ທີມຊາດລາວ ຊຸດໃຫຍ່ ພິກຊະນະ ສີລັງກາ ພ້ອມກາຍເປັນໄຊຊະນະທໍາອິດໃນຮອບ 8 ນັດ

82

ຖືເປັນການຮຽກຄວາມໝັ້ນໃຈໃຫ້ກັບ ທີມຊາດລາວ ຊຸດໃຫຍ່ ເມື່ອສາມາດເກັບໄຊຊະນະທໍາອິດໃນຮອບ 12 ນັດໄດ້ ຫຼັງສາມາດເປີດບ້ານພິກເອົາຊະນະ ທີມຊາດສີລັງກາ ໄປຫວຸດຫວິດ 2 – 1 ໃນການແຂ່ງຂັນບານເຕະອຸ່ນເຄື່ອງ ເມື່ອວັນທີ 28 ພຶດສະພາ 2019 ທີ່ສະໜາມກີລາແຫ່ງຊາດ ຫຼັກ 16.

ທີມຊາດລາວ ຊຸດໃຫຍ່ ຈັດລາຍການແຂ່ງຂັນ ອຸ່ນເຄື່ອງ 2 ນັດ ພົບກັບ ທີມຊາດສີລັງກາ ໃນວັນທີ 28 ພຶດສະພາ ແລະ ວັນທີ 31 ພຶດສະພາ 2019 ກ່ອນລຸຍການແຂ່ງຂັນບານໂລກ 2022 ທີ່ປະເທດກາຕາ ຮອບຄັດເລືອກຮອບທໍາອິດ ແລະ ການແຂ່ງຂັນບານເຕະຊີງແຊັມອາຊີ ຫຼື ເອເອັຟຊີ ເອຊຽນ ຄັບ 2023 ຮອບຄັດເລືອກຮອບທໍາອິດ FIFA World Cup Qatar 2022™ – Preliminary Competition and AFC Asian Cup 2023 Qualifiers – Preliminary Joint Qualification Round 1 ເພື່ອລຸ້ນເຂົ້າສູ່ຮອບຄັດເລືອກຮອບຕໍ່ໄປ.

ເຊິ່ງເມື່ອວັນທີ 28 ພຶດສະພາ 2019  ເວລາ 18:30 ໂມງ ທີ່ສະໜາມກີລາແຫ່ງຊາດ ຫຼັກ 16 ທີມຊາດລາວ ຕ້ອນຮັບການມາຢາມຂອງ ສີລັງກາ, ກ່ອນໜ້ານີ້ທັງສອງທີມເຄີຍພົບກັນມາ 4 ຄັ້ງ ເປັນລາວ ທີ່ຊະນະ 2, ສະເໝີ 1 ແລະ ເສຍ 1 ນັດ ໂດຍນັດທີ 5 ປາກົດວ່າ: ທີມຊາດລາວ ພົບ ຄວາມກົດດັນຕັ້ງແຕ່ຕົ້ນເກມ ຫຼັງຖືກທີມຊາດ ສີລັງກາ ຂຶ້ນນໍາໄປກ່ອນ 1 – 0 ຈາກການຍິງຂອງ Aakib ນາທີໆ 11. ຢ່າງໃດກໍຕາມ, ໄລຍະເວລາທີ່ເຫຼືອທີມຊາດລາວ ພະຍາຍາມຢ່າງເຕັມທີ່ຈົນມາເຖິງນາທີໆ 86 ແລະ 87 ທີມຊາດລາວ ມາໄດ້ 2 ປະຕູລວດ ຈາກການຍິງຂອງ ຄິດສາຄອນ ຈໍາປາທອງ ແລະ ວັນນະສອນ ດວງໄມຕີ ຕາມລໍາດັບ ຊ່ວຍໃຫ້ ທີມຊາດລາວ ພິກເອົາຊະນະໄປຫວຸດຫວິດ 2 – 1.

ຈາກຜົນດັ່ງກ່າວ ເຮັດໃຫ້ ທີມຊາດລາວ ຊຸດໃຫຍ່ ສາມາດເກັບໄຊຊະນະນັດທໍາອິດ ໃນຮອບ 8 ນັດ ໄດ້ສໍາເລັດ ( ສະເພາະຊຸດໃຫຍ່ ) ເພາະກ່ອນໜ້ານີ້ຊະນະໄດ້ນັດຫຼັງສຸດຄື ບຽດຊະນະ ຕີມໍ ເລັສເຕ 2 – 1 ໃນນັດອຸ່ນເຄື່ອງເມື່ອເດືອນທັນວາ 2017, ສ່ວນອີກ 6 ນັດ. ຈາກນັ້ນ, ແມ່ນເສຍທັງໝົດປະກອບດ້ວຍເສຍໃຫ້ ຟີລິບປິນ 1 – 3, ເສຍໃຫ້ ມົງໂກລີ 1 – 4, ເສຍໃຫ້ ຫວຽດນາມ 0 – 3, ເສຍໃຫ້ ມາເລເຊຍ 1 – 3, ເສຍໃຫ້ ມຽນມາ 1 – 3 ແລະ ເສຍໃຫ້ ກໍາປູເຈຍ 1 – 3.

ສໍາລັບນັດຕໍ່ໄປ ທີມຊາດລາວ ຊຸດ  ໃຫຍ່ ຈະເປີດບ້ານຕ້ອນຮັບການມາຢາມຂອງ ສີລັງກາ ອີກຄັ້ງໃນວັນທີ 31 ພຶດສະພາ 2019 ເວລາ 18:30 ໂມງ ທີ່ສະໜາມກີລາແຫ່ງຊາດ ຫຼັກ 16 ເຂົ້າຊົມຟຣີ​ ເຊິ່ງນັດນີ້ທີມຊາດລາວ ຈະຈັດເຕັມຊຸດແນ່ນອນເພາະ ສຸກອາພອນ ວົງຈຽງຄໍາ ກອງໜ້າຕົວເກັ່ງຈະມາຮ່ວມທີມໃນນັດນີ້ ເພາະນັດທີ 1 ແມ່ນຕິດພາລະກິດຊ່ວຍ ໄຊນາກ ທີມໃນໄທລີກ 1 ຮັບມື ບຸຣີຣໍາ ຢູໄນເຕັດ.

( ຄໍາສອນ )

( ຮູບຈາກ: ສຕລ )