ສຳນັກຂ່າວຊິນຫົວ ຂອງຈີນ ລາຍງານເມື່ອວັນພຸດ ທີ 15 ພຶດສະພາ ວ່າ ສໍານັກງານແຜ່ນດິນໄຫວເສສວນ ເຜີຍແຜນການເປີດບໍລິການເຕືອນໄພລ່ວງໜ້າ ກ່ອນເກີດເຫດແຜ່ນດິນໄຫວພາຍໃນມົນທົນເສສວນ ເຊິ່ງຕັ້ງຢູ່ເທິງພື້ນທີ່ສ່ຽງເກີດແຜ່ນດິນໄຫວ ທາງພາກຕາເວັນຕົກສຽງໃຕ້ຂອງຈີນ ໂດຍກໍານົດກອບເວລາພາຍໃນໝົດປີ 2019.
ລາຍງານລະບຸວ່າ ລະບົບເຕືອນໄພລ່ວງໜ້າຈະສົ່ງສັນຍານເຕືອນປະຊາຊົນຜ່ານຊ່ອງທາງການກະຈາຍຂ່າວປະເພດຕ່າງໆ ພາຍໃນບໍ່ເທົ່າໃດວິນາທີ ກ່ອນຄື້ນແຜ່ນດິນໄຫວສັ່ນສະເທືອນມາຮອດ ໂດຍອ້າງອິງທິດສະດີຄື້ນວິທະຍຸທີ່ເດີນທາງໄວກວ່າຄື້ນແຜ່ນດິນໄຫວ.
ອີກປະການໜຶ່ງ ການວິໄຈກ່ຽວກັບແຜ່ນດິນໄຫວພົບວ່າການຮັບຮູ້ລ່ວງໜ້າ 3 ວິນາທີ ຈະຊ່ວຍຫຼຸດຈໍານວນຜູ້ບາດເຈັບ 14% ແລະ ຖ້າເພິ່ມເປັນ 10 ວິນາທີ ກໍ່ຈະຊ່ວຍຫຼຸດລົງອີກ 39% ແຕ່ຫາກເພີ່ມເປັນ 20 ວິນາທີ ກໍ່ຈະຊ່ວຍຫຼຸດລົງເຖິງ 63%.
ລະບົບເຕືອນໄພລ່ວງໜ້າ ຈະສົ່ງຂໍ້ມູນເບື້ອງຕົ້ນຂອງເຫດແຜ່ນດິນໄຫວທີ່ເກີດຂຶ້ນພາຍໃນ 1-2 ນາທີ ຂະໜາດແຮງສັ່ນສະເທືອນ ພາຍໃນ 2-5 ນາທີ ແລະ ການປະເມີນໄພພິບັດ ພາຍໃນ 2 ຊົ່ວໂມງ ຫຼັງຈາກເກີດເຫດແຜ່ນດິນໄຫວ.
ທັງນີ້ ປະສິດທິພາບການເຝົ້າຕິດຕາມເຫດແຜ່ນດິນໄຫວ ແລະ ການບັນເທົາໄພພິບັດຂອງຈີນ ພັດທະນາຍິ່ງຂຶ້ນ ນັບຈາກປີ 2008 ຫຼັງເກີດແຜ່ນດິນໄຫວໃຫຍ່ໃນເມືອງເວິນຊວນ ຂອງມົນທົນເສສວນ ເຊິ່ງເຮັດໃຫ້ມີຜູ້ເສຍຊີວິດ ຫຼາຍກວ່າ 69 ພັນຄົນ ແລະ ມີຜູ້ສູນຫາຍ ເກືອບ 18 ພັນຄົນ.
ຈີນໄດ້ຕິດຕັ້ງລະບົບເຝົ້າຕິດຕາມ ແລະ ເຕືອນໄພແຜ່ນດິນໄຫວຕາມເສັ້ນທາງລົດໄຟຄວາມໄວສູງ ຈໍານວນ 20 ເສັ້ນທາງ ທົ່ວປະເທດ ເຊິ່ງຄິດເປັນໄລຍະທາງຍາວ 6.642 ກິໂລແມັດ.
