ຊາວການາດາ 4 ຄົນ ແລະ ນັກບິນຊາວອາເມຣິກັນອີກ 1 ຄົນ ເສຍຊີວິດ ເມື່ອວັນເສົາ ທີ່ຜ່ານມາ ຫຼັງຍົນນ້ອຍຕົກໃນທະເລນອກຝັ່ງຂອງເກາະຣົວຕັນຂອງປະເທດຮອນດູຣັສ ຂະນະເດີນທາງມາພັກຜ່ອນ.
ສໍານັກຂ່າວເອເອັຟພີລາຍງານຈາກປະເທດຮອນດູຣັສ ເມື່ອວັນອາທິດ ທີ 19 ພຶດສະພາ ວ່າ ເຈົ້າໜ້າທີ່ກູ້ໄພຂອງຮອນດູຣັສ ເປີດເຜີຍວ່າ ພົບຍົນນ້ອຍລໍາໜຶ່ງປະສົບອຸບັດຕິເຫດຕົກໃນທະເລນອກຝັ່ງເກາະຣົວຕັນຂອງປະເທດຮອນດູຣັສ ເມື່ອວັນເສົາ ທີ່ຜ່ານມາ ຈຸດທີ່ພົບຊາກຍົນນັ້ນຢູ່ໃກ້ກັບເມືອງດິກຊັນ ໂຄຟ ຫຼັງຈາກຍົນລໍານີ້ບິນຂຶ້ນມາຈາກສະໜາມບິນເທິງເກາະຣົວຕັນໄດ້ບໍ່ເທົ່າໃດນາທີເທົ່ານັ້ນ.
ເຈົ້າໜ້າທີ່ກູ້ໄພພົບສົບຜູ້ເສຍຊີວິດເປັນຊາວການາດາ 4 ຄົນ ຮູ້ຊື່ແລ້ວວ່າມີ ແບຼດລີ ໂພສ, ໄບລີ ໂຊນີ, ໂທມີ ດັບເລີ ແລະ ນັກບິນຜູ້ຊ່ວຍຊາວການາດາຊື່ ແອນໂທນີ ດັບເລີ ເຊິ່ງໄດ້ຮັບບາດເຈັບສາຫັດ ແຕ່ໄປເສຍຊີວິດທີ່ໂຮງໝໍ ສ່ວນອີກໜຶ່ງຄົນເປັນນັກບິນຊາວອາເມຣິກັນ ຊື່ ແພດຣິກ ຟໍເຊດ.
ສາເຫດຂອງການຕົກຍັງບໍ່ເປັນທີ່ຊັດເຈນ ລວມເຖິງຂໍ້ມູນຂອງຍົນລໍາທີ່ເກີດເຫດ ຮູ້ພຽງວ່າອຸບັດຕິເຫດເກີດຂຶ້ນຂະນະທີ່ຍົນລໍານີ້ ກໍາລັງນໍານັກທ່ອງທ່ຽວຊາວການາດາອອກເດີນທາງຈາກເກາະຣົວຕັນເດີນທາງໄປເມືອງທຣູຈິນໂຢ ເຊິ່ງຢູ່ຫ່າງອອກໄປ 77 ກິໂລແມັດ ເພື່ອພັກຜ່ອນ.
