ເສດຖະກິດໂລກມີທ່າອ່ຽງກ້າວສູ່ພາວະຂາລົງ

53

ທ່ານ ຮາຣຸຮິໂກະ ຄຸໂຣດະ ຜູ້ວ່າການທະນາຄານກາງ ຍີ່ປຸ່ນ ຫຼື ບີໂອເຈ ກ່າວວ່າ: ເສດຖະກິດໂລກມີຄວາມບໍ່ແນ່ນອນສູງຫຼາຍ ແລະ ມີທ່າອ່ຽງທີ່ຈະປະເຊີນກັບ ຄວາມສ່ຽງຂາລົງ ເນື່ອງຈາກຂໍ້ພິພາດທາງການຄ້າ, ການຂະຫຍາຍຕົວຊ້າລົງຂອງເສດຖະກິດຈີນ ແລະ ຄວາມບໍ່ແນ່ນອນຂອງການທີ່ ອັງກິດ ອອກຈາກ ອີຢູ.

ເສດຖະກິດໂລກມີທ່າອ່ຽງຟື້ນຄືນໃນໄລຍະທ້າຍປີ 2018 ໂດຍໄດ້ປັດໄຈຊຸກຍູ້ມາຈາກນະໂຍບາຍທາງການເງິນໃນຈີນ ແລະ ປະເທດອື່ນໆໃນອາຊີ, ແຕ່ເສດຖະກິດໂລກຍັງມີຄວາມບໍ່ແນ່່ນອນສູງຫຼາຍ ແລະ ມີ ຄວາມສ່ຽງທີ່ຈະປະເຊີນພາວະຂາລົງ.

ຢ່າງໃດກໍຕາມ, ຄວາມກັງວົນກ່ຽວກັບກະແສເງິນທຶນໄຫຼອອກຈາກປະເທດຈະເລີນໃໝ່ ແລະ ຄວາມກັງວົນກັບການອ່ອນຄ່າຂອງສະກຸນເງິນຕ່າງໆທີ່ເກີດຂຶ້ນໃນໄລຍະທີ່ຜ່ານມານັ້ນໄດ້ເລີ່ມຜ່ອນຄາຍລົງແລ້ວ.

ທ່ານ ມາຊາຊູກຸ ເອຊາຄາວະ ລັດຖະມົນຕີຊ່ວຍກະຊວງການເງິນຍີ່ປຸ່ນ ກ່າວວ່າ: ລັດຖະມົນຕີກະຊວງການເງິນ ແລະ ຜູ້ວ່າການທະນາຄານກາງ ກຸ່ມຈີ 20 ທີ່ຍີ່ປຸ່ນ ຮັບກຽດເປັນເຈົ້າພາບລະຫວ່າງວັນທີ 8 – 9 ເດືອນມິຖຸນາທີ່ຈະເຖິງນີ້ ມີທ່າອ່ຽງທີ່ຈະປຶກສາຫາລືກັນໃນເລື່ອງການຄ້າທີ່ບໍ່ສົມດຸນ ຕະຫຼອດຮອດເລື່ອງການປົກປ້ອງຊັບສິນທາງປັນຍາ ແລະ ນະໂຍບາຍອຸດໜູນຂອງລັດຖະບານ.