ເທສະບານນະຄອນຫຼວງເມັກຊິໂກ ຊິຕີ້ ເມືອງຫຼວງຂອງປະເທດເມັກຊິໂກ ເລັ່ງຫາທາງແກ້ໄຂວິກິດໝອກຄວັນພິດ ທັງການປິດໂຮງຮຽນ ຈໍາກັດການໃຊ້ລົດ ແລະ ການເຮັດວຽກຂອງໜ່ວຍງານກໍ່ສ້າງ ລະຫວ່າງສຽງວິຈານວ່າດຳເນີນການ “ຫຼ້າຊ້າເກີນໄປ”.
ສໍານັກຂ່າວຕ່າງປະເທດລາຍງານຈາກນະຄອນຫຼວງເມັກຊິໂກ ຊິຕີ້ ປະເທດເມັກຊິໂກ ເມື່ອວັນພະຫັດ ທີ 16 ພຶດສະພາ ວ່າ ສໍານັກງານເທສະບານນະຄອນຫຼວງເມັກຊິໂກ ຊິຕີ້ ເຊິ່ງມີປະຊາກອນອາໄສຢູ່ຫຼາຍເຖິງ 20 ລ້ານຄົນ ອອກຖະແຫຼງການ ເມື່ອວັນພະຫັດ ວ່າ ໄດ້ຂະຫຍາຍເວລາປິດໂຮງຮຽນທຸກແຫ່ງ ໃນພື້ນທີ່ ເປັນໄລຍະ 2 ວັນຕິດຕໍ່ກັນ ຫຼັງອອກປະກາດເຕືອນໄພ ສະຖານະການສຸກເສີນດ້ານສິ່ງແວດລ້ອມ ເມື່ອວັນອັງຄານ ຜ່ານມາ ພ້ອມທັງຂໍຄວາມຮ່ວມມືໃຫ້ປະຊາຊົນ ໂດຍສະເພາະເດັກນ້ອຍ, ແມ່ຕັ້ງຄັນ ແລະ ຜູ້ສູງອາຍຸ ໃຫ້ຫຼີກລ່ຽງການເຮັດກິດຈະກໍາກາງແຈ້ງ ແລະ ປະຊາສຳພັນໃຫ້ປະຊາຊົນໃສ່ໜ້າກາກທີ່ີຄຸນນະພາບເພື່ອປ້ອງກັນຝຸ່ນລະອອງ.
ຂະນະດຽວກັນ ທາງການຍັງອອກມາດຕະການຄວບຄຸມການໃຊ້ພາຫະນະເກົ່າ, ການລະງັບໂຄງການກໍ່ສ້າງ ເຊິ່ງໃຊ້ພື້ນທີ່ຫຼາຍກວ່າ 5 ພັນແມັດກ້ອນ ແລະ ການອອກຄໍາສັ່ງໃຫ້ໂຮງງານອຸດສາຫະກໍາຫຼາຍແຫ່ງໃຫ້ຫາວິທີການຫຼຸດການປ່ອຍມົນລະພິດໃຫ້ໄດ້ ລະຫວ່າງ 30% ເຖິງ 40%. ຢ່າງໃດກໍ່ຕາມ, ທ່ານນາງຄຼໍເດຍ ໄຊນ໌ບາວ ນາຍົກເທສະມົນຕີຍິງຂອງນະຄອນຫຼວງເມັກຊິໂກ ຊິຕີ້ ເຊິ່ງຊະນະການເລືອກຕັ້ງ ແລະ ຮັບຕໍາແໜ່ງເມື່ອເດືອນທັນວາ ປີຜ່ານມາ ກໍ່ຜະເຊີນກັບສຽງວິພາກວິຈານຢ່າງໜັກຈາກຫຼາຍຝ່າຍ ວ່າ ການດໍາເນີນການກັບວິກິດດ້ານສິ່ງແວດລ້ອມຄັ້ງນີ້ “ຫຼ້າຊ້າເກີນໄປ” ຫຼື ບໍ່.
