ໂຮງຮຽນປະຖົມພາກລັດຫຼາຍແຫ່ງ ຈະຈັດງານວັນເດັກນ້ອຍສາກົນແບບລຽບງ່າຍ - Laoedaily

ໂຮງຮຽນປະຖົມພາກລັດຫຼາຍແຫ່ງ ຈະຈັດງານວັນເດັກນ້ອຍສາກົນແບບລຽບງ່າຍ

ວັນເດັກນ້ອຍສາກົນ 1 ມິຖຸນາ ໃກ້ເຂົ້າມາແລ້ວ ໃນແຕ່ລະປີເຮົາຈະເຫັນຢູ່ຕາມໂຮງຮຽນ, ສູນການຄ້າ ຕະຫຼອດຮອດສວນອາຫານຕ່າງໆມັກຈະມີກິດຈະກຳເພື່ອສົ່ງເສີມໃຫ້ເດັກນ້ອຍມີເວທີໄດ້ສະແດງຄວາມອາດສາມາດ ຂະນະທີ່ປີນີ້ບັນດາໂຮງຮຽນປະຖົມຕ່າງໆຂອງພາກລັດຈະຈັດວັນເດັກນ້ອຍສາກົນຕາມເງື່ອນໄຂທີ່ມີ, ຫຼີກເວັ້ນການໃຊ້ງົບປະມານທີ່ສູງ, ຫວັງສ້າງຈິດສຳນຶກໃນການປູກໄມ້ໃຫ້ເປັນປ່າ ແລະ ການແບ່ງປັນນ້ຳໃຈກັນຫຼາຍກວ່າ.

ທ່ານ ນາງ ບຸນທັນ ປຸນຍາວົງ ຜູ້ອຳນວຍການໂຮງຮຽນປະຖົມສຶກສາສົມບູນສາທິດ ໃຫ້ສຳພາດວ່າ: ການຈັດງານວັນເດັກນ້ອຍສາກົນຖືເປັນວັນສຳຄັນອີກວັນໜຶ່ງທີ່ສະແດງເຖິງສິດ ແລະ ຜົນປະໂຫຍດຂອງເດັກ ເຊິ່ງປີນີ້ໂຮງຮຽນປະຖົມສຶກສາສົມບູນສາທິດ ຈະຈັດກິດຈະກຳສະເຫຼີມສະຫຼອງວັນເດັກຕາມທີ່ເຄີຍຈັດໃນປີຜ່ານໆມາ ໂດຍປີນີ້ເຮົາຈະຈັດຂຶ້ນພ້ອມກັບວັນສະຫຼຸບການຮຽນຂອງສົກຮຽນ 2018 – 2019 ເນື່ອງຈາກວ່າເພື່ອເປັນການປະຢັດຄ່າໃຊ້ຈ່າຍຕ່າງໆ, ຈະຈັດໃຫ້ມີພິທີອ່ານປະຫວັດ ຄວາມເປັນມາຂອງວັນເດັກນ້ອຍສາກົນ, ມີກິດຈະກຳສິລະປະຂອງແຕ່ລະຊັ້ນຮຽນ, ມອບຂອງຂວັນໃຫ້ແກ່ເດັກນັກຮຽນຜູ້ດີເດັ່ນທາງດ້ານການຮຽນ ແລະ ການປະພຶດກໍຄືກິລິຍາມາລະຍາດ, ຄຸນສົມບັດ ແລະ ອອກແຮງງານ. ນອກນັ້ນ, ຍັງມີກິດຈະກຳນຳພາເດັກນ້ອຍທັງຫຼາຍປູກຕົ້ນໄມ້ໃນຈຸດປູກໄມ້ຕ່າງໆຂອງໂຮງຮຽນ ແລະ ຄາດວ່າຈະຈັດຂຶ້ນໃນວັນທີ 31 ພຶດສະພາ 2019 ນີ້.

ທ່ານ ນາງ ກອງແກ້ວ ສູນດາວົງ ຄູສອນຢູ່ໂຮງຮຽນປະຖົມໜອງໜ່ຽງ ເມືອງໄຊເສດຖາ ໃຫ້ສຳພາດວ່າ: ວັນເດັກນ້ອຍສາກົນ 1 ມິຖຸນາ 2019 ນີ້ ໂຮງຮຽນເຮົາຈະຈັດໃຫ້ເດັກນັກຮຽນທັງຫຼາຍພໍເປັນພິທີເທົ່ານັ້ນ ຈະບໍ່ຈັດໃຫ້ເປັນທາງການເນື່ອງຈາກເປັນການປະຢັດເລື່ອງງົບປະມານ ເຊິ່ງຄາດວ່າຫຼັງຈາກສະຫຼຸບຜົນການສອບເສັງແລ້ວ ວັນທີ 1 ມິຖຸນາ ໂຮງຮຽນຈະນຳພາເດັກນັກຮຽນທັງຫຼາຍປູກຕົ້ນໄມ້ເພື່ອສ້າງຂະບວນການ. ຈາກນັ້ນ, ທາງສະຫະພັນແມ່ຍິງບ້ານຈະມາມອບຂອງຂວັນເລັກໜ້ອຍໃຫ້ແກ່ເດັກນັກຮຽນທັງຫຼາຍ ເປັນຕົ້ນແມ່ນ: ເຂົ້າໜົມ, ນໍ້າຫວານ ມາຢາຍໃຫ້ນ້ອງນັກຮຽນເພື່ອເປັນຂອງຂວັນວັນເດັກນ້ອຍສາກົນ.

ທ່ານ ນາງ ສຸກປະເສີດ ສຸພັນທອງ ຜູ້ອຳນວຍການໂຮງຮຽນປະຖົມສຶກສາສົມບູນທາດຂາວ ໃຫ້ສຳພາດວ່າ: ເນື່ອງໃນວັນເດັກນ້ອຍສາກົນກໍຄືວັນປູກຕົ້ນໄມ້, ໂຮງຮຽນປະຖົມເຮົາຈະບໍ່ຈັດງານ ຫຼື ພິທີທີ່ເປັນທາງການ ພຽງແຕ່ໂຮງຮຽນຈະນຳພາເດັກນັກຮຽນທັງຫຼາຍອອກແຮງງານ ເພື່ອຕ້ອນຮັບວັນເດັກນ້ອຍສາກົນ ແລະ ຫຼັງຈາກນັ້ນກໍແຈກນ້ຳແຈກເຂົ້າໜົມທຳມະດາ ເພື່ອເປັນຂອງຂວັນໃຫ້ນັກຮຽນເທົ່ານັ້ນ.

ທ່ານ ນາງ ສຸວັນນີ ຈັນຫອມດີ ຜູ້ອຳນວຍການໂຮງຮຽນປະຖົມພະຂາວ ໃຫ້ສຳພາດວ່າ: ການຈັດງານສະເຫຼີມສະຫຼອງວັນເດັກນ້ອຍສາກົນຂອງໂຮງຮຽນໃນປີນີ້ແມ່ນຈະບໍ່ໄດ້ຈັດ ເນື່ອງຈາກໂຮງຮຽນຂາດງົບປະມານ, ແຕ່ຈະນຳພານ້ອງນັກຮຽນທັງຫຼາຍສ້າງຂະບວນການປູກຕົ້ນໄມ້ໃນບໍລິເວນໂຮງຮຽນ. ຫຼັງຈາກນັ້ນ, ກໍຊື້ນຳຫວານ ແລະ ເຂົ້າໜົມມາຢາຍເປັນຂອງຂວັນໃຫ້ນັກຮຽນແຕ່ລະຄົນເທົ່ານັ້ນ ໂດຍສະເພາະແມ່ນນັກຮຽນຊັ້ນ ປ 5.

( ຂ່າວ: ກາວຊົ່ງ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ