ຫຼາຍສູນການຄ້າຫວັງເພີ່ມທັກສະໃຫ້ເດັກກາຍເປັນຜູ້ໃຫຍ່ທີ່ມີຄຸນນະພາບ

55

ໃນແຕ່ລະປີ ນັບແຕ່ທ້າຍເດືອນພຶດສະພາຫາຕົ້ນເດືອນມິຖຸນາ ສູນການຄ້າຫຼາຍແຫ່ງໃນນະຄອນຫຼວງ ຈະມີກິດຈະກຳຫຼາຍໆຢ່າງເພີ່ມທັກສະໃຫ້ກັບເດັກນ້ອຍ ເພື່ອກາຍເປັນຜູ້ໃຫຍ່ທີ່ມີຄຸນນະພາບຍູ້ໜູນການພັດທະນາປະເທດຊາດໃນອະນາຄົດ.

ທ່ານ ສີບຸນທຳ ສີບຸນມີ ຜູ້ອຳນວຍການໃຫຍ່ ບໍລິສັດ ລາວເວີນ ມະຫາຊົນ ໃຫ້ສໍາພາດວ່າ: ງານ “ ເທດສະການແຫ່ງຄວາມສຸກສໍາລັບເດັກ ” Kids Carnival Fair 2019 ທີ່ສູນການຄ້າໄອເຕັກມໍ ( ຊັ້ນ 5 ) ເລີ່ມແຕ່ວັນທີ 25/05 – 02/06/2019 ( ທັງໝົດ 9 ມື້ ) ງານຄັ້ງນີ້ຈັດຂຶ້ນເພື່ອຕ້ອນຮັບວັນເດັກນ້ອຍສາກົນ ເພື່ອໃຫ້ບັນດາຫຼານນ້ອຍໄດ້ມາຮ່ວມຫຼິ້ນເກມ ແລະ ກິດຈະກໍາຫຼາກຫຼາຍປະເພດພາຍໃນງານທັງເປັນເວທີເປີດໂອກາດໃຫ້ຫຼານນ້ອຍໄດ້ສະແດງຄວາມສາມາດພິເສດຂອງເຂົາເຈົ້າ ແລະ ສະໜັບສະໜູນໃຫ້ເດັກນ້ອຍກ້າສະແດງອອກ.

ພິເສດໃນວັນທີ 1 – 2 ມິຖຸນາ ຈະມີງານມະຫັດສະຈັນວັນເດັກນ້ອຍສາກົນ ທີ່ສູນການຄ້າໄອເຕັກມໍ ( ຕຶກໃໝ່ ) ພາຍໃນງານຈະພົບກັບສິນຄ້າຫຼຸດລາຄາ ແລະ ກິດຈະກຳຢ່າງຫຼວງຫຼາຍ ນັບຕັ້ງແຕ່ຊັ້ນ 1 ຈົນເຖິງຊັ້ນ 8 ບໍ່ວ່າຈະເປັນການປະດິດ ແລະ ປະກວດຊຸດ Cosplay ທີ່ Sky way ( ຂົວເຊື່ອມ ); ກິດຈະກຳ Kids Canival ( ຊັ້ນ 5 ) ເຊັ່ນ: ຂະບວນພາເລດ, ເພັ້ນໜ້າເດັກນ້ອຍບໍ່ເສຍຄ່າ, ໂຊນລະບາຍສີ, ຫຼິ້ນເກມພາຍໃນງານ, ການສະແດງສິລະປະການຟ້ອນ ແລະ ການປະກວດ Kids Model Contest; ງານ Animal Planet ( ຊັ້ນ 7 ); ການຮຽນຮູ້ການດຳລົງຊີວິດຂອງສັດໃນຮູບແບບ 3 ມິຕິ; ສວນສັດຂະໜາດນ້ອຍ; ການປະກວດ ຄວາມສາມາດຂອງ 44 ໂຮງຮຽນ; ຂະບວນ Mascot; ໂຊຈາກຕົວຕະຫຼົກຂາຍາວ, ໂບໂຊ່, ແຈກປູ່ມເປົ້າ, ແຈກຂອງຫຼິ້ນ ແລະ ແຈກເຂົ້າໜົມ ( ຊັ້ນ 1 ແລະ ຊັ້ນ 6 ) ເລີ່ມແຕ່ເວລາ 8:00 – 21:00 ໂມງ ( ສະເພາະວັນທີ 1 – 2 ມິຖຸນາ 2019 ນີ້ ) ຫຼັງແລ້ວງານແມ່ນຈະເປີດໃຫ້ບໍລິການປົກກະຕິ.

ທ່ານ ນາງ ສຸກທິດາ ດວງມາລາ ຜູ້ຈັດງານທີ່ສູນການຄ້າທາດຫຼວງ ພລາຊາ ໃຫ້ສໍາພາດວ່າ: ງານ “ ມະຫະກໍາງານແຟຊື້ເພື່ອລູກ ” 4 BABY LOVE FAIR ທີ່ສູນການຄ້າທາດຫຼວງ ພລາຊາ ( ຊັ້ນ 2 ) ເລີ່ມແຕ່ວັນທີ 26/5-01/6/2019 ( ທັງໝົດ 7 ມື້ ) ເພື່ອສະເຫຼີມສະຫຼອງວັນເດັກສາກົນ ແລະ ຮັບບໍລິຈາກເຄື່ອງນຸ່ງເດັກນ້ອຍໄປຊ່ວຍເຫຼືອຄອບຄົວໄຟໄໝ້ ຫຼື ເດັກນ້ອຍດ້ອຍໂອກາດ, ພ້ອມທັງສົ່ງເສີມການຂາຍສິນຄ້າຂອງກຸ່ມຫັດຖະກໍາຄົນພິການ ເພື່ອຈະໄດ້ມີທຶນມາໃຊ້ຈ່າຍໃນສະມາຄົມ, ສົ່ງເສີມການຂາຍສິນຄ້າເດັກທຸກຢ່າງ, ສ້າງໂອກາດໃຫ້ໂຮງຮຽນ ຫຼື ສູນການສຶກສາຕ່າງໆໄດ້ມີບ່ອນພົບປະ ເພື່ອໃຫ້ຂໍ້ມູນທີ່ຖືກຕ້ອງ, ສ້າງກິດຈະກໍາຮ່ວມກັນລະຫວ່າງເດັກ ແລະ ຄອບຄົວ ພ້ອມທັງມີກິດຈະກຳອື່ນໆອີກຫຼາຍຢ່າງ. ພາຍໃນງານມີຮ້ານຄ້າຫຼາຍກວ່າ 50 ຮ້ານ ໃຫ້ຜູ້ປົກຄອງໄດ້ເລືອກຊື້ໃນລາຄາທີ່ຖືກ ແລະ ຄາດວ່າຈະມີຜູ້ເຂົ້າຮ່ວມກວ່າ 3 ພັນຄົນຕໍ່ມື້.

ທ່ານ ອະພິຊາດ ສະຫວັດມົງຄົນ ຫົວໜ້າການຕະຫຼາດສູນການຄ້າວຽງຈັນເຊັນເຕີ ໃຫ້ສໍາພາດວ່າ: ກິດຈະກໍາຫຼັກໆແມ່ນຈະມີຂຶ້ນທ້າຍເດືອນນີ້ ເຖິງ 02 ມິຖຸນາ 2019 ເລີ່ມແຕ່ເວລາ 10:00 ຫາ 21:00 ໂມງ ໂດຍໂຊນທາງໜ້າຕຶກຈະເປັນການຈໍາໜ່າຍສິນຄ້າປະເພດອາຫານຂອງກຸ່ມ SME ປະເທດໄທ ແລະ ມີໂຊນເຄື່ອງຫຼິ້ນສໍາລັບເດັກຮ່ວມນໍາ. ສໍາລັບໂຊນໃນຕຶກ ( ຊັ້ນ 1 ) ຈະມີບູດໂຮງຮຽນນານາຊາດທີ່ຈະສະເໜີຂໍ້ມູນດ້ານການຮຽນ – ການສອນແກ່ເດັກ ແລະ ຜູ້ປົກຄອງ ພ້ອມທັງມີງານ “ ສັບປະດາວັດທະນະທໍາ ແລະ ທ່ອງທ່ຽວຈີນ ” ຈັດໂດຍສູນວັດທະນະທໍາຈີນ ປະຈໍາ ສປປ ລາວ ຮ່ວມກັບ ພະແນກວັດທະນະທໍາ ແລະ ທ່ອງທ່ຽວ ແຂວງເສສວນ ເຊິ່ງເປັນໜຶ່ງໃນກິດຈະກໍາສໍາຄັນຂອງປີທ່ອງທ່ຽວ ລາວ – ຈີນ 2019 ເພື່ອມອບຂອງຂວັນດ້ວຍຄວາມເບີກບານມ່ວນຊື່ນໃຫ້ແກ່ເດັກນ້ອຍ ແລະ ປະຊາຊົນໃນນະຄອນຫຼວງວຽງຈັນ ໂດຍມີເກມຕໍ່ເລໂກ້, ເກມ Nitendo Switch, ການແຕ້ມໜ້າກາກງິ້ວ DIY, ບູດຖ່າຍຮູບສາມມິຕິ, ມາສຄອດໝີແພນດ້າ ພ້ອມດ້ວຍຂອງລາງວັນພິເສດຢ່າງຫຼວງຫຼາຍ ແລະ ຜົນງານທີ່ຮ່ວມເຮັດໃນກິດຈະກໍາຕ່າງໆ ກໍຍັງສາມາດເອົາກັບບ້ານເພື່ອເກັບໄວ້ເປັນທີ່ລະນຶກໄດ້ອີກ. ສ່ວນຜູ້ໃຫຍ່ກໍຢ່າຟ້າວຜິດຫວັງເພາະມີການສະແດງໃຫ້ແກ່ຜູ້ໃຫຍ່ໄດ້ຮັບຊົມການຟ້ອນຮ່ວມສະໄໝທີ່ໜ້າຕື່ນຕາຕື່ນໃຈ, ປ່ຽນໜ້າກາກງິ້ວເສສວນທີ່ອັດສະຈັນໃຈ, ການສະແດງຊົງຊາກາປາກຍາວທີ່ເປັນເອກະລັກ ແລະ ກິດຈະກໍາອື່ນໆຕື່ມອີກຈົນຮອດຊັ້ນ 4.

[ ຂ່າວ: ແກ້ວ + ທິບອຸສາ ]