ສະຫຼອງວັນວິສາຂະບູຊາ

54

ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ ( ອພສ ) ຮ່ວມກັບສູນກາງແນວລາວສ້າງຊາດ ຈັດພິທີສະຫຼອງວັນວິສາຂະບູຊາ ພຸດທະສັງກາດ 2562 ຂຶ້ນທີ່ຫໍປະຊຸມແຫ່ງຊາດ ແລະ ວັດທາດຫຼວງ ( ເດີ່ນພະທາດຫຼວງວຽງຈັນ ) ໂດຍການເຂົ້າຮ່ວມຂອງ ພະອາຈານໃຫຍ່ ມະຫາງອນ ດຳຣົງບຸນ ປະທານອົງການພຸດທະສາສະໜາສຳພັນ ແຫ່ງ ສປປ ລາວ, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ພ້ອມດ້ວຍພະສົງສາມະເນນ ແລະ ອອກຕົນຍາດໂຍມທັງພາຍໃນ ແລະ ຕ່າງປະເທດເຂົ້າຮ່ວມຢ່າງແໜ້ນໜາ ໃນລະຫວ່າງວັນທີ 16 – 17 – 18 ພຶດສະພາຜ່ານມາ.

ພະອາຈານ ບຸນທະວີ ປະສິດທິສັກ ຄະນະບໍລິຫານງານປະຈຳການ ອພສ, ຫົວໜ້າກຳມາທິການສາທາລະນຸປະການ, ຕາງໜ້າໃຫ້ແກ່ຄະນະກຳມະການຈັດງານ ກ່າວວ່າ: ວັນວິສາຂະບູຊາ ເປັນວັນທີ່ສຳຄັນທີ່ສຸດໃນພຸດທະສາສະໜາ ເພາະເປັນວັນຄ້າຍວັນປະສູດອອກຈາກພະຄັນພະມານດາ, ເປັນວັນຕັດສະຮູ້, ວັນສະເດັດສູ່ປະລິນິພານຂອງພະສຳມາສຳພຸດທະເຈົ້າ. ດັ່ງນັ້ນ, ພຸດທະບໍລິວານທັງປວງ ໂດຍສະເພາະປະຊາຊົນລາວບັນດາເຜົ່າຈຶ່ງຈັດງານວິສາຂະບູຊານີ້ຂຶ້ນຕາມພະທຳຄຳສອນຂອງພະພຸດທະເຈົ້າ, ພະທຳຂະເຈົ້າ, ພະສັງຂະເຈົ້າ ໂດຍມີຈຸດປະສົງຫຼັກ ຄື: 1. ເພື່ອນ້ອມລະນຶກເຖິງປະຫວັດຂອງພະສຳມາສຳພຸດທະເຈົ້າ, 2. ເພື່ອສົ່ງເສີມກິດຈະກຳອັນເປັນບຸນກຸສົນໃນວັນສຳຄັນທາງພຸດທະສາສະໜາ, 3. ເພື່ອສົ່ງເສີມກິດຈະກຳອັນເປັນບຸນກຸສົນວັນວິສາຂະບູຊາ ເຊິ່ງເປັນວັນສຳຄັນຂອງໂລກຕາມການປະກາດຂອງອົງການສະຫະປະຊາຊາດ, 4. ເພື່ອສົ່ງເສີມກິດຈະກຳເປັນບຸນກຸສົນຂອງຮີດຄອງປະເພນີວັດທະນະທຳຂອງມວນຊົນລາວບັນດາເຜົ່າ ແລະ 5. ເພື່ອສ້າງ ຄວາມສາມັກຄີ, ຊຸກຍູ້ສົ່ງເສີມສິລະປະວັດທະນະທຳຮີດຄອງປະເພນີຂອງຊາດ.

ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໄດ້ກ່າວວ່າ: ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ພະສົງສາມະເນນຍິ່ງມີບົດບາດສຳຄັນຫຼາຍໃນການປະກອບສ່ວນສຶກສາອົບຮົມລູກຫຼານຂອງປະຊາຊົນບັນດາເຜົ່າໃຫ້ຮູ້ບາບບຸນຄຸນໂທດ, ຮູ້ຈັກຜົນຮ້າຍຂອງອະບາຍຍະມຸກຕ່າງໆ, ທັງປະກອບສ່ວນເຂົ້າໃນການປົກປັກຮັກສາ ແລະ ສ້າງສາປະເທດຊາດໃຫ້ຈະເລີນຮຸ່ງເຮືອງ. ດັ່ງນັ້ນ, ການສະເຫຼີມສະຫຼອງວັນວິສາຂະບູຊາທີ່ໝາຍເຖິງວັນປະສູດ, ຕັດສະຮູ້ ແລະ ວັນສະເດັດເຂົ້າສູ່ປະລິນິພານຂອງພະພຸດທະເຈົ້າ, ປີ 2019 ນີ້ຖືວ່າເປັນຄັ້ງປະຫວັດສາດທີ່ໄດ້ຈັດຂຶ້ນຢ່າງໃຫຍ່ໂຕມະໂຫລານ, ເປັນການຍົກສູງບົດບາດຂອງພຸດທະສາສະໜາ ໂດຍສະເພາະຄຳສອນຂອງພະພຸດທະເຈົ້າທີ່ສັ່ງສອນໃຫ້ມວນມະນຸດມີຄວາມຮັກ, ມີຄວາມເມດຕາກັນ ແລະ ບໍ່ໃຫ້ຈຳແນກແບ່ງແຍກຊົນຊັ້ນວັນນະ, ສອນໃຫ້ທຸກຄົນມີສິດສະເໝີພາບເທົ່າທຽມກັນ. ສະນັ້ນ, ອົງການສະຫະປະຊາຊາດ ຈຶ່ງມີມະຕິກຳນົດເອົາວັນວິສາຂະບູຊາເປັນວັນສຳຄັນຂອງໂລກ ໃນວັນທີ 15 ທັນວາ ປີ 1999 ເປັນຕົ້ນມາ.

ການສະເຫຼີມສະຫຼອງວັນວິສາຂະບູຊາປີນີ້ໄດ້ເຊີນເອົາບັນດາທ່ານທູຕານຸທູດ, ຕາງໜ້າອົງການຈັດຕັ້ງສາກົນ, ເພື່ອນມິດທັງໃກ້ ແລະ ໄກເຂົ້າຮ່ວມ ໂດຍສະເພາະພີ່ນ້ອງຊາວໄທທີ່ເປັນພະສົງ, ຜູ້ມີບົດບາດຊື່ສຽງ ແລະ ຄາລະວາດຢູ່ລຽບຊາຍແດນມາເຂົ້າຮ່ວມຢ່າງຫຼວງຫຼາຍ ນັບວ່າເປັນນິມິດໝາຍອັນດີໃນວິຖີຊາວພຸດ ລາວ – ໄທ ທີ່ມີຮີດຄອງປະເພນີຄ້າຍຄືກັນ, ນັບຖືພຸດທະສາສະໜາຄືກັນ.

ເຊິ່ງບັນຍາກາດນັບແຕ່ມື້ຮັບບໍລິຈາກ ວັນທີ 16 – 17 – 18 ທຸກກິດຈະກຳແມ່ນໄດ້ຮັບຄວາມສົນໃຈຈາກມວນຊົນລາວ ແລະ ຕ່າງປະເທດຢ່າງຫຼົ້ນຫຼາມ ເຊິ່ງສະແດງອອກໃນພິທີເປີດມີຜູ້ເຂົ້າຮ່ວມປະມານ 2 ພັນຄົນ. ພິທີໃສ່ບາດກໍມີມວນຊົນໄປຮ່ວມໃສ່ບາດເປັນແຖວຍາວຢຽດປານກັບໃສ່ບາດບຸນພະທາດຫຼວງ, ພິທີແຫ່ຕົ້ນກໍມີມວນຊົນຮ່ວມປະກອບຕົ້ນຂອງຕົນເພື່ອຖວາຍ, ພິທີວຽນທຽນກໍມີອອກຕົນຍາດໂຍມເຂົ້າຮ່ວມຢ່າງແໜ້ນໜາ. ຫຼັງຈາກນັ້ນ, ກໍມີພິທີສົມໂພດພະພຸດທະໂລກະນາດເປີດທຳ ທີ່ໜ້າຫໍທຳມະສະພາ.