ອົງພຣະພຸດທະໂພຄາຣິຍະມະຫາມຸນີ ເດີນທາງມາຈາກຫວຽດນາມໃກ້ເຖິງຫຼວງພະບາງແລ້ວ - Laoedaily

ອົງພຣະພຸດທະໂພຄາຣິຍະມະຫາມຸນີ ເດີນທາງມາຈາກຫວຽດນາມໃກ້ເຖິງຫຼວງພະບາງແລ້ວ

ແຈ້ງຂາວດີ! ອົງພະເຈົ້າໃຫຍ່ທີ່ເຄື່ອນຍ້າຍຈາກນະຄອນດານັງ ສສ.ຫວຽດນາມ ຫວຽດນາມ ມາປະທັບຢູ່ນະຄອນ ຫຼວງພະບາງ ປັດຈຸບັນເດີນທາງມາເຖິງບ້ານ ຫ້ວຍສະແຕບ, ເມືອງ ພູຄູນ, ແຂວງຫຼວງພະບາງແລ້ວ ແຕ່ລົດຂົນສົ່ງເກີດມີບັນຫາ, ເຊິ່ງຕອນນີ້ກຳລັງປະສານເອົາລົດຈາກຫຼວງພະບາງໄປປ່ຽນ ເພື່ອເຄື່ອນຍ້າຍອົງພຣະພຸດທະໂພຄາຣິຍະມະຫາມຸນີ ມາທຳພິທີສົມໂພດທ້າຍອາທິດນີ້.

 

 

ສະນັ້ນ, ບັນດາສາຍບຸນທັງຫຼາຍໃຫ້ກຽມຕົວກຽມໃຈເຂົ້າຮ່ວມສຳລັບກິດຈະກຳ ທີ່ຈະຈັດຂຶ້ນມີດັ່ງນີ້: ວັນທີ 17 ພຶດສະພາ 2019 ຕອນແລງຈະມີພິທີກຳສົມໂພດຊອດແຈ້ງ, ວັນທີ 18 ພຶດສະພາ 2019 ຈະມີພິທີຕັກບາດຖວາຍສັງຄະທານ ພາຍໃນວັດ ມີເຖຣາພິເສກ, ເທດອຸປະຄຸດ ມາໄລໝື່ນ-ມາໄລແສນ. ຫຼັງຈາກນັ້ນ, ວັນທີ 19 ພຶດສະພາ 2019 ແມ່ນຈະໄດ້ຮັບຟັງທໍາມະເທດສະໜາ ເທດມະຫາຊາດ.

 

 

“ອົງພຣະພຸດທະໂພຄາຣິຍະມະຫາມຸນີ” ສ້າງດ້ວຍຫີນອ່ອນ ອົງພຣະພຸດທະໂພຄາຣິຍະມະຫາມຸນີ ມີຄວາມໝາຍວ່າ: “ພຣະພຸດທະເຈົ້າ ອົງປະທານອະຣິຍະຊັບເປັນພອນ” ມີໜ້າຕັກກວ້າງ 309 cm, ລວງສູງ 509 cm, ນໍ້າໜັກ 38 ໂຕນ, ປະຕິມາກຳໃຊ້ຫີນອ່ອນ ແກະສະຫຼັກເປັນອົງພຣະພຸດທະເຈົ້າສິລະປະແບບລ້ານຊ້າງ-ຈາມ ແບບປະສົມປະສານ ມູນຄ່າການກໍ່ສ້າງ 70.000 ໂດລາສະຫະລັດ.

ຂະບວນຂົນສົ່ງໄດ້ເຄື່ອນຈາກໂຮງງານຫີນອ່ອນ ນະຄອນດານັງ ສູ່ດ່ານສາກົນລາວບ໋າວ ຊາຍແດນ ຫາ ເມືອງເຊໂປນ ແຂວງສະຫວັນນະເຂດ ຫາ ນະຄອນ ຫຼວງວຽງຈັນ ແລະ ນະຄອນ ຫຼວງພະບາງ ໃນລະຫວ່າງ ວັນທີ 09 ຫາ 11 ພຶດສະພາ 2019 ເພື່ອນຳໄປປະດິດສະຖານໄວ້ທີ່ ວັດພູຄວາຍໂພຄາຣາມ ບ້ານນາສ້າງເຫວີຍ ນະຄອນ ຫຼວງພະບາງ ແຂວງຫຼວງພະບາງ.

 

ພະພຸດທະຮູບດັ່ງກ່າວ ນຳພາກໍ່ສ້າງໂດຍ: ສາທຸໃຫຍ່ ຈັນທະຣິນ ຈິນນະທັມໂມ ກຳມະການສູນກາງ ອົງການພຸດທະສາສະໜາສຳພັນລາວ, ຮອງປະທານ ອົງການພຸດທະສາສະໜາສຳພັນລາວ ແຂວງຫຼວງພະບາງ, ເຈົ້າອະທິການວັດພູຄວາຍໂພຄາຣາມ, ພ້ອມດ້ວຍພໍ່ແມ່ຄູບາອາຈານ ແລະ ອອກຕົນຍາດໂຍມຜູ້ມີຈິດສັດທາຮ່ວມສ້າງ.

 

ສຳລັບປະຊາຊົນ ຫຼື ພຸດທະບໍລິສັດ ທີ່ມີຈິດໃຈໃສສັດທາ ສາມາດສົມທົບທຶນເປັນເຈົ້າພາບເຈົ້າສັດທາ ຮ່ວມບຸນໄດ້ຕະຫຼອດເສັ້ນທາງ ຫຼື ຕິດຕໍ່ທີ່ເບີໂທລະສັບ: +856-20-5567-3785, 9993-0305, 5600-6534, 030-5876-947.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ