ເຈນນີ່ ຊະນະເລີດການປະກວດຮ້ອງເພງPepsi singing Contest 8

66

ວັນທີ 17 ພຶດສະພາ 2019 ບໍລິສັດ ເບຍລາວ ຈຳກັດ ໄດ້ຈັດງານປະກວດຮ້ອງເພງຮອບຊີງຊະນະເລີດ ໃນໂຄງການ  Pepsi singing Contest 8 ( PSC ) ປະຈຳປີ 2019 ຂຶ້ນທີ່ຫໍວັດທະນະທຳແຫ່ງຊາດ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ນາງ ແສງມະນີ ໄຊຍະກອນ ຜູ້ຈັດການການຕະຫຼາດ ຜະລິດຕະພັນນໍ້າອັດລົມ ເປບຊີ ພ້ອມດ້ວຍບັນດາຄະນະກຳມະການຕັດສິນ, ຄູຝຶກ, ຜູ້ໃຫ້ຄວາມຄິດເຫັນ, ບັນດາຜູ້ເຂົ້າປະກວດ ແລະ ກອງເຊຍເຂົ້າຮ່ວມຢ່າງຫຼວງຫຼາຍ.

ການເຂົ້າປະກວດແຂ່ງຂັນຮ້ອງເພງໃນຄັ້ງນີ້ ປະກອບດ້ວຍ 2 ລາຍການ ຄື: ລາຍການຮ້ອງເພງຊ້າ ໂດຍຜູ້ປະກວດທັງໝົດ 12 ຄົນ ຕ້ອງໄດ້ມາແຂ່ງຂັນຮ້ອງເພງດ່ຽວ ແລະ ລາຍການຮ້ອງເພງໄວຂອງແຕ່ລະທີມ ໂດຍປະກອບມີທັງໝົດ 4 ທີມ ທີມລະ 3 ຄົນ ຕາມການຝຶກຝົນຂອງຄູຝຶກ ເຊິ່ງຜູ້ໃຫ້ຄວາມຄິດເຫັນ ແລະ ຄະນະກຳມະການຈະໃຫ້ຄະແນນຕາມນໍ້າສຽງຮ້ອງ ແລະ ສິລະປະການສະແດງ.

ຜົນປາກົດວ່າ ຜູ້ຊະນະເລີດໄດ້ແກ່ໝາຍເລກ P10 ນາງ ນຸດສະບາ ດາວະດິງ ( ເຈນນີ່ ) ອາຍຸ 21 ປີ ນັກສຶກສາ ປີ 3 ສາຂາວິຊາເສດຖະສາດພັດທະນາ ແລະ ການວາງແຜນ ຄະນະເສດຖະສາດ ແລະ ບໍລິຫານທຸລະກິດ ໄດ້ຮັບລາງວັນ 15 ລ້ານກີບ ພ້ອມດື່ມເປບຊີຟຣີໜຶ່ງປີ ແລະ ກຽມອອກຊຸດເພງເປັນຂອງຕົນເອງ.

ຮອງຊະນະເລີດອັນດັບໜຶ່ງໄດ້ແກ່ໝາຍເລກ P05 ນາງ ຈັນທະໜອມ ແກ້ວມໍລະກົດ ( ເຈນນີ່ ເບວລາ ) ໄດ້ຮັບລາງວັນ 10 ລ້ານກີບ; ຮອງຊະນະເລີດອັນດັບ 2 ໄດ້ແກ່ ທ້າວ ກິດຕິສັກ ບົວສະຫວັນ ( ກັອດ ) ໄດ້ຮັບລາງວັນ 8 ລ້ານກີບ

ລາງວັນຂວັນໃຈມະຫາຊົນ ( Popular Vote ) ໄດ້ແກ່ໝາຍເລກ P02 ນາງ ມົນທິບ ດວງລາຕີ ( ໝ້ວຍ ) ໄດ້ຮັບລາງວັນ 5 ລ້ານກີບ ແລະ ທີມທີ່ຊະນະເລີດໃນການສະແດງ ແລະ ຮ້ອງເພງໄວໄດ້ແກ່ທີມຂອງຄູຝຶກຕ໋ອກ ( Coach Toh ) ໄດ້ຮັບລາງວັນ 5 ລ້ານກີບ.

ນອກນັ້ນ, ຍັງມີລາງວັນຊົມເຊີຍໃຫ້ແກ່ຜູ້ເຂົ້າແຂ່ງຂັນໃນຮອບຊີງຊະນະເລີດທັງໝົດ 9 ລາງວັນ ລາງວັນລະ 4 ລ້ານກີບ ແລະ ມີລາງວັນພິເສດ Gift Voucher ຈາກທາງຮ້ານ Free Man Shop ຈຳນວນ 2 ລາງວັນ ລາງວັນລະ 1 ລ້ານກີບ ໃຫ້ແກ່ຜູ້ທີ່ມີນໍ້າສຽງຮ້ອງເພງດີທັງຍິງ ແລະ ຊາຍອີກດ້ວຍ.

ນາງ ນຸດສະບາ ດາວະດິງ ຜູ້ຊະນະເລີດໄດ້ໃຫ້ສຳພາດວ່າ: ຕົນເອງມີ ຄວາມພາກພູມໃຈ, ດີໃຈ ແລະ ຕື່ນເຕັ້ນທີ່ສາມາດຍາດໄດ້ລາງວັນຊະນະເລີດມາຄອງ ເຊິ່ງຕົນເອງໄດ້ເຂົ້າແຂ່ງຂັນໃນໂຄງການ PSC ຂອງ ບໍລິສັດ ເບຍລາວ ເປັນປີທີສອງແລ້ວ. ສະນັ້ນ, ບັນດາໝູ່ເພື່ອນ ແລະ ນ້ອງໆທັງຫຼາຍຈົ່ງພະຍາຍາມຕັ້ງໃຈສູ້ຊົນເພື່ອໃຫ້ສາມາດຍາດໄດ້ລາງວັນຊະນະເລີດມາຄອງໃນປີຕໍ່ໆໄປ ເພາະຕົນເອງເຫັນວ່າແຕ່ລະຄົນທີ່ສາມາດເຂົ້າມາຮອບຊີງຊະນະເລີດລ້ວນແຕ່ເປັນຜູ້ທີ່ມີສຳນຽງນໍ້າສຽງຮ້ອງເພງທີ່ດີ ແລະ ມີຫຼາກຫຼາຍ ຄວາມສາມາດນັ້ນເອງ.