອງຫົວໜ້າກົມໃຫຍ່ພະລາທິການ ແລະ ເລື່ອນຊັ້ນ ພັນເອກ ໜູດີ ມີໄຊຍະລາດ, ຫົວໜ້າກົມ ໃຫຍ່ພະລາທິການ.

 

 

ໃນພິທີ, ພົນໂທ ວິໄລ ຫຼ້າຄໍາຟອງ ໄດ້ໃຫ້ທິດຊີ້ນໍາຕໍ່ຜູ້ທີ່ໄດ້ຮັບການເລື່ອນຊັ້ນໃນຄັ້ງນີ້ ຕະຫຼອດຮອດຄະນະພັກ-ຄະນະນໍາແຕ່ລະຂັ້ນ ເພີ່ມທະວີວຽກງານຄວາມສາມັກຄີພາຍໃນໃຫ້ໜັກແໜ້ນ ກໍຄືຄວາມສາມັກຄີໃນລະບຽບຫຼັກການ, ມີຄວາມເປັນເອກະພາບພາຍໃນພັກ ເປັນກໍາລັງແຮງອັນດຽວກັນ, ເຊິ່ງຈະເປັນເງື່ອນໄຂພື້ນຖານໃນການຈັດຕັ້ງປະຕິບັດໜ້າທີ່ວຽກງານການເມືອງໃຫ້ມີຜົນສໍາເລັດ ເພື່ອຫຼີກລ້ຽງຫາງສຽງ ແລະ ຮັບປະກັນຜົນປະໂຫຍດອັນຊອບທໍາກົມກອງຂອງຕົນ.

 

 

 

ຂໍ້ມູນ ໜັງສືພິມປ້ອງກັນຄວາມສະຫງົບ

 

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ