ການກໍ່ສ້າງເສັ້ນທາງຢູ່ກຸ່ມບ້ານເມືອງນາ ເມືອງກວັນ ຄືບໜ້າ 35%

73

ໂຄງການກໍ່ສ້າງທາງຫຼວງທ້ອງຖິ່ນເສັ້ນທາງ 3249 ເລີ່ມແຕ່ຈຸດແຍກບ້ານລ້ອງກວ້າງຫາບ້ານຍອດບໍ ເມືອງກວັນ ແຂວງຫົວພັນ ຍາວ 14 ກິໂລແມັດ ເຊິ່ງເລີ່ມລົງມືປະຕິບັດມາແຕ່ຕົ້ນປີ 2018 ມາຮອດປັດຈຸບັນຄືບໜ້າ35%.

ຕາມການເປີດເຜີຍຂອງ ທ່ານ ວັນໄຊ ໄຊຍະທຳ ວິຊາການຂະແໜງຂົວທາງພະແນກໂຍທາທິການ ແລະ ຂົນສົ່ງ ແຂວງຫົວພັນ ເຊິ່ງເປັນວິຊາການຜູ້ຕິດຕາມໂຄງການກໍ່ສ້າງທາງຫຼວງທ້ອງຖິ່ນເສັ້ນທາງ 3249 ໃຫ້ຮູ້ວ່າ: ໂຄງການກໍ່ສ້າງທາງຫຼວງທ້ອງຖິ່ນເສັ້ນທາງ 3249 ເລີ່ມແຕ່ຈຸດແຍກບ້ານລ້ອງກວ້າງຫາບ້ານຍອດບໍ ເມືອງກວັນ ແຂວງຫົວພັນ ທາງເສັ້ນນີ້ນອນໃນໂຄງການສ້ອມແປງຂົວທາງໄລຍະ 2 ສ້ອມແປງປົກກະຕິ ເຊິ່ງເລີ່ມປະຕິບັດມາແຕ່ຕົ້ນເດືອນມັງກອນ 2018 ໂດຍມີ 3 ບໍລິສັດຮັບເໝົາຮ່ວມກັນ ຄື: ບໍລິສັດ ພັດທະນາກະສິກໍາ  ກໍ່ສ້າງຂົວທາງ, ບໍລິສັດ ຈະເລີນຊຳກໍ່ສ້າງ ແລະ ບໍລິສັດ ພິ່ງແກ້ວ ກໍ່ສ້າງຂົວທາງ. ປັດຈຸບັນບັນດາບໍລິສັດຜູ້ຮັບເໝົາກຳລັງສຸມໃສ່ຂະຫຍາຍໜ້າທາງ, ລະເບີດຫີນ, ກໍ່ສ້າງລະບົບລະບາຍນໍ້າໃຫ້ສຳເລັດ, ລົງຊັ້ນປູແຮ່ໜ້າທາງ ແລະ ປູຢາງຢູ່ໃນຂອບເຂດບ້ານປະຊາຊົນ ໂຄງການນີ້ມີຄວາມຍາວທັງໝົດ 14 ກິໂລແມັດ, ໜ້າທາງກວ້າງ 5 ແມັດ ແລະ ມີມູນຄ່າກໍ່ສ້າງທັງໝົດ 11 ຕື້ 800 ລ້ານກີບ ໂດຍແມ່ນທຶນຊ່ວຍເຫຼືອຈາກທະນາຄານໂລກ ມາຮອດປັດຈຸບັນຄືບໜ້າ 35%.

ທ່ານກ່າວອີກວ່າ: ດ້ວຍຄວາມຮັບຜິດຊອບຂອງບໍລິສັດຜູ້ຮັບເໝົາ ບວກໃສ່ການໃຫ້ຄວາມຮ່ວມມືຂອງທຸກພາກສ່ວນ ນັບແຕ່ແຂວງ, ເມືອງ ແລະ ປະຊາຂົນພາຍໃນເຂດກຸ່ມບ້ານດັ່ງກ່າວເປັນຢ່າງດີ ຈຶ່ງເຮັດໃຫ້ການປະຕິບັດໜ້າວຽກຕ່າງໆດຳເນີນໄດ້ສະດວກດີ ຄາດວ່າການກໍ່ສ້າງຈະໃຫ້ສຳເລັດກ່ອນໄລຍະລະດູຝົນປີນີ້ ຖ້າດິນຟ້າບໍ່ອຳນວຍແມ່ນຮອດທ້າຍປີຈະໃຫ້ສຳເລັດ.

ທ່ານ ໄມຄຳ ພິມມະສອນ ເຈົ້າເມືອງກວັນ ກ່າວວ່າ: ສຳລັບກຸ່ມບ້ານເມືອງນາ ມີທັງໝົດ 11 ບ້ານ, ພົນລະເມືອງ 4 ພັນກວ່າຄົນ ເປັນເຂດທີ່ນອນຢູ່ຈຸດໃຈກາງຂອງເມືອງກວັນ ແລະ ມີດິນດໍານໍ້າຊຸມອຸດົມສົມບູນ ເຊິ່ງເໝາະແກ່ການຜະລິດກະສິກຳຕ່າງໆ ເປັນຕົົ້ນແມ່ນປູກຝັງ – ລ້ຽງສັດ. ນອກນີ້, ເອື້ອຍນ້ອງແມ່ຍິງຍັງມີສີໄມ້ລາຍມືອັນປານີດໃນການຕໍ່າຜ້າແພໄໝມ້ອນ. ສະນັ້ນ, ແຂວງຫົວພັນ ຈຶ່ງໄດ້ກໍານົດເອົາຈຸດນີ້ໃຫ້ກາຍເປັນເຂດຈຸດສຸມພັດທະນາ ໂດຍເລັ່ງໃສ່ບັນດາທ່າແຮງທີ່ມີຂອງບ້ານເປັນຕົ້ນຕໍ ເພື່ອຜະລິດເປັນສິນຄ້າສົ່ງອອກທັງພາຍໃນ ແລະ ຕ່າງປະເທດນັບມື້ໃຫ້ຫຼາຍຂຶ້ນ.

ທ່ານກ່າວອີກວ່າ: ກ່ອນທີ່ຍັງບໍ່ມີເສັ້ນທາງເຂົ້າເຖິງ ຊີວິດການເປັນຢູ່ຂອງພໍ່ແມ່ປະຊາຊົນເຂດນີ້ພົບຄວາມຫຍຸ້ງຍາກຫຼາຍ ໂດຍສະເພາະແມ່ນການໄປ – ມາໃນໄລຍະລະດູຝົນ ພາຍຫຼັງທີ່ໄດ້ຮັບທຶນໃນການກໍ່ສ້າງທາງເຂົ້າມາສູ່ເຂດນີ້ເຫັນວ່າສະດວກຂຶ້ນ ປະຊາຊົນກໍເປັນເຈົ້າການໃຫ້ ຄວາມຮ່ວມມືກັບບໍລິສັດຜູ້ຮັບເໝົາເປັນຢ່າງດີ ພ້ອມທັງເອື້ອອຳນວຍ ຄວາມສະດວກຫຼາຍໆຢ່າງ ເຮັດໃຫ້ການປະຕິບັດໜ້າທີ່ຂອງບໍລິສັດບັນລຸຕາມແຜນທີ່ວາງໄວ້.