ຮ່ວມແຂ່ງຂັນເພາະກາຍຊີງແຊ້ມປະເທດລາວ ປະຈໍາປີ 2019

49

ຂ່າວດີສໍາລັບນັກກີລາເພາະກາຍທີ່ມີຄວາມຝັນ, ຢາກສ້າງປະສົບການ, ພັດທະນາຮ່າງກາຍຕົນເອງ ກຽມໂຕຮ່ວມ ການແຂ່ງຂັນເພາະກາຍຊີງແຊ້ມປະເທດລາວ ຊີງຂັນລັດຖະມົນຕີກະຊວງສຶກສາທິການ ແລະ ກິລາ ປະຈໍາປີ 2019.

ທາງກະຊວງສຶກສາທິການ ແລະ ກິລາ ໄດ້ແຈ້ງ ອະນຸຍາດ ໃຫ້ ສະຫະພັນກີລາເພາະກາຍແຫ່ງຊາດລາວ ຈັດການແຂ່ງຂັນກີລາເພາະກາຍ ຊາຍ ແລະ ແມ່ຍິງ ຮຸ່ນງາມ ຊີງແຊັມປະເທດລາວ (ແຊັມຂັນ ທ່ານ ລັດຖະມົນຕີກະຊວງສຶກສາທິການ ແລະ ກີລາ ປະຈໍາປີ 2019 ຫຼື Mr and miss fitness lao 2019 ເພື່ອເປັນການຍົກລະດັບການແຂ່ງຂັນໃຫ້ຍິ່ງໃຫຍ່ຂຶ້ນກວ່າທຸກໆປີ ສ້າງໂອກາດໃຫ້ທີມຊາດລາວໄດ້ເຂົ້າຮ່ວມການແຂ່ງຂັນກັບນາໆຊາດໃນປີຕໍ່ໆໄປ ເພື່ອສົ່ງເສີມກີລາດ້ານສຸຂະພາບ ພ້ອມທັງກະຕຸ້ນຊຸກຍູ້ການທ່ອງທ່ຽວພາຍໃນປະເທດ ສ້າງພື້ນຖານໃຫ້ກັບບັນດານັກກີລາເພາະກາຍໄດ້ສະແດງຄວາມສາມາດ ແລະ ພັດທະນາຕົນເອງຢູ່ສະເໝີ.

ສໍາລັບການແຂ່ງຂັນທີ່ຈັດຂຶ້ນມີ 5 ປະເພດ ຄື: ເພາະກາຍຊາຍ ນໍ້າໜັກບໍ່ເກີນ 65 ກິໂລ, ເພາະກາຍຊາຍ ນໍ້າຫນັກບໍ່ເກີນ 75 ກິໂລ, ໂມເດລຊາຍ ຄວາມສູງບໍ່ເກີນ 170 ເຊັນຕີແມັດ, ໂມເດລຊາຍ ຄວາມສູງເກີນ 170 ເຊັນຕີແມັດຂື້ນໄປ ແລະ ຍິງຫຸ່ນງາມ women’s model sports.

ສ່ວນເງື່ອນໄຂຂອງນັກກີລາທີ່ຈະລົງແຂ່ງຂັນແມ່ນ ຕ້ອງມີເຊື້ອຊາດລາວ ຫຼື ສັນຊາດລາວເທົ່ານັ້ນ, ມີຄວາມໝັ້ນໃຈ, ອາຍຸ 17 ປີຂື້ນໄປ, ນັກກີລາໜຶ່ງຄົນ ລົງແຂ່ງໄດ້ 1 ປະເພດ ສ່ວນວ່າຈະລົງແຂ່ງປະເພດໃດ ແມ່ນອີງຕາມກ້າມເນື້ອຂອງນັກກີລາເອງ.

ກິດຈະກຳຈະຈັດຂຶ້ນຕັ້ງແຕ່ວັນທີ 30 ຕຸລາ 19 ເປັນຕົ້ນໄປ ແລະ ການແຂ່ງຂັນແມ່ນເລິ່ມຕັ້ງແຕ່ວັນທີ 2 ພະຈິກ 2019 ສະຖານທີ່ຄາດວ່າຈະເປັນສະໂມສອນໃຫຍ່ມະຫາວິທະຍາໄລແຫ່ງຊາດ ດົງໂດກ.

ທ່ານສາມາດສອບຖາມລາຍລະອຽດເພິ່ມຕື່ມໄດ້ທີ່ເບີ 020 5565 5239 /020 2325 6566 /020 5846 6995.