ທັບນັກກີລາແລ່ນ – ລານທີມຊາດລາວ ກວາດ 4 ຫຼຽນ ປະກອບມີ 1 ຫຼຽນຄຳ, 2 ຫຼຽນເງິນ ແລະ 1 ຫຼຽນທອງ ສ້າງຜົນງານເດັ່ນກັບມາບ້ານໃນການແຂ່ງຂັນແລ່ນ – ລານ ລາຍການໄທແລນ ໂອເພັນ 2019 ( THAILAND OPEN TRACK & FIELD 2019 ) ທີ່ນະຄອນຫຼວງບາງກອກ ປະເທດໄທ ເປັນເຈົ້າພາບ ລະຫວ່າງ 19 – 21 ພຶດສະພາ 2019.
ເມື່ອວັນທີ 21 ພຶດສະພາຜ່ານມາ ທັບນັກກີລາແລ່ນ – ລານທີມຊາດລາວເຮົາລົງແຂ່ງຂັນມື້ສຸດທ້າຍໃນການແຂ່ງຂັນແລ່ນ – ລານລາຍການໄທແລນ ໂອເພັນ 2019 ທີ່ນະຄອນຫຼວງບາງກອກ ປະເທດໄທ ເປັນເຈົ້າພາບ.
ຜ່ານການແຂ່ງຂັນເປັນເວລາ 3 ວັນ ທັບນັກກີລາລາວເຮົາສາມາດກວາດມາໄດ້ເຖິງ 4 ຫຼຽນ ປະກອບມິີ 1 ຫຼຽນຄຳ ຈາກ ທ້າວ ອານຸສອນ ໄຊສາ ລາຍການແລ່ນຂ້າມຮົ້ວ 110 ແມັດຊາຍ, 2 ຫຼຽນເງິນ ຈາກ ນາງ ໄຂມາ ພົນຍະໄຊ ລາຍການເຕັ້ນຍາວ ແລະ 4 ຄູນ 100 ຍິງ ຈາກ ນາງ ປ້ອມ ລໍມະນີ, ນາງ ໄຂມາ ໂພນຍະໄຊ, ນາງ ຂັນມະໄລພອນ ບຸນຍະເວີນ ແລະ ນາງ ມະນີວັນ ຈັນທະວົງ ແລະ 1 ຫຼຽນທອງ ຈາກ ນາງ ມະນີວັນ ຈັນທະວົງ ລາຍການແລ່ນຂ້າມຮົ້ວ 100 ແມັດຍິງ.
ສຳລັບການແຂ່ງຂັນລາຍການດັ່ງກ່າວນີ້ ແມ່ນເລີ່ມແຂ່ງຂັນກັນແຕ່ວັນທີ 19 – 21 ພຶດສະພາ 2019 ເຊິ່ງທັບນັກກີລາແລ່ນ – ລານ ທີມຊາດລາວ ອອກເດີນທາງແຕ່ວັນທີ 18 ພຶດສະພາ ແລະ ຈະເດີນທາງກັບມາໃນວັນທີ 22 ພຶດສະພາ 2019.
ຂະນະທີ່ ສະຫະພັນກີລາແລ່ນ – ລານແຫ່ງຊາດລາວ ໄດ້ສົ່ງນັກກີລາເຂົ້າຮ່ວມທັງໝົດ ຈຳນວນ 12 ຄົນ ພາຍໃຕ້ການນໍາທີມຂອງ ທ່ານ ຈະເລີນສຸກ ອ່າວອຸດົມພັນ ຄະນະຄູຝຶກ, ທ່ານ ຍິ່ງຍົດ ໂນວອມ ຄູຝຶກ ແລະ ທ່ານ ນາງ ລັດຕະນະພອນ ແສງຈັນທະວົງ ຜູ້ຊ່ວຍຄູຝຶກ.
ສ່ວນນັກກີລາປະກອບມີ 12 ຄົນ ທັງໝົດປະກອບມີ ທ້າວ ອານຸສອນ ໄຊສາ, ທ້າວ ໄຊດາວັນ ວົງສະຫວັນ, ທ້າວ ສີພາສຸກ ບົດວິໄລທອງ, ທ້າວ ນັນທະວັດ ເຄນຕານອ່ອນ, ທ້າວ ສະຖາພອນ ໄຊຍະພອນ, ນາງ ຂັນມະໄລພອນ ໄຊຍະພອນ, ນາງ ມະນີວັນ ຈັນທະວົງ, ນາງ ສິຣິນາ ພະອາໄພ, ນາງ ປ້ອມ ໂລມະນີ, ນາງ ລົດແກ້ວ ອິນທະກຸນມານ, ນາງ ໄຂມາ ພົນຍະໄຊ ແລະ ນາງ ພອນໄຊ ປ່າວສະຫວັດ.
( ຄໍາສອນ )
