ກຽມຍົກລະດັບດ່ານປະເພນີ ປາງມອນ ເປັນດ່ານສາກົນ

31

ເພື່ອເຮັດໃຫ້ດ່ານປະເພນີ ປາງມອນ ເມືອງຄອບ ແຂວງໄຊຍະບູລີ ໄດ້ຮັບການຍົກລະດັບຂຶ້ນເປັນດ່ານສາກົນ ແລະ ເພື່ອເຮັດໃຫ້ດ່ານດັ່ງກ່າວກາຍເປັນດ່ານໜ້າທີ່ເປັນແຫຼ່ງລາຍຮັບຂອງແຂວງ ກໍຄືລັດຖະບານ ພ້ອມທັງອໍານວຍຄວາມສະດວກໃນການເຂົ້າ – ອອກຂອງປະຊາຊົນສອງປະເທດ ເວົ້າລວມ, ເວົ້າສະເພາະແມ່ນປະຊາຊົນແຂວງໄຊຍະບູລີ ແລະ ແຂວງໃກ້ຄຽງ ກັບບັນດາຈັງຫວັດຂອງໄທ ທີ່ຕິດກັບ ແຂວງໄຊຍະບູລີ ແລະ ນັກທ່ອງທ່ຽວປະເທດທີ່ສາມທີ່ເຂົ້າມາທ່ອງທ່ຽວໃນເຂດດັ່ງກ່າວ ແລະ ເພື່ອເປັນການກະກຽມຄວາມພ້ອມໃນການຈະເປີດດ່ານປະເພນີ ປາງມອນ ຂຶ້ນເປັນດ່ານສາກົນນັ້ນ.

ດັ່ງນັ້ນ, ໃນຕອນເຊົ້າຂອງວັນທີ 28 ພຶດສະພາຜ່ານມາ ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ ພ້ອມດ້ວຍຄະນະ ໄດ້ເຂົ້າຢ້ຽມຄຳນັບ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມທັງໄດ້ລາຍງານຜົນການລົງກວດກາການກຽມຄວາມພ້ອມຂອງດ່ານປາງມອນ.

ທ່ານ ແສງເພັດ ຮຸ່ງບຸນຍວງ ໄດ້ກ່າວວ່າ: ການຍົກລະດັບດ່ານປະເພນີ ປາງມອນ ຂຶ້ນເປັນດ່ານສາກົນຕ້ອງໄດ້ປັບປຸງເພີ່ມບາງດ້ານທີ່ຈໍາເປັນ ເຊັ່ນ: ປັບປຸງທາງເຂົ້າປັບໃຫ້ເປັນເລນລະອຽດ ເພື່ອຮອງຮັບລົດບັນທຸກສິນຄ້າ, ປັບປຸງຫ້ອງເຮັດວຽກ ເປັນຕົ້ນແມ່ນຫ້ອງໜ່ວຍງານອອກວີຊາກັບທີ່, ຫ້ອງໜ່ວຍງານ ຕມ, ຫ້ອງໜ່ວຍງານສາທາລະນະສຸກກໍາ ( ຄວບຄຸມພະຍາດຕິດຕໍ່ຊາຍແດນ ), ຫ້ອງໜ່ວຍງານກະສິກໍາ ( ກັກກັນພືດ ແລະ ສັດ ) ແລະ ຫ້ອງກັກຂັງຊົ່ວຄາວ, ປັບປຸງໃຫ້ມີຫ້ອງວິເຄາະ – ວິໄຈດ້ານກະສິກໍາ ແລະ ສາທາລະນະສຸກ ພ້ອມທັງໄດ້ຮຽກຮ້ອງໃຫ້ການນໍາຂອງແຂວງ ເພື່ອຊ່ວຍບິແບ່ງງົບປະມານເພື່ອປັບປຸງສະຖານທີ່ທີ່ເຫັນວ່າມີ ຄວາມຈໍາເປັນ.

ຈາກນັ້ນ, ທ່ານເຈົ້າແຂວງກໍໄດ້ກ່າວຄໍາຂອບໃຈຕໍ່ທີມງານຂອງທ່ານຮອງລັດຖະມົນຕີ ກະຊວງການຕ່າງປະເທດ ທີ່ໄດ້ຍາດເວລາລົງມາກວດກາດ້ານເຕັກນິກການກຽມ ຄວາມພ້ອມທີ່ຈະຍົກລະດັບດ່ານປະເພນີ ປາງມອນ ຂຶ້ນເປັນດ່ານສາກົນ ເພື່ອຈະໄດ້ປັບປຸງອາຄານ, ສະຖານທີ່ ໃຫ້ຄົບຖ້ວມຖືກຕາມມາດຖານ 15 ຂໍ້ ຂອງກະຊວງການຕ່າງປະເທດວາງອອກ.

( ໂດຍ: ອຸ່ນເຮືອນ ໂພທິລັກ )