ມອບ – ຮັບເສັ້ນທາງປູເບຕົງ B3

44

ວັນທີ 28 ພຶດສະພາຜ່ານມາ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ( ລຊມລ ) ໄດ້ມອບເສັ້ນທາງປູເບຕົງ B3 ມີຄວາມຍາວ 1 ກິໂລແມັດ, ກວ້າງ 5 ແມັດ, ໜາ 20 ຊັງຕີແມັດ ທີ່ບໍລິສັດຜູ້ຮັບເໝົາໄດ້ສໍາເລັດການກໍ່ສ້າງໃນຕົວເມືອງວິລະບູລີ ແຂວງສະຫວັນນະເຂດ ດ້ວຍການສະໜອງທຶນ 213.701 ໂດລາສະຫະລັດ ທີ່ທາງ ບໍລິສັດ ລຊມລ ໄດ້ປະກອບໃຫ້ກອງທຶນພັດທະນາຊຸມຊົນຂອງສົກປີ 2018, ທາງປູເບຕົງເສັ້ນນີ້ຈະ   ເອື້ອອຳນວຍໃນການນໍາໃຊ້ໃຫ້ແກ່ຊຸມຊົນໃນເມືອງວິລະບູລີ ກວ່າ 14 ພັນຄົນ.

ເສັ້ນທາງ B3 ຈະຕໍ່ກັບເສັ້ນທາງ 28A ທີ່ຕິດກັບເສັ້ນທາງເລກ 9 ເຊິ່ງເປັນແລວເສດຖະກິດສຳຄັນໃນການຂົນສົ່ງສິນຄ້າ ແລະ ການພັດທະນາ ໂດຍເຊື່ອມຕໍ່ ສປປ ລາວ ກັບປະເທດໃກ້ຄຽງ ເຊັ່ນ: ປະເທດຫວຽດນາມ ແລະ ໄທ.

ເສັ້ນທາງເບຕົງໃໝ່ນີ້ກ່າວມອບໂດຍ ທ່ານ ຝູ ເຊຍເຊີນ ປະທານ ບໍລິສັດ ລຊມລ ແລະ ກ່າວຮັບໂດຍ ທ່ານ ມູນທາ ໄຊຍະລິດ​ ຮອງເຈົ້າເມືອງວິລະບູລີ ໂດຍການເປັນສັກຂີພິຍານຂອງການນໍາເມືອງ, ທ່ານ ພໍ ແຮຣິສ ຜູ້ຈັດການໃຫຍ່ ບໍລິສັດ ລຊມລ, ທ່ານ ສະໝານ ອະເນກາ ຜູ້ອຳນວຍການໃຫຍ່ ແລະ ຜູ້ຈັດການດ້ານການພົວພັນກັບຊຸມຊົນ ແລະ ຜູ້ມີສ່ວນຮ່ວມ ບໍລິສັດ ລຊມລ, ບັນດາຫົວໜ້າຫ້ອງການທີ່ກ່ຽວຂ້ອງ, ຜູ້ຕາງໜ້າອົງການຈັດຕັ້ງມະຫາຊົນ, ອຳນາດການປົກຄອງ ແລະ ຜູ້ຕາງໜ້າຊຸມຊົນພາຍໃນເມືອງວິລະບູລີ ແລະ ພະນັກງານ ບໍລິສັດ ລຊມລ.

ທ່ານ ມູນທາ ໄຊຍະລິດ ກ່າວວ່າ: ການລົງທຶນຄັ້ງນີ້ແມ່ນການຕໍ່ຍອດຈາກທຶນທີ່ທາງ ບໍລິສັດ ລຊມລ ໄດ້ຊ່ວຍສະໜອງໃຫ້ແກ່ການກໍ່ສ້າງເສັ້ນທາງສາທາລະນະໃນໄລຍະຜ່ານມາ ເຊິ່ງລວມຍອດມູນຄ່າທັງໝົດ ປະມານ 20 ລ້ານໂດລາ ທີ່ທາງບໍລິສັດໄດ້ລົງທຶນເຂົ້າໃສ່ໃນການກໍ່ສ້າງ ແລະ ການບຳລຸງຮັກສາເສັ້ນທາງທ້ອງຖິ່ນໃນທົ່ວເມືອງວິລະບູລີ ອັນລວມທັງເສັ້ນທາງ 28A ທີ່ເຊື່ອມຕໍ່ເມືອງວິລະບູລີ ໄປສູ່ແຂວງສະຫວັນນະເຂດ.

ນອກຈາກນີ້, ບໍລິສັດ ລຊມລ ຍັງສະໜອງທຶນຈາກກອງທຶນພັດທະນາຊຸມຊົນ ເປັນມູນຄ່າ 750.000 ໂດລາຕໍ່ປີ ໃຫ້ແກ່ເມືອງວິລະບູລີ ເຊິ່ງສ່ວນໜຶ່ງຂອງທຶນກໍຖືກແບ່ງເຂົ້າໃນການກໍ່ສ້າງ ແລະ ສ້ອມແປງເສັ້ນທາງທ້ອງຖິ່ນຕ່າງໆ.

ທ່ານ ຝູ ເຊຍເຊີນ ກ່າວວ່າ: ໂຄງການຂຸດຄົ້ນບໍ່ຄຳ – ທອງເຊໂປນ ໄດ້ເລີ່ມດຳເນີນງານໃນປີ 2002 ແລະ ໃນສະໄໝນັ້ນເມືອງວິລະບູລີ ຍັງຖືວ່າເປັນເຂດຊົນນະບົດຫ່າງໄກສອກຫຼີກ ການເດີນທາງໄປ – ມາເຂດດັ່ງກ່າວຜ່ານທາງຖະໜົນ, ແມ່ນ້ຳ, ເສັ້ນທາງທີ່ເປັນບວກເປັນຕົມທີ່ສຸດທີ່ຫຍຸ້ງຍາກລຳບາກ ໃຊ້ເວລາເປັນ  2 – 3 ມື້ຈຶ່ງຮອດ ມາຮອດປັດຈຸບັນແມ່ນມີເສັ້ນທາງເຂົ້າເຖິງທຸກໆບ້ານໃນເຂດເມືອງວິລະບູລີ.

ນັບຕັ້ງແຕ່ເລີ່ມການດຳເນີນການຂຸດຄົ້ນບໍ່ແຮ່ເປັນຕົ້ນມາ ບໍລິສັດ ລຊມລ ໄດ້ສະໜອງລາຍຮັບໂດຍກົງຫຼາຍກວ່າ 1,4 ຕື້ໂດລາ ໃຫ້ແກ່ລັດຖະບານລາວ. ນອກຈາກນີ້, ບໍລິສັດຍັງໄດ້ລົງທຶນປະມານ 34 ລ້ານໂດລາ ໃນການກໍ່ສ້າງ ແລະ ບຳລຸງຮັກສາຕາໜ່າງໄຟຟ້າແຫ່ງຊາດ ດ້ວຍການຮ່ວມມືກັບລັດວິສາຫະກິດໄຟຟ້າລາວ.

ສ່ວນຜົນປະໂຫຍດທາງອ້ອມ ແມ່ນລວມທັງການສ້າງວຽກເຮັດງານທຳໃຫ້ແກ່ຄົນທ້ອງຖິ່ນ, ການຝຶກອົບຮົມ ແລະ ການວ່າຈ້າງບໍລິສັດຮັບເໝົາລາວ ແລະ ໄດ້ປະກອບສ່ວນຫຼາຍຮ້ອຍລ້ານໂດລາສະຫະລັດ ເຂົ້າໃນການພັດທະນາເສດຖະກິດທ້ອງຖິ່ນ ແລະ ຫັນເມືອງວິລະບູລີ ໃຫ້ເປັນໜຶ່ງໃນເມືອງທີ່ຫຼຸດພົ້ນຈາກສະຖານະທີ່ທຸກຍາກທີ່ສຸດໃນ ສປປ ລາວ.