ແຂວງໄຊສົມບູນ ຍັງມີເມືອງທຸກຍາກ 2 ເມືອງ - Laoedaily

ແຂວງໄຊສົມບູນ ຍັງມີເມືອງທຸກຍາກ 2 ເມືອງ

ແຂວງໄຊສົມບູນ ເອົາໃຈໃສ່ຈັດຕັ້ງປະຕິບັດວຽກງານຂະແໜງກະສິກໍາ ແລະ ປ່າໄມ້ ໂດຍສະເພາະແມ່ນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ປັດຈຸບັນທົ່ວແຂວງຍັງມີເມືອງທຸກຍາກ 2 ເມືອງ, ບ້ານທຸກຍາກ 12 ບ້ານ, ຄອບຄົວທຸກຍາກ 1 ພັນກວ່າຄອບຄົວ. ຄຽງຄູ່ກັນນັ້ນ, ກໍມີບ້ານພັດທະນາ 15 ບ້ານ, ບ້ານພົ້ນທຸກ 17 ບ້ານ.

ໃນລະຫວ່າງວັນທີ 27 – 28 ພຶດສະພາ 2019 ທ່ານ ຄຳບຸນນັດ ໄຊຍະນົນ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວວຽກງານທີ່ແຂວງໄຊສົມບູນ ໂດຍການຕ້ອນຮັບຂອງ ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໄຊສົມບູນ.

ໃນໂອກາດດັ່ງກ່າວ ທ່ານ ໂອໃດ ດວງວິໄຊ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງໄຊສົມບູນ ໄດ້ລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານຂອງຂະແໜງກະສິກຳ ແລະ ປ່າໄມ້ ໃນໄລຍະຜ່ານມາ ໂດຍມີບາງຕອນກ່າວ ວ່າ: ແຜນການຜະລິດສະບຽງອາຫານໃນທົ່ວແຂວງມີເນື້ອທີ່ປູກເຂົ້າທັງໝົດ 10 ພັນກວ່າເຮັກຕາ, ສະມັດຖະພາບ 3,2 ໂຕນຕໍ່ເຮັກຕາ, ຜົນຜະລິດ 33 ພັນກວ່າໂຕນ; ດ້ານການປູກຝັງມີ: ສາລີແຂງ, ສາລີຫວານ, ສາລີເຂົ້າໜຽວ, ຢາງພາລາ ແລະ ພືດຜັກຊະນິດອື່ນໆຕື່ມອີກ ເພື່ອເປັນສິນຄ້າ. ນອກຈາກນີ້, ທົ່ວແຂວງຍັງມີສັດລ້ຽງປະເພດງົວ, ຄວາຍ, ແບ້, ແກະ, ໝູ ແລະ ສັດປີກ. ຄຽງຄູ່ກັນນີ້, ຍັງໄດ້ຈັດສັນພູມລຳເນົາ ແລະ ບ່ອນທຳມາຫາກິນທີ່ຖາວອນໃຫ້ປະຊາຊົນ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ໄດ້ທັງໝົດ 11 ຈຸດສຸມ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ທົ່ວແຂວງຍັງມີເມືອງທຸກຍາກ 2 ເມືອງ, ບ້ານທຸກຍາກ 12 ບ້ານ, ຄອບຄົວທຸກຍາກ 1 ພັນກວ່າຄອບຄົວ, ມີບ້ານພັດທະນາ 15 ບ້ານ ແລະ ບ້ານພົ້ນທຸກມີ 17 ບ້ານ.

ພ້ອມດຽວກັນນັ້ນ, ທ່ານຮອງລັດຖະມົນຕີ ກະຊວງກະສິກຳ ແລະ ປ່າໄມ້ ກໍໄດ້ເນັ້ນໜັກໃຫ້ພະແນກກະສິກຳ ແລະ ປ່າໄມ້ແຂວງ, ຫ້ອງການກະສິກຳ ແລະ ປ່າໄມ້ເມືອງ ຈັດຜັງບ້ານ ( ຈັດສັນເຂົ້າແຜນພື້ນຖານໂຄງລ່າງ ), ຈັດບຸລິມະສິດແຜນຜັງ ເມືອງພັດທະນາໃນອະນາຄົດ ( ດິນປຸກສ້າງ, ດິນພັດທະນາ ), ເອົາກະສິກຳເປັນໃຈກາງໃນການຂຽນແຜນພັດທະນາກະສິກຳ ແລະ ແຜນພັດທະນາຊົນນະບົດ, ແຍກການລົງທຶນຂອງລັດ ແລະ ຜູ້ປະກອບການເປັນອັນລະອຽດ, ລົງເລິກການປູກຝັງ ແລະ ລ້ຽງສັດ, ລົງຊຸກຍູ້ສົ່ງເສີມໃຫ້ປະຊາຊົນ ໂດຍສະເພາະການລົງສັກຢາສັດລ້ຽງຂອງປະຊາຊົນໃຫ້ທົ່ວເຖິງ ແລະ ປູກພືດຜັກຊະນິດຕ່າງໆໃຫ້ຖ່ວງທັນກັບລະດູການ ເພື່ອຕອບສະໜອງທາງດ້ານສະບຽງອາຫານໃຫ້ພຽງພໍພາຍໃນແຂວງ ແລະ ສາມາດສົ່ງອອກເປັນສິນຄ້າໄປຍັງບັນດາແຂວງອ້ອມຂ້າງຕື່ມອີກ.

( ຂ່າວ: ເອຢິບ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ