ປະທານປະເທດສີ ຈິ້ນຜິງ ກ່າວເຖິງສະຖານະການຄວາມຕຶງຄຽດຂອງສົງຄາມການຄ້າກັບສະຫະລັດ ໃນໄລຍະນີ້ວ່າ ເຮັດໃຫ້ຕົກນຶກເຖິງສະໄໝ “ການເດີນກອງທັບທາງໄກ” ໂດຍກອງທັບແດງຂອງພັກຄອມມູນິດ ເຊິ່ງຄົນສະນິດຂອງທ່ານສີ ແປຄວາມວ່າ “ຈີນຈະບໍ່ມີວັນຍອມແພ້”.
ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 22 ພຶດສະພາ ວ່າ ພາຍຫຼັງປະທານປະເທດສີ ຈິ້ນຜິງ ກ່າວລະຫວ່າງການລົງພື້ນທີ່ໃນມົນທົນຈຽງຊີ ທາງພາກຕາເວັນອອກສຽງໃຕ້ຂອງປະເທດ ເມື່ອວັນຈັນ ໃນສະຖານະການທີ່ຈີນກໍາລັງປະເຊີນກັບແຮງກົດດັນຈາກພາຍນອກຢູ່ໃນຕອນນີ້ ເຮັດໃຫ້ຕົນນຶກຢ້ອນກັບໄປເຖິງໄລຍະເວລາຂອງ “ການເດີນກອງທັບທາງໄກ (The Long March) ” ເຊິ່ງເລິ່ມຕົ້ນທີ່ມົນທົນຈຽງຊີ ໂດຍກອງທັບແດງແຫ່ງພັກຄອມມູນິດຈີນ ພາຍໃຕ້ການນໍາຂອງປະທານເໝົາ ເຈີ໋ຕົງ ຍ່າງຕີນເປົ່າຈາກໃຕ້ຂຶ້ນເໜືອ ເປັນໄລຍະທາງໄກກວ່າ 12.500 ກິໂລແມັດ ຜ່ານພື້ນທີ່ທຸລະກັນດານຕະຫຼອດເສັ້ນທາງ ແລະ ໃຊ້ເວລາເດີນທາງດົນກວ່າ 1 ປີ ຈົນຮອດມົນທົນສ່ານຊີ ຕັ້ງຢູ່ທາງພາກເໜືອ ລະຫວ່າງນັ້ນ ມີເຫດການເກີດຂຶ້ນຢ່າງຫຼວງຫຼາຍ ແຕ່ກອງທັບແດງສູ້ຮົບຈົນຊະນະກອງທັບຂອງທ່ານຈຽງ ໄຄເຊັກ ໃນທີ່ສຸດ.
ອີກປະການໜຶ່ງ ຜູ້ນໍາຈີນບໍ່ໄດ້ພາດພິງເຖິງອາເມຣິກາ, ສົງຄາມການຄ້າ ຫຼື ແມ້ແຕ່ກໍລະນີພິພາດລະຫວ່າງ ບໍລິສັດຫົວເຫວີ່ຍ ກັບ ລັດຖະບານວໍຊິງຕັນ ແຕ່ທ່ານຫຼິວ ເຫີ່ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍຂອງຜູ້ນຳຈີນ ຕີຄວາມໝາຍ ວາທະດັ່ງກ່າວຂອງປະທານປະເທດ ວ່າ ເຖິງວ່າໄລຍະເວລານັ້ນ ເກີດຂຶ້ນດົນກວ່າ 70 ປີແລ້ວ ແຕ່ເປັນການສະແດງໃຫ້ເຫັນພາວະຄວາມເປັນຜູ້ນໍາຂອງປະທານປະເທດສີ ຕໍ່ສະຖານະການໃດກໍ່ຕາມໃນໄລຍະນີ້ ວ່າ “ຈີນຈະສູ້ກັບທຸກອຸປະສັກ ແລະ ບໍ່ມີທາງຍອມແພ້ງາຍໆ”.
ໃນເວລາດຽວກັນ ບັນດາເຄືອຂ່າຍສັງຄົມອອນໄລນ໌ຂອງຈີນ ຮ່ວມກັນຕັ້ງແຮັດແທັກ ແລະ ໂພສຂໍ້ຄວາມ, ຮູບພາບ ຫຼື ຄລິບ ສະໜັບສະໜຸນຫົວເຫວີ່ຍ ພ້ອມທັງກ່າວຫາລັດຖະບານວໍຊິງຕັນຂອງປະທານາທິບໍດີໂດນັລ ທຣໍາ ວ່າ “ຂົ່ມຂຸ່ຄຸກຄາມ” ບໍລິສັດແຫ່ງນີ້ຫຼາຍເກີນໄປ ແລະ ປະຊາສໍາພັນໃຫ້ຊາວຈີນອຸດໜຸນສິນຄ້າຂອງຫົວເຫວີ່ຍຫຼາຍຂຶ້ນ. ທັງນີ້, ແຮັດແທັກໜຶ່ງເທິງເຫວີ່ຍປໍ໋ ເຊິ່ງເປັນສັງຄົມອອນໄລນ໌ຍອດນິຍົມ ແລະ ມີຜູ້ໃຊ້ຈໍານວນຫຼາຍທີ່ສຸດໃນຈີນ ແປຄວາມໝາຍໄດ້ວ່າ “ໄມໂຄຣຊິບຂອງຫົວເຫວີ່ຍບໍ່ຈໍາເປັນຕ້ອງເພິ່ງພາອາໄສຕ່ອງໂສ້ອຸປະທານຂອງອາເມຣິກາ ທີ່ລວມເຖິງການຜະລິດ, ການຈັດເກັບ ແລະ ການສົ່ງສິນຄ້າ”.
ເຖິງບໍ່ເປັນທີ່ຊັດເຈນວ່າ ການສ້າງກະແສຊາດນິຍົມເທິງເຄືອຂ່າຍສັງຄົມອອນໄລນ໌ຂອງຈີນຈະສ້າງແຮງກະຕຸ້ນໄດ້ຫຼາຍປານໃດ ແຕ່ລາຍງານໂດຍບໍລິສັດວິເຄາະດ້ານເທັກໂນໂລຢີ ແລະ ອຸດສະຫາກໍາ “IDC: International Data Corporation” ປະຈໍາພາກພື້ນອາຊີ-ປາຊີຟິກ ລະບຸວ່າ ສ່ວນແບ່ງການຕະຫຼາດຂອງແອັບເປິລໃນຈີນ ມີພຽງ 9,1% ເມື່ອປີຜ່ານມາ ແລະ ຍິ່ງຫຼຸດລົງອີກ ເມື່ອສິ້ນສຸດໄຕມາດທໍາອິດຂອງປີນີ້ ໂດຍເຫຼືອພຽງ 7% ຢູ່ໃນອັນດັບ 5 ຂອງຕະຫຼາດສະມາດໂຟນໃນຈີນ.
